අරුණි ශපීරෝ‍ වෙතින්

ජෝනාස් සල්ක්

Posted in Uncategorized by arunishapiro on ඔක්තෝබර් 28, 2014

jonas-salks-100th-birthday-5130655667060736-hp

ජෝනාස් සල්ක් උපන්නේ අදට වසර 100 කට පෙරයි. 1914 ඔක්තෝබර් 28 වැනි දින නිව් යෝර්ක් නගරයේයි. ඔහු වෛද්‍ය විද්‍යාවේ පර්යේෂකයෙක් සහ වයිරස් පිළිබඳ හදාරන වෛරස්වේදියෙක් (?) විය.

ඔහුගේ දෙමව්පියන් යුදෙව්වන් වූහ. දෙමව්පියන්ට තිබුනේ ඉතා අවම තරමකට ලැබූ ක්‍රමවත් අධ්‍යාපනයකි. ඒත් දරුවන්ට නිසි අධ්‍යාපනයක් ලබාදීම වෙනත් බොහෝ දෙමව්පියන් ලෙසින්ම ඔවුන්ගේ ද අභිප්‍රාය විය.

නිව් යෝර්ක් විශ්ව විද්‍යාලයේ වෛද්‍ය පාසැලේ (පීඨය යැයි හැඳින්වෙන්නට මෙහි කියන්නේ පාසැල කියායි) ඔහු සගයන් අතර කැපී පෙනෙන චරිතයක් වූයේ අධ්‍යාපන කටයුතු වලට දක්ෂතාවය දැක්වීම නිසා නොව වෛද්‍යවරයෙක් ලෙසින් වැඩ කරන්නට නොයා ඔහු පර්යේෂණ පැත්තට යොමු වීම නිසයි.

1957 දී, සල්ක් විසින් එන්නත හඳුන්වා දෙද්දී, දෙවැනි ලෝක යුද්ධයෙන් පසු ඇමෙරිකාවේ වැඩියෙන්ම භීතිය දනවන මහජන සෞඛ්‍ය ගැටළුව හැටියට සැලකුනේ පෝලියෝ රෝගයයි. වාර්ෂිකව පැතිර යන වසංගත වැඩි වැඩියෙන් ව්‍යසන ගෙන එන ලදි.

රටේ ඉතිහාසයේ දරුණුතම වසංගතය බෝ වූයේ 1952 දී ය. ඒ වසරේ වාර්තා කරන ලද 58,000 ක රෝගීන් අතරින්, මිනිසුන් 3,145 ක් මිය ගියහ. තවත් 21,269 ක් එතරම් දරුණු නොවන තත්වයන් සිට ඉතා දරුණු තත්වයන් දක්වා අංශ භාග තත්වයන් වලින් පීඩා වින්ඳහ. මේ කොටසේ වැඩියෙන්ම වූයේ දරුවන්.

මහජනතාව ඊට ප්‍රතිචාර දැක්වූයේ මහමාරියට දක්වන ප්‍රතිචාර ලෙස යැයි ඉතිහාසඥ බිල් ඕ’නීල් කියයි. නගරබද විසූ ජනතාව සෑම ගිම්හානයක දී ම මේ බියකරු අමුත්තා නැවත පැමිණීම ගැන භීතියෙන් සිටියහ. 2009 දී නිර්මාණය වූ PBS වාර්තාකරණයකට අනුව පරමාණු බෝම්බය හැරෙන්නට ඇමෙරිකාව වැඩියෙන්ම බිය වූයේ පෝලියෝ වලට යැයි කියයි.

ප්‍රතිඵලයක් හැටියට විද්‍යාඥයන් රෝගයට පිළියමක් හොයාගන්නට වෙහෙසන තරඟයක යෙදුනහ. 1947 දී සල්ක් පිට්ස්බර්ග් විශ්ව විද්‍යාලයේ වෛද්‍ය පාසැලට ලැබුණ පත්වීමක් පිළිගත්තේය. 1948 දී හේ පෝලියෝ වයිරස් වල විවිධ වර්ග ගැන තීරණ කරන ව්‍යාපෘතියක නියැළිණ. එහි දී පෝලියෝ සඳහා එන්නතක් ගොඩනඟන්නට මේ ව්‍යාපෘතිය තුලින් හැකියාව ඇතැයි ඔහුට දකින්නට ලැබිණ.

ඔහු එකතු කර ගන්නා කුසලතා පිරි පර්යේෂණ කණ්ඩායමක් සමඟ ඊ ළඟ වසර 7 ඔහු ගෙවන්නේ මේ එන්නත නිපදවන්නටයි. ඉතිහාසඥ ඕ’නීල් පෙන්වා දෙන පරිදි මේ එන්නතේ ක්ෂේත්‍ර පිරික්සීම ඇමෙරිකන් ඉතිහාසයේ එතෙක් නොවි විරූ තරම් විශාල අන්දමකින් සිද්ධ කෙරුණි. වෛද්‍යවරු සහ මහජන සෞඛ්‍ය නිලධාරීන් විසිදාහක්, පාසැල් කටයුතු බාර අය හැටහතරදාහක්, ස්වේච්ඡා සේවකයන් දෙලක්ෂවිසිදාහක් ඊට සහභාගී කර ගැනිණ.

1955 අප්‍රේල් 12 වැනිදා එන්නතේ සාර්ථකත්වය මහජනතාවට දන්වද්දී සල්ක්ව “හාස්කම් පාන ලද්දෙක්” යැයි නම් වී ඒ දිනය රටේ ජාතික නිවාඩු දිනයක් බවට පත්වෙන්නට තරම් වැදගත්කමකින් වූ දිනයක් විය.

සල්ක්ගේ පරම අභිප්‍රාය වූයේ ඉතාමත් ඉක්මණින් කාර්යක්ෂම සහ ආරක්ෂා සහිත වූ එන්නතක් ඉදිරිපත් කිරීමයි. ආ … ලංකාවේ අය හැම විටම අගයන පුද්ගලික ලාභයක් ගැන කිසිම බලාපොරොත්තුවක් ඔහුට තිබුනේ ද නැහැ!!!!!

කාට ද පේටන්ට් අයිතිය යැයි ඔහුගෙන් ඇසූ විට, සල්ක් කීවේ “එයට පේටන්ට් නැහැ. ඔබට පුළුවන් ද සූර්යයාව පේටන්ට් කරන්න?” කියායි. එය පේටන්ට් කළා නම් එන්නතේ අගය ඩොලර් බිලයන 7 ක් යැයි ගණන් බලා ඇත.

1960 දී ඔහු කැලිෆෝර්නියාවේ වෛද්‍ය සහ විද්‍යාත්මක පර්යේෂණ සඳහා ආයතනයක් ආරම්භ කරන ලදි. 1995 ජූනි 23 වැනිදා වයස 80 දී සල්ක් හෘදයාබාධයකින් මිය ගියේය.

ඉහත තොරතුරු විකිපීඩියාවෙන්.

ඉහත පින්තූරය අද ගූගල් සර්ච් පිටුවෙන්.

ලොව වැඩියෙන්ම සංඛ්‍යාවක් මිනිසුන් මිය ගියේ මසූරිකා/වසූරිය රෝගයෙන්. අද එය ලොවෙන් තුරන් කරන්නට සමත් වූ බෝවෙන රෝගයකි. ලොවෙන් තුරන් කරන්නට සමත් වෙන අනෙක් වයිරල් රෝගය ගවයන්ට හැදෙන ගව වසංගතය නොහොත් Rinderpest යන්නයි.

තමන් විසින් තතු සොයා දැනගන්නට හැකි යුගයක, කිසිම සෙවිල්ලකින් බැලිල්ලකින් තොරව තමන්ගේ හිතේ ඇති ආකල්ප මතවාද ඔප්පු කරන ලද සත්‍යයන් සේ බෙදන අය සිටිති. අසත්‍ය එහෙත් හාස්‍යජනක සිද්ධීන් මාධ්‍ය වාර්තා ලෙසින් ඉදිරිපත් කරන වෙබ් පිටු පවත්වාගෙන යන අය ඒවා එලෙස යැයි සඳහන් කර තිබුණත් සමහරු උඩින් පල්ලෙන් කියවන හැදියාව නිසා ඒ සිද්ධීන් සත්‍යය යැයි බාරගනිති. අම්මා හා දුවක් පවුල් ගෙවන අසත්‍ය ප්‍රවෘත්තියක එල්ලී ඒ ගැන දිගින් දිගට ෆේස්බුක් එකේ ප්‍රතිචාර දමන්නට කාලයත් මුදලුත් නාස්ති කරති. එය බොරුවක් යැයි සාක්ෂි ඉදිරිපත් කළාට පසුවත් ඒ ගැන කතාව තව දුරටත් දිගින් දිගට ඇදී යෑම දකින්නට හැකියි.

ඒ අස්සේ නව තාක්ෂණයෙන් හනිකට ලැබෙන මහත් ප්‍රතිචාර වලින් මුදල් ලාභ ප්‍රයෝජන ගන්නට එංගලන්තයේ දෙමව්පියන් විසින් වයස 13 නේ දරුවා පියෙක් යැයි බොරුවක් ගොතති.

මාධ්‍ය බොරු කිව්වාට, දෙමව්පියන් බොරු කිව්වාට වඩා වෛද්‍යවරයෙක් නිසි පර්යේෂණ නොපවත්වා වෛද්‍ය පිළියමක් ගැන පතුරුවා හැරීම අතිශය භයානක වූවකි. දකුණු අතේ මාපට ඇඟිල්ලේ නිය පොත්ත උඩ බඳින පාරම්පරික වට්ටෝරුවකට හදන ඖෂධයකින් ඇසේ සුද (cataract) ඉවත් කරත හැකියාව ඇතැයි කියන්නේ බන්දු ලන්දේ ගෙදර වෙද මහතා විසිනි. ඔහු අප්‍රකට වෛද්‍යවරයෙක් වීම ගැන සිතට සතුටක් මෝදු වීම මගේ කුහක කමක් ද?!!!!!!!!! :)

ලොව රස විඳින්නට හැකියාව ඇති බොහෝ දේවල් අතරින් මිනිස් ප්‍රාණියෙකුට ලැබෙන මේ කෙටි ජීවිතයේ දී තෝරා ගන්නට ලැබෙන්නේ ඉතාමත් සොච්චමකි. අගය ඇති දේවල් සහ අගයක් ඇති මිනිසුන් ජීවිතයට ළං කරගන්න මේ මෝඩකම චේතනාව කරගෙන සිටින ජීවිත දකිද්දී මම නැවත නැවතත් මට මතක් කරගන්නෙමි.

නෙදර්ලන්තයේ සිරගෙවල් 19 ක් වසා දැමීම

Posted in Uncategorized by arunishapiro on ඔක්තෝබර් 27, 2014

535927_10204187542122909_3051333411036105854_n

මෙම පින්තූරය ඇහැ ගැටුනේ ෆේස්බුක් එකේ දී. සිරස්තල වලින් ප්‍රවෘත්ති බෙදා හැරීම නිසා පාඨකයා අවුලක පටලැවෙනවා මිසෙක දැනුවත් කිරීමක් සිද්ධ වෙනවා දැයි සැකයි.

කෙටියෙන් කිව්වොත් නෙදර්ලන්තයේ සිරගෙවල් වල කොතරම් දෙනෙක් රැඳවිය හැකිදැයි කියන ගණන් දිහා බැලීමෙන් නෙදර්ලන්තයේ අපරාධ අඩු වැඩි වෙලාදැයි ගැන පැහැදිලි දැක්මක් ලැබෙන්නෙ නැහැ. නෙදර්ලන්තයේ දණ්ඩ නීති පද්ධතිය අවබෝධයට එහි බන්ධනාගාරගතවීම් කොපමණක් වෙනවා ද යන්න සුදුසු වූවක් නෙමෙයි.

අනෙක් අතිශය ඛේදනීය තත්වය තමයි, ලෝකෙ ඕනෑම ආණ්ඩුවක් අද තමන්ට බලය පවරාගෙන තියෙන්නෙ නීතියක් වෙනස් කරලා ඊයේ නිදහස් මිනිසුන්ව අද සාපරාධී මිනිසුන් කරන්න. අද ඇමෙරිකාවේ සමරිසි අයගෙ විවාහ මංගල්‍යයට කේක් හදන්න බෑ කිව්ව කියල හරි කසාද බඳින උත්සවයට නිල ලෙස පෙනී සිටින පූජකයා වෙන්න බෑ කිව්වම නීතිය ඉදිරියේ වැරදිකරුවෙක් වෙන තත්වයක් උදාවෙලා තියනව සමහර ප්‍රාන්ත වල. නීතිය විකෘති කරනවා යැයි ෆෙඩ්රික් බැස්ටියාට් ආණ්ඩුව යන සටහනෙන් පෙන්වා දුන්නෙ මේ තත්වය අද ඊයේ හටගත්තක් නොවන නිසයි.

නෙදර්ලන්තයේ 1947 සිට 1974 දක්වා දිගු කාලීන සිර දඬුවම් ලැබීම අඩු වී ගිය කාලයක්. ඒත් 1975 දී තත්වය වෙනස් වුනා. සිරගත කිරීම් හය ගුණයකින් වැඩිවීමක් පසුගිය වසර 30 දී දකිනන්ට ලැබුණ. ඒ එක්කම අපරාධකරුවන් රඳවන සිරගෙවල් හිඟයක් ද පැතිරුණා. ඒ එක්කම නෙදර්ලන්ත උසාවි වලින් හිරේට නියම කරන අයගෙන් 14% කට පමණක් සිර දඬුවම් විඳීම කමා කෙරුණ. ඒත් මෑත කාලය නෙදර්ලන්තයේ දඬුවම් පැනවීම එහි ඉතිහාසයේ වැඩියෙන්ම සිද්ධ වූ කාලය හැටියටයි සැලකෙන්නෙ.

උසාවියෙන් වරදකරු යැයි තීන්දු වෙන නෙදර්ලන්තයේ වැඩිහිටියන්ව සිරබන්ධනාගාරයට යවන කාර්යය භාර වී ඇත්තේ Custodial Institutions Agency නම් ආයතනයටයි.

නෙදර්ලන්තයේ අපරාධකරුවන්ට දඩයක් ගෙවලා සිරදඬුවමකින් ගැලවෙන්න පුළුවන්. 1983 දී ගෙනෙන Financial Penalties Act නම් වූ ඒ පනතට එහි විශාල ජනප්‍රියත්වයක් ලැබුණි. බන්ධනාගාරයට නියම වූ අය අතර තුනෙන් එකක පිරිසක් ඒ අනුව දඩයක් ගෙවා සිරබත් කෑමෙන් නිදහස් වෙන බව කියැවේ. පනතේ 24 වැනි වගන්තිය අනුව වන්දිය ගෙවත හැකියාව සහ අපරාධය කුමක්දැයි අනුව තමයි දඩය කොච්චරක් ගහනවා ද යන්න තීරණය වෙන්නෙ.

මේක යුරෝපීය හැදියාවක්. පුද්ගලයාගේ වත්කම අනුව දඩය තීරණය වීම. ඉතින් වැඩියෙන් ආදායම් ඇති අය ලොකු දඩයක් ගෙවලා නිදහස් වෙන්න පුළුවන්. ඒත් අර පනතේ ජනප්‍රියත්වය තරමට දඩය ගෙවනවා යැයි කියමින් සිරබත් නොකන අය අවසානයේ දී දඩය නොගෙවා සිටින අවස්ථා සැලකිය යුතු ප්‍රමාණයක් ඇතැයි ඔවුන්ට අත්දකින්නට ලැබෙනව.

සිරබත් නොකන තවත් ක්‍රමයක් තමයි විවිධ මුල්‍ය කොන්දේසි අනුගමනයට එකඟ වීම. අභිචෝදන නීතීඥයන්ට (නඩුව දාන) ලොකු ඉඩකඩක් ලැබෙනවා දඩය සහ මේ මුල්‍ය කොන්දේසි මොනවාදැයි තීරණය කරන බලය පාවිච්චියට. වසර හයකට අඩු සිර දඬුවමක් තීන්දු වෙන අපරාධ සඳහා පමණයි මේ ගණුදෙනුවට අවසර ලැබෙන්නෙ. සාමාන්‍යයෙන් නඩු තීන්දුවක දී හිරේට තීරණය අයගෙන් 90% ක සංඛ්‍යාවක් මේ ආකාරයෙන් දඬුවම් විඳීමට සුදුස්සන් යැයි සැලකෙනව. නමුත් ප්‍රායෝගික වශයෙන් එම ක්‍රමයෙන් දඬුවම් විඳින්න කැමති වෙන්නෙ 30% ක ප්‍රමාණයක්.

තවත් ක්‍රමයක් තමයි අපරාධකරුවා විසින් අපරාධ හැදියාවෙන් වෙනස් වෙන්න කැමැත්තෙන් ඉදිරිපත් වෙලා ඒ සඳහා දින නියමයක් නැති කාලයක් වෛද්‍ය උපදෙස් ලබා ගැනීමට පොරොන්දු වීම. 1955 වසරේ දී සිරබන්ධනාගාරයට නියම වූ අයගෙන් සියයට තුනක් මානසික රෝහල් වල ලැගුම් ගත්ත. 1970 වෙද්දී මානසික රෝහල් වලට ගිය අය දහයෙක් එකක් දක්වා අඩු වී ගියා.

1970 ගණන් වල දී නෙදර්ලන්තයේ සිරගෙවල් සම්පූර්ණ ලෙසින් පිරිලා තිබ්බෙ. ඒත් අපරාධ අධිකරණ පද්ධතියට සරිලන්න සිරගෙවල් ඉදිකරන්න මුදල් යට කරන්න ඔවුන් කැමති වුනේ නැහැ. ඒ නිසා සිරගත කරන සංඛ්‍යාව කෘතීම ලෙස අඩුවෙන් තැබුණ. නඩුවෙන් වරදකරු ලෙස තීරණය වුනාට හිරේට නොයවන රටක්. ඔවුන් නීති වෙනස් කළෙත් නෑ. නීතියෙන් වරදකරුට නියමිත දඬුවම දුන්නෙත් නෑ. ඔවුන් ගැටළුව විසඳුවේ සියළු අපරාධ වලින් හතරෙන් තුනක් අස් කරගැනීමෙන්. අභිචෝදනා වලින් නිදහස් නොවෙච්ච අයව පවා සිරගත වීම නැවතුණා. ඒ අස්සෙම ඒත් හිරේට නියම වෙච්ච අයව ඉඩ නැති හිරගෙවල් වලටත් දැමුණ.

ඒකට පිළියමක් හැටියට ඔවුන් කළේ සිරගෙවල් සඳහා පොරොත්තු ලේඛන හැදීමයි. අපරාධයේ බරපතලකම හැටියට ඔවුන්ව පොරොත්තු ලේඛනයේ තැබුණ. ඉතින් දීර්ඝ කාලයක් පොරොත්තු ලේඛනයේ නම තිබුණා නම් එයත් අහෝසි කරන්න ඔවුන් පටන් ගත්ත. 1995 දී පමණක් සිරගෙවල් වල ඉඩ නැතිකම නිසා පන්දහසකට අධික සංඛ්‍යාවක් සිරදඬුවම් අහෝසි වෙනවා.

1980 ගණන් වල දී 3,300 සිට 12,800 දක්වා සිරගෙවල් හි රැඳවුම්කරැවන් සඳහා ඉඩකඩ වැඩි කළා. 1990 ගණන් වල දී තවත් අමතර 3,500 කට ඉඩකඩ හැදුව. 16,300 ක් හිරේට දාන්න පුළුවන්. 2002 වෙද්දී සෑම පුරවැසියන් ලක්ෂයකටම 93 දෙනෙක් හිරේට දැම්ම. අභිචෝදන නීතීඥයන්ට තිබ්බ බලතල අඩු කෙරුණ.

නමුත් යුරෝපීය මායිම් අතර ගමනාගමනයට ඉඩ දීමත් සමඟින් 2000 වසරේ දී අත් නොහිටුවන සිරදඬුවම් ගණන දෙගුණයකින් වැඩිවෙනව. ආයෙත් සිරගෙවල් වල ඉඩකඩ වැඩි කරන්න සිද්ධ වෙනවා. වසර අටක දී රටට නීතිවිරෝධී ලෙසින් ඇතුල් වූ අයව හිරබාරයේ තබන්නට පමණක් 9,600 ක් දක්වා (380% ක් වැඩිවී) ඉඩකඩ හැදෙනව. හොරෙන් රටට එන අය වැඩිවීමේ ප්‍රතිඵලයක් ලෙසින් සිරබාරයේ තබන අයගෙන් සියයට දහයක් ඉඩ අවශ්‍ය වෙන්නෙ එහෙම අයව දාන්නට.

2009 වෙද්දී නෙදර්ලන්තයේ අධිකරණ අමාත්‍යාංශය හිරගෙවල් අටක් වැහුව. එක හේතුවක් වර්තමානය යනු ලෝකයේ අපරාධ දැඩි සේ පහළ යන කාලයක්. ඇමෙරිකාවේ අද හිරගෙවල් වල වැඩියෙන් ඉන්නෙ රටේ නීති පද්ධතියෙන් අපරාධකරුවන් යැයි නියම වෙච්ච අය. සමහර අය අනිත් අයට අපරාධ කළාට වඩා තමන්ටම අපරාධ කරගත්ත කුඩුකාරයෝ.

නෙදර්ලන්තයේ මත්ද්‍රව්‍ය භාවිතයේ නීති ලිහිල් වීම එහි අපරාධකරුවන් අඩුවීමට එක හේතුවක්. ඒ කියන්නෙ මත්ද්‍රව්‍ය භාවිතා කරන අය අඩු වුනා කියල නෙමෙයි. ඔවුන් මත්ද්‍රව්‍ය භාවිතය නිසා තව දුරටත් අපරාධකරුවන් නොවෙනවා යන්න පමණකින් නීතිය වෙනස්වීම.

සිරදඬුවමකින් ගැලවෙන්නට හැකියාව ලැබෙන තවත් මෑත කාලීන ක්‍රමයක් තමයි ඉලෙක්ට්‍රොනික් ටැග් එකක් පළඳින්නට එකඟ වීම. විශේෂයෙන් පවුල් අවුල් සහ දරුවන්ට ලිංගික අතවර කරන අයව මෙයාකාරයෙන් මෙල්ල කිරීම.

ඉතින් 14,000 ක් හිරේ දාන්න ඉඩකඩ තියෙන නෙදර්ලන්තයේ බන්ධනාගාර රැඳවුම්කරුවන් ඉන්නෙ 12,000 ක් පමණයි.

ඇමෙරිකාවේ අයව හිරේ දාන ප්‍රමාණය නෙදර්ලන්තයට වඩා දහ ගුණයකින් වැඩියි. ඒත් 2011 දී FBI දැනුම් දුන්නා වසර 40 ක දී අඩුම ප්‍රචණ්ඩ අපරාධ දකින්නට ලැබෙන සමයක් උදාවෙලා කියල. ඒක අහලා අන්දුන් කුන්දුන් වෙලා තියෙන්නෙ  අපාරධවේදියන්ලු!!!!

වර්තමානයේ අපරාධ යැයි හැඳින්වෙන ඒවා වැඩියක් තමන්ගෙ තෝරාගැනීම් වලට ආණ්ඩුව පනවන නීතියක් එරෙහි වීමෙන් සිද්ධ වෙන ඒවා. ෆ්ලෝරීඩා ප්‍රාන්තයේ අයෙක්ගෙ පොකැට්ටුවෙ අහම්බෙන් දා ගත්ත පෙත්තක් නිසා තව පොඩ්ඩෙන් සම්පූර්ණ ජීවිතයම අනාථ වෙනවා. හැබැයි මෙහෙ එකම දේ උප ජනාධිපතිගෙ පුතා වුනත්, මොන සල්ලිකාරයා වුනත් හෙරොයින් ගහලා අහුවුනොත් අනිත් අයට ලැබෙන දඬුවම එයාටත් විඳින්නට සිද්ධ වීම.

අපූරු බිස්නස් මොඩල් එකක්

Posted in Uncategorized by arunishapiro on ඔක්තෝබර් 26, 2014

IMG_2201

ඔන්න එකමත් එක කාලෙක රටේ සිරි නරඹන්න කියලා කැරවෑන් එකක නැඟලා ගිය පවුලක් හිටිය. රට ඇමෙරිකාව. කැරවෑන් කියන්නෙ එංගලන්තෙ (ඒ නිසා ලංකාවේ) අය වුනාට මෙහෙ අය කියන්නෙ විනෝද ක්‍රියාවන් කරන වාහන (recreational vehicle =RV) හෙවත් “ආර්වී” කියලයි. දැන් මේ පවුල මේ මහා විශාල රටේ සිරි නරඹමින් යද්දී අපි ඉන්න පැත්තෙ දී එයාලගෙ වාහනය කැඩුණ.

ගමන යන වාහනයයි, නැවතෙන හෝටල් කාමරයයි විදියට පාවිච්චි කරන ආර්වී එකක් දීර්ඝ කාලයක් නවත්තලා තියන්න නම් ඒවාට වෙන් වූ විශේෂ තැනක් හොයාගන්න ඕන. ඒවායේ ඇතුලත වැසිකිළි පහසුකම් තිබුනට ඒවාට එකතු වෙන දේවල් අයින් කරන පහසුකම් සපයන්නෙ ඒ විශේෂ ස්ථාන වල දී පමණයි.

එයාල වාහනේ හදාගෙන ගමන යනවා වෙනුවට පළාතේ ලස්සන දැකලා තීරණයක් ගත්තලු මෙහෙ පදිංචියට.

පවුලෙ තාත්තා රසට උයන්න දන්න අරක්කැමියෙක්. වාහනය රැඳ වූ ආර්වී නැවතුම්පොළ අසල පුංචි කඩයක් මේ අය අවන්හලක් දාන්න තෝරාගන්නවා. ඔය තොරතුරු ටික පළාතේ ජනප්‍රවාදයයි.

මෙයාලගෙ අපූරු බිස්නස් මොඩල් එක හැදෙන්නෙ එතැන දී. අවන්හල කුඩායි. ආසන ඇත්තේ තිහක් පමණයි. අවන්හලේ පුටුවක් ඒ සතියේ මුල දී දුරකතනයෙන් අමතලා වෙන් කරගන්න ඕන. ඔක්කොම පුටු ඉවරයි නම් කවුරු හරි කැන්සල් කළොත් ඒ අය දැනුම් දෙන ලැයිස්තුවේ නම ලියනවා.

දැන් මේ අය තමයි ඔවුන්ගෙ කුඩා රාජධානියේ රජ පවුල. ඒ කියන්නෙ පුටුවක් වෙන් කරගන්න කතා කරන්නෙ කවුද කියන එකට කිසිම වැදගත්කමක් ඔවුන් දෙන්නෙ නැහැ. එතැන්ට එක්ක ගෙන යන්න සමත් වුනා කියල කියන්න හැකියාවක් වෙන කාටවත් දෙන්නෙ නැති නිසා අවන්හලයි වැදගත්. මෙහෙ ඉතින් මල් මාලා දාලා දෙකට තුනට නැවිලා පිළිගත්තෙ නැහැයි කියල ගුටි අනින්න හැකියාව තියෙන හෝ බිස්නස් බංකොළොත් කරන හැකියාව ඇති දේශපාලනඥයන් නැහැනෙ.

ඉතින් The Grove Market and Smokehouse කියන මේ අවන්හලේ කාලා තියෙනවා කියන පිරිසට එකතු වෙන්න පළාතේ අයට විතරක් නෙමෙයි මේ පැත්තෙ සංචාරයට එන බොහෝ දෙනෙකුට තිබෙන ආශාවක්. අර ටික දෙනෙක් විතරක් යන තැනකට තමන්ට ද යන්න පුළුවන් වුනා කියලා කියන ආඩම්බරය තමයි ඔවුන් අලෙවි කරන්නෙ!!!!

අපි දෙන්නටයි අපේ යාළුවෝ දෙන්නටයි පුටු ලැබුනෙ කවුද කැන්සල් කරපු නිසා. වෙන වැඩ පැත්තකට දාලා අපි ගියෙ ඒ අවස්ථාව කලාතුරකින් ලැබෙන්නක් බව දන්න නිසා. රාත්‍රී ආහාරය පමණක් සපයන, සවස 5 ට සහ සවස 8 ට පමණක් ආහාර පිරිනමන මේ බිස්නස් ක්‍රමය නිසා ඔවුන් සෑම දවසකම අවන්හලේ සෑම පුටුවක්ම පුරවන්න සමත් වෙනවා.

ඊ ළඟ විශේෂය, ඔවුන් පිළිගන්වන ආහාර මොනවාදැයි කියා හෝ ඒවායේ මිල ගණන් දක්වන මෙනූ එකක් නැතිකම. තාත්තා කෑම උයද්දී අම්මා ඇවිත් ඒ ඒ ආහාරය පිළියෙල වෙන හැටි විස්තර එකින් එක කටට කෙළ උනන විදියට කියනවා. මිල ගණන් අහන්න කිසිම අවසරයක් නැහැ. ඒක ඔවුන් කිසි ආරවුලක් නැතිව පවත්වාගෙන යන්නෙ අවන්හලේ හැදියාව නොදන්නා අයට පුටුවක් නොදී සිටීමෙන් වෙන්නැති!!!

ඇය පිළිගන්වන ආහාර මතකයෙන් කියනවා සේ ම, කන්න ආපු අය ඇණවුම් කරන දේවල් ද මතකයේ තබා ගන්නවා පමණයි. ඕඩර් වැරැද්දුවේ නැහැ. කතාබහ කරමින් කන මැද්දට පැනලා කෑම රසයි ද කියලා අහන නරක සිරිත අනුගමනය කළෙත් නැහැ. තමන් හදන කෑම තරම් රස කෑම පළාතෙ වෙන කොතැනකවත් නැහැයි කියලා හිතන අය ඉතින් කෑම රසයි ද කියලා අහන්න ඕන නැහැනෙ.

IMG_2194 IMG_2195

ප්‍රධාන ආහාරයට කළින් කන ඇපිටයිසර් (=කටගැස්ම?), ප්‍රධාන ආහරය, අතුරුපස යනාදී හැම අංගයකින්ම දහයක් තරම් ප්‍රමාණයක් ඉදිරිපත් වෙනවා. කඩේ පිටිපස්සෙ පුංචි හට් එකක ඔවුන්ම දුම් ගසා හදන මස් සහ මාළු තමයි ඇපිටයිසර් සඳහා වැඩියෙන් ඉදිරිපත් වුනේ. ප්‍රධාන ආහාරයට මම ගත්තෙ තිරිඟු ඇබිත්තක් ද දාලා දුරු සහිත කිරි හොද්දක උයපු මුහුදු බෙල්ලො (sea scallops). හරක් මස්, කුකුළු මස්, තාරා මස්, ඌරු මස්, මාළු වර්ග දෙකක් සහ කකුළු මස් ද ප්‍රධාන ආහාර අතර තිබුණ.

කෑම ඉතා රසවත් ලෙසට පිළියෙල කර තිබුණ. බොන්න සෝඩා වර්ග දෙක තුනක්, කෝපි, වයින් සහ බියර් වර්ග ස්වල්පයක් අතර පමණයි තෝරාගැනීම් කරන්න පුළුවන්.

අතුරුපසට දක්ෂ යැයි පළාතේ නම් දරාපු අයෙක් හදන පයි, පුඩිං යනාදිය තමයි ඔවුන් දෙන්නෙ. එයාගෙ තැනේ දී ඒවා කාලා තියෙන නිසා මෙතැන දී අතුරුපස ගත්තෙ නැහැ.

මේක සාමාන්‍යයෙන් ඩයිව් එකක්, ජොයින්ට් එකක් වැනි නමකින් හැඳින්විය හැකි තැනක්. ලෑලි කඩේ ඇතුලෙ ප්ලාස්ටික් පුටු, බාල හැඳි ගෑරැප්පු සහ ප්ලාස්ටික් කෝප්ප තමයි තියෙන්නෙ. පිඟන් එකකට එකක් නොගැලපෙන ඒවා. ඒත් ආහාර සුපිරි අවන්හලක සේ හදන එසේම ඉතා ඉහළ මිලකින් යුතුයි. අපි හතරදෙනාට, මගෙ සුද්දගෙ පෙරියෙර් වතුර බෝතලේයි, මගේ ජින්ජර් ඒල් සෝඩා කෑන් එකයි, අපේ යාළුවෝ දෙන්නට වයින් බෝතලයයි, ඇපිටයිසර් තුනයි, ප්‍රධාන ආහාර හතරයි ඔක්කොටම ඩොලර් දෙසීය ඉක්මවා ගියා.

අපි කතාබහෙන් කන බොන අතරේ හැම පුටුවක්ම පිරිලා තියෙන කුඩා කඩ කාමරේ දිහා බලල අපේ යාළුවා අපිට කියනවා මේ කඩේ තව පොඩ්ඩක් ලොකු කළා නම් නේද කියල. ඒත් මම කිව්වෙ මෙයාලගෙ බිස්නස් මොඩල් එක සාර්ථක ඒක අසුනක් ලබාගන්න දුෂ්කර පුංචි තැනක් නිසාමයි කියල. අනික ආදායම වැඩි කරගන්න ඔවුන්ට හැකියාව ලැබෙන්නෙ කෑම බීම වල ගාණ සඳහන් කරපු මෙනූ එකක් නැතිකමෙන්. ඊයේ හදපු කෑම වේල එයාලට අද ඊට වඩා වැඩි මිලකට විකුණන්න පුළුවන්. එක වේලකට තිස් දෙනෙකුට කෑම හදන්න පුළුවන් එක අරක්කැමියෙක් ඉන්න නිසා තවත් සහායට අය සේවයට බඳවා ගන්නත් අවශ්‍ය නැහැ. අඩු වැයකින් වැඩි ආදායමක් ලබාගත හැකි අපූරු බිස්නස් මොඩල් එකක්.

IMG_2197

IMG_2196

IMG_2199

කෑම බීම විතරක් මදි විනෝදයත් ඕනෑ

Posted in Uncategorized by arunishapiro on ඔක්තෝබර් 22, 2014

IMG_2067

ආහාර පාන ලොව බහුල යුගයක අපි ජීවත්වෙමු. නන් දෙසින් ලැබෙන ආහාර බුදින්නට හැකියාව ලැබෙන වර්තමාන ලෝකයේ යම් කෑමක් බීමක් හොයාගන්නට නැත්තේ එයට ආණ්ඩුවක් මැදිහත්වෙනවා නම් පමණකි. “සාගතෙන් පෙළෙනවුන් දැන් ඉතින් නැගිටියව්” කියා උද්ඝෝෂණ පවත්වන්නට ජනතාව එකතු කරන උත්සාහයක් ලොව කොතැනකවත් අද දකින්නට නොහැකියි. දැන් ඇත්තේ බලයේ ඉන්න අයට වැඩියෙන් හරියට බෙදන්නට අපි දන්නවා යැයි කියන උද්ඝෝෂණ පමණයි.

ඒත්, තමන් කන බොන දේවල් හිඟ නම් ඒ තත්වය ඇති වූයේ ආණ්ඩුව මැදිහත් වූ නිසා බව අද “සාගතෙන් පෙළෙනවුන්” වටහා ගෙන නැත.

ගංවතුර, ඉඩෝර, ලැව් ගිනි, බෝග වලට හැදෙන රෝග නිසා බඩගින්නේ පෙළෙන ජනතාවක් අද ලොව කොතැනකවත් සොයාගන්නට නැත. ලෝකයේ කිසිම ආණ්ඩුවක් ආහාර නිෂ්පාදනය කරන්න නොදන්නා බව ඔප්පු වූ පසු ඒ මහා පරිමාණ මැදිහත්වීම් වලින් ඔවුන්ට අයින් වෙන්නට සිද්ධ වූහ. ඒත් ආණ්ඩු ආහාර නිෂ්පාදනයට කරන මැදිහත්වීම් අත්හැර දමා නැත. තමන් කැමති ආහාර මේසයට ගෙන්වා ගන්නට ඉඩ ලැබෙන්නේ ආණ්ඩුව මැදිහත් වෙන නිසා යැයි සිතන තාක් කල් තමන් කැමති ආහාර කෑම මේසයේ දකින්නට ලැබීම අඩු බව බහුතර වැසියන් වටහා නොගත්තකි.

අද ලෝකවැසියන් බහුතරය ආහාරපාන බුදින්නේ බඩගිනි නිවාගන්නට පමණක් නොවේ. බඩගින්න පමණක් නොව, දිව පිනවීම පමණක් නොව, ඇස් පිනවීමත් කෑම මේසයෙන් බලාපොරොත්තු වීම සංවර්ධිත රටවල සාමාන්‍යයක් ද, දුප්පත් රටවල පාලන පංතියට සීමා වූවක් ද වේ. ඒ කෑම බීම පමණක් මදි ඒවායෙන් සප්පාම් වෙද්දී විනෝදයත් ඕනෑ යැයි පුරාතනයේ දී කියන්නට ලැබුන රජුන් ඇතුළු ප්‍රභූ පංතිය අනුගමනයෙන් දුප්පත් රටවල පාලන පංතිය තවමත් හැසිරෙන නිසයි.

ආහාර බුදින රජු ඇතුළු ප්‍රභූන්ට විනෝදය සපයන්න වෙහෙසුණ සුපිරි අරක්කැමියෙක් ගැන අනගි චිත්‍රපටියක් රසවිඳින්නට ලැබෙන්නේ Vatel (2000) හි.

ආණ්ඩු මැදිහත්වීම් අඩු රටවල සාමාන්‍ය ජනතාවටත් ආහාර ගනිද්දී විනෝද රසාස්වාදයක් සපයන විවිධ වෙළඳ උත්සාහයන් දකින්නට පුළුවනි.

කන බොන ගමන් රංගන නරඹන භෝජන සංග්‍රහ යටත්විජිත සමයේ යටත්විජිත පාලකයන්ට ලැබුන බව ඉතිහාසය දක්වයි. වර්තමානයේ දී ද, එවැනි අවස්ථා දකින්නට ඇත්තේ ආරාධනා ලද ඉහළ සමාජයේ අයගේ සහභාගීත්වයෙන් සිද්ධ වෙද්දී පමණකි. සමහර විට සාමාන්‍ය ලාංකිකයා ආහාර වේලක් සමඟ කලාත්මක රසාස්වාදයක් ලබන්නට මිලක් ගෙවන්නට අකමැති ඇති.

කන බොන අයට විනෝදයක් සපයන්නට කියා හිටිවන කවියන්ට, ආධුනික නළු නිළියන්ට, ආධුනික ගායකයන්ට, ආධුනික සංගීතඥයන්ට එහෙමත් නැත්නම් ආධුනික විහිළුකාරයන්ට නොමිලේ ඉඩ ප්‍රස්ථාවක් ලබාදෙන්නට ලංකාවේ සංචාරක මට්ටමේ නොවන අවන්හලක් ඉදිරිපත් වේවිද?

ඒත් එහෙම උත්සාහයක් කවුරු හරි ගත්තොත්, පුද්ගලික අයිතිය සහ මහජන දේපල භාවිතය කෙසේදැයි නොදන්නා අය තවම රටේ වැඩි නිසා සමහර අය එතෙන්ට ඇවිත් කන්න බොන්න අවන්හලට එන එකත් පාරිභෝගිකයාට එපා කරාවි ද?

සිනමා ශාලාවක දී රාත්‍රී ආහාරය ගනිමින් චිත්‍රපටියක් නැරඹූ සටහන මෙතැනින්.

අවන්හලක දී රාත්‍රී ආහාරය ගනිමින් සහභාගී වූ ප්‍රශ්නෝත්තර වැඩ සටහන මෙතැනින්.

පසුගිය දිනෙක අපේ ගමේ අවන්හලක දී කෑම බීම ගන්න ගමන් විනෝදයට අබිරහස් මරණයක් විසඳන නාට්‍ය රංගනයක් නරඹන්නට අවස්ථාව ලැබුණි.

අවන්හලට ඇතුල්වෙද්දී නාට්‍යයේ චරිතයක් රඟපාන්න කැමති නම් ඒ චරිතය සඳහා තිරපිටපත සහ චරිතයට හරියන සරල ඇඳුමක් ආයිත්තමක් ඔවුන් සූදානම් කර තිබුණහ. අකමැති අයට අනිත් අය රඟපාන හැටි බලමින් ආහාර අනුභවයේ යෙදෙන්නට හැකිවිය. කෑම බීම හා රංගනය අවසානයේ දී කවුද වැරදිකරුවා යැයි තීරණයට හැමෝටම අවස්ථාවත්, එයින් නිවැරදි උත්තර අතරින් තෝරාගත් අයට අවන්හලෙන් ඩොලර් 25 ක තෑග්ගක් ප්‍රදානය කෙරැණි.

බඩගිනි ජනතාව ලොව අඩුවෙන ප්‍රවණතාවයක් 2014 දී දකින්න ලැබෙනවා කියන්නෙ ජාත්‍යන්තර ආහාර ප්‍රතිපත්ති පර්යේෂණ ආයතනයයි. 1990 සිට සංවර්ධනය වෙන රටවල බඩගිනි තත්වය 39% කින් පහත වැටිලාලු. හැබැයි දත්ත මැනිපියුලේට් කරන රටවල් බොහොමයක් නිසා මේ වාර්තා නිසි අවබෝධයට සුවිශේෂ දැනුමක් අවශ්‍යයයි.

IMG_2056 IMG_2058 IMG_2059 IMG_2062

මලාලා, නොබෙල් තෑගි සහ බටහිර කුමන්ත්‍රණ

Posted in Uncategorized by arunishapiro on ඔක්තෝබර් 19, 2014

රැසියාවේ සාර්ට මුහුදු බෝම්බ වලින් නැව් ගිනිබත් කරන හැටි පෙන්වූ ආකාරය ගැන ඉමැනුඑල් නොබෙල් විසින් අඳින ලද්දකි.

රැසියාවේ සාර්ට මුහුදු බෝම්බ වලින් නැව් ගිනිබත් කරන හැටි පෙන්වූ ආකාරය ගැන ඉමැනුඑල් නොබෙල් විසින් අඳින ලද්දකි.

ඇල්ෆ්‍රඩ් නොබෙල්ගේ පියා වූ ඉමැනුඑල් නොබෙල් ක්‍රයිමියා යුද්ධයේ දී රුසියාවේ සාර්ට මුහුදු බෝම්බ හදා දුන් අයයි. ඇල්ෆ්‍රඩ් නොබෙල් ලොවට දායාද කළේ ඩයිනමට්. ප්‍රංශ-පෲසියන් යුද්ධයේ දී පෲසියන් (ජර්මන්) අය ද පසුව ප්‍රංශ අය ද යුද්ධ සඳහා ඩයිනමයිට් භාවිතා කළහ.

තමන්ගේ ඩයිනමයිට් කම්හල් ගැන ඇල්ෆ්‍රඩ් නොබෙල් 1891 දී ඔස්ට්‍රියන් කවුන්ටස් බර්තා වොන් සට්නර්ට මෙසේ කියා ඇත: “සමහර විට මගේ කම්හල් යුද්ධයට තිතක් තියාවි ඔබේ කොංග්‍රසයට කළින්. යුද හමුදා දෙකක් එකිනෙකාව ක්ෂණයෙන් සහමුලින් තුරන්කර දැමිය හැකියාව ඇතැයි දකිද්දී සියළු සභ්‍ය ජාතීන් එම බීහත්ස්‍ය දැක තමන්ගේ යුද හමුදා අහෝසි කර දමනු ඇත.” එහෙත් පළමු ලෝක සංග්‍රාමය තුලින් ඔහුගේ ඒ මතය කොතරම් වැරදි දැයි දකින්නට ඔහු ජීවත්වූයේ නැත.

ඇල්ෆ්‍රඩ්ට වඩා ඇල්බට් (අයන්ස්ටයින්) පරමාණු බෝම්බයෙන් ලෝක යුද්ධ වලට තාවකාලික විරාමයක් ලබා දුන්නාදැයි විවාද කළ හැකියි. ඇල්බට් කියූ එක ප්‍රකාශයක් නම් “අයෙකුට බැහැ එකවර යුද්ධය වළක්වන්නට සහ යුද්ධයට සූදානම් වෙන්න,” කියායි. ඔහු කියූ තවත් ප්‍රකාශයක් නම්, “තුන්වැනි ලෝක යුද්ධය සටන් වදින්නේ මොන ආයුධ වලින් දැයි මා නොදනිමි, ඒත් හතරවැනි යුද්ධය නම් සටන් වදින්නේ මුගුරු සහ ගල් වලින්.”

1890 ගණන් වල දී ආයුධ තාක්ෂණ වෙනුවෙන් වැඩි කාලයක් කැප කළ ඇල්ෆ්‍රඩ් නොබෙල්ට උවමනා වූයේ තවත් ධනවෙතක් මිය ගියාය යන මරණ දැන්වීම පමණක් ලොවට ඉතිරිකර සමුනොගන්නටයි. ලෝකයේ සාමය ස්ථාපිත කරන්නට කැපවුන පුද්ගලයන් අගය කිරීම ගැන කොතරම් උවමනාවක් ඔහුට තිබුණා දැයි යන්න ගැන විවාද කළ හැකියි.

විද්‍යා ක්ෂේත්‍රයන් හැරුණු විට සාම, ආර්ථික විද්‍යා, සාහිත්‍ය යන නොබෙල් තෑගි දේශපාලනීකරණයෙන් සිද්ධ වීම පුදුමයක් නොවේ.

සාමය සාක්ෂාත් කරන්නට යුද බලයෙන් හැකි යැයි සිතන අය ලොව සිටිති. සාමය සාක්ෂාත් කරන්නට ඒකීය පුද්ගලයන්ට එකිනෙකා හා ගණුදෙනු වලට ඉඩ දීමෙන් හැකි යැයි සිතන පිරිසක් ලොව සිටිති. පළමු කොටස නැවත නැවතත් එයට නොහැකියාව මනාව පෙන්නුම් කරති. දෙවැනි කොටස ලැබෙන ඇබිත්තන් ඉඩකින් පවා එය කළ හැකි යැයි ඔප්පු කරති.

ආර්ථික විද්‍යාවේ ප්‍රධාන බෙදීම ඔස්ට්‍රියන් සහ ඔස්ට්‍රියන් නොවන අය අතරයි. ඔස්ට්‍රියන් අය ආණ්ඩුවේ මැදිහත්වීම් අඩුවෙන තරමට ආර්ථිකයක් සංවර්ධනය වෙන ආකාරය ඔප්පු කරති. ඔස්ට්‍රියන් නොවන අය නැවත නැවතත් අනේක විධ මහා පරිමාණ උත්සාහ ගෙනෙමින් මැදිහත්වීම් නිසා ආර්ථිකයන් බංකොළොත්වෙන ආකාරය ඔප්පු කරති.

සාහිත්‍ය කෘතියක් එකම විදියට රස විඳින දෙදෙනෙක් සොයාගත නොහැකියි. එවැනි ක්ෂේත්‍රයකට ත්‍යාගයක් ලැබිය යුතු ද යන්න විවාද කළ හැකියි. සාහිත්‍යයටත්, සිනමාවටත්, සංගීතයටත් සම්මාන ලැබෙන ලෝකයක අපි ජීවත් වෙමු. ඒ අය ඒ අයට සම්මාන හා තෑගි දී ගත්තාට අපි ඒ නිර්මාණ අගය කළ යුතු යැයි නීතියක් හෝ සම්ප්‍රදායක් කොතැනකවත් නැත.

හොලිවුඩ් ඔස්කාර් සම්මාන ලැබුණු චිත්‍රපටි අගය කළ යුතු යැයි නීතියක් හෝ සම්ප්‍රදායක් කොතැනකවත් නැත.

නොබෙල් සාම, ආර්ථික විද්‍යා, සාහිත්‍ය තෑගි නිසා අපි ඒ ලැබුණ අයව හෝ ඒ අදහස් හෝ ඒ නිර්මාණ අගය කළ යුතු යැයි නීතියක් හෝ සම්ප්‍රදායක් කොතැනකවත් නැත.

නොබෙල් විද්‍යා තෑගි හිමිවූ අයගේ නිර්මාණ හේතුවෙන් මිනිස් ජීවිත අදට වඩා හෙට අනගි කරගන්නට ලැබෙන හැකියාව ඒවා ගැන සොයාබලන්නට දන්නා අයත් නොදන්නා අයත් දෙගොල්ලන් විසින්ම අත්දකින්නකි. එහෙත් නොබෙල් විද්‍යා තෑගි හිමි නොවූ අගනා විද්‍යා නිර්මාණ දිනපතා කළ එළි බසිති. තෑගි ලැබුණ ඒවා හෝ තෑගි නොලැබුණ ඒවා අගය කළ යුතු යැයි නීතියක් හෝ සම්ප්‍රදායක් කොතැනකවත් නැත.

තම ජීවිතය අනගි කරන දේවල් ලැබුනේ කෙසේදැයි නොදැන, එයට කිසිම අගයක් නොදී (අන්තර්ජාලය, එන්නත්, මොබයිල් දුරකතන යනාදිය) දිනපතා භාවිතා කරන මිනිස්සු කොතරම් ලොව සිටිනවා ද?!!!!!!

සිළුමිණ විශේෂාංගයක් ලියන ටිරෝනි වෑවලගේ හැමදාම දකින්නට ලැබෙන ලංකාවේ සිංහලෙන් කියවන්නාට ලැබෙන අවුල් එලෙසින්ම ඉදිරිපත් කරන්නට විශිෂ්ඨ ලෙසින් සමත් වී ඇත. ඒත් ඉතින් දැන් කාලේ ලෝකවාසීන් එක්ක සිංහලෙන් අදහස් බෙදාගන්නට මා වැනි මාධ්‍යවේදීණියක් නොවන ගෘහණියකටත් හැකියාව ලැබීම කාගේ වාසනාව ද?!!!!! :D

අවුල හැදෙන්නේ මෙහෙමයි: ඇය මෙසේ ලියයි: “අද නොබෙල් සාම ත්‍යාගය හිමි වන්නේ බටහිර දේශපාලනික අරමුණු වෙනුවෙන් ඉත්තන් බවට පත්වන පුද්ගලයන්ට ප්‍රසිද්ධිය ලබා දීමටය.” පළමු වචනය හැරෙන්නට ඇය නිවැරිදියි. “අද” විතරක් නෙමෙයි, ආරම්භයේ පටන් සිද්ධ වූයේ එයයි.

ඊ ළඟට ටිරෝනි වෑවලගේ සටහනට සිරස්තලයක් වැටෙන්නේ “සී.අයි.ඒ. වෙඩිපහර මලාලාට නොබෙල් තෑග්ග ලබා දෙයි,” කියායි. සටහන් වලට වැටෙන සිරස්තල ගැන ලේඛිකාවට දෝෂාරෝපණය නොකරන්නට කියවන්නා මතක තබාගත යුතුයි. සටහනේ (අන්තර්ජාලයෙන් කියවන්නට හැකි කොටසේ) එවැනි අදහසක් ලියැවී නොමැත.

ටිරෝනිගේ සටහනේ අවසානයේ මහත්මා ගාන්ධිට සාම තෑග්ගක් දෙන්නට නොබෙල් කමිටුවට අමතක වී දැයි ලිවීම ඒ නිසා වැරදි උපකල්පනයකින් වැරදි නිගමනයක් කරා එළඹීම පෙන්නුම් කරයි. ගාන්ධි අඩු වයසේ කෙල්ලන් හා නිදි යහනේ පර්යේෂණ පැවැත්වීම මෙතැන දී අදාල නැත.

ඒත් බටහිර අරමුණු හෝ බටහිර කුමන්ත්‍රණ යැයි ගනිද්දී බටහිර රටවල දෙපැත්තක් ඇති බව බහුතර ලෝකවාසීන් නොදිනිති. බටහිර එක පැත්තක් රාජ්‍ය මැදිහත්වාදය ඉත සිතින් වැළඳගන්නා අයවෙති. ඉස්ලාමීය දේශය හදන්නට යන අයට ඇමෙරිකාව විසින් පහර දිය යුතුයි යන්නට ඔවුන් එකඟ වෙති. ඇමෙරිකාවේ ඒකීය පුද්ගල නිදහස් උත්සාහයන් මැඬලීමට ආණ්ඩුවට බලය දිය යුතු යැයි ඔවුන් එකඟ වෙති. එසේ එකඟ වෙන ගමන්, එහි ප්‍රතිඵලය ලෙස ඇමෙරිකන් ආණ්ඩුව කරන විනාශයන් උලුප්ප උලුප්පා කතාකරන්නේ මේ අයමයි. හරියට ලංකාවේ අය රටේ පෞද්ගලික අංශය මෙල්ල කරන්නට ආණ්ඩුවට බලය පවරමින් හැමදාම “බලයේ ඉන්න මේ රජයේ” වැරදි ගැන කතා කරමින් සිටිනවා වැනියි!!!!!

ඇයි මට මලාලාගේ නොබෙල් තෑග්ග ගැන ප්‍රශංසා කරන්නට බැරි” යැයි සටහනක් මෙසේ ඉංග්‍රීසියෙන් ලියැවී ඇත. මලාලාව ඩ්‍රෝන් ප්‍රහාරයකින් මැරුවා නම් ඇයගේ නම එක්සත් රාජධානියේ මාධ්‍යයකින් ඇසෙන්නේ නැතැයි ජෝර්ජ් ගැලොවේ ටීව්ට් කරයි. ඔබාමා ගෙනයන ඇමෙරිකන් ඩ්‍රෝන් ප්‍රහාර රටේ ව්‍යවස්ථාව උල්ලංඝණයකි. ලෝකයේ ත්‍රස්තවාදය තුරන් කිරීම සඳහා යුද වදින්නට ලොව ඕනෑම තැනක වැසියෙකුට රහසිගත හේතු, රහසිගත සාක්ෂි, නම්ගම් සඟවන ලද නිලධාරීන්ට රහසිගත ආකාරයකින් කරන්නට හැකියාව ලැබෙන බලයක් රටේ විධායකයට පවරා නැත යැයි ජෝන් ඔලිවර් පෙන්වා දෙයි.

මලාලා සමඟ සංසන්ඳනයක් කරන්නට තවත් සටහනක් යොදා ගන්නේ නැබිලියාගේ කතාවයි. ඒත් රිපබ්ලිකන් ජනාධිපතිවරයෙක් සිටියා නම් පමණක් දොස් කීම හැදියාව කරගත් ලෝකයක, නබියා සිය ඛේදවාචකය ඇමෙරිකාවේ කොංග්‍රසයට පැමිණ කියද්දී බරක් ඔබාමා තවත් දේවල් වලට අමතරව ආයුධත් නිෂ්පාදනය කරන ආණ්ඩුවේ වරප්‍රසාද ලැබෙන ලොක්හීඩ් මාටින් කොම්පැණියේ CEO සමඟ රැස්වීමක සිටීම ගැන කිසිවක් නොකියති.

රාජ්‍ය මැදිහත්වාදය අගයන අය ඊට ප්‍රංශසා කරන්නට අවස්ථාවක් කරගන්නේ පාඨකයා අවුලක පටලැවීමෙනි.

රාජ්‍ය මැදිහත්වාදයක් නැත්නම් මලාලාට තෑග්ගක් දෙන්නට පවා අවශ්‍යතාවයක් ඇතිවේවි ද?

ස්ටාර්කන්බර්ගර් මාලිගාවේ බියර් තටාක

Posted in Uncategorized by arunishapiro on ඔක්තෝබර් 12, 2014

Screen Shot 2014-10-12 at 10.30.45 AM

බියර් වලට කැමති අයට බියර් වල බැහැලා ඉන්න හැකි තටාක ඇත්තේ ඔස්ට්‍රියාවේ ස්ටාර්කන්බර්ග් මාලිගාවේ නමින් බියර් හදන වසර සිය ගණනක් පැරණි ස්කාගාරයේ දී යි. ඔස්ට්‍රියන් (ජර්මන්) බසින් ඇති නිල අඩවියට ඔය සබැඳියෙන් යා හැකියි.

අඩි 13 ක් දිග උණුසුම් බියර් පිරුණු තටාක (pools) හතක් ඇත. එක තටාකයක් බියර් පයින්ට් 42,000 ක්; වතුර ලීටර් 12,000 කට බියර්ගෙලාගර් (Biergeläger) යීස්ට් වර්ගයෙන් ලීටර් 300 ක් එකතු කර හැදෙන්නකින් පුරවා ඇත.

ස්ටාර්කන්බර්ග් මාලිගාව වසර 700 ක් පැරණි ස්ථානයකි. එය ජරාවට යද්දී එහි පැරණි ඉස්කාගාරය ඔවුන් බියර් ස්පා එකකට හරවන ලදි. බහින තටාකයේ බියර් උණුසුම්ව තැබෙන නමුත් එහි බැස සිටිය දී බොන්නට සීතල බියර් ඇණුවම් කළ හැකියි.

අතීතයේ දී මෙන්ම එය වර්තමානයේ දී ද පවත්වාගෙන යන්නේ කාන්තාවන් වෙතිනි. මේ සබැඳියෙන් තව එහි ඇතුලත පින්තූර කිහිපයක් බලන්නට පුළුවනි. තුර්කි නාන කාමර විලාසිතා අනුගමනය කරමින් මෙහි ඇතුලත නිම කර ඇත. බටහිර යුරෝපීය රටවල, විශේෂයෙන්ම ජර්මනිය සහ ඔස්ට්‍රියාව රටවල දී ස්පා නිවාඩුවක් යෑම වෛද්‍යවරයෙක් විසින් අනුමත කරන්නේ ද එහි වැය සෞඛ්‍ය රක්ෂණයෙන් ගෙවනු ලබන්නකි. එම සබැඳියම පුරාතන ඊජිපත්තුවේ ක්ලියෝපැට්‍රා විසින් බියර් වලින් නෑවා යැයි ද එයින් පුනර්ජීවයක් ලැබෙනවා යැයි පැරැන්නන් විශ්වාස කළා යැයි ද සඳහන් කරයි. රූමත් ක්ලියෝපැට්‍රා නාපු දේවල් වල ලැයිස්තුවට මී පැණි, එළු කිරි, ඇඹුල් කිරි, කංකුම (saffron) යනාදිය ද ඇතුලත්ය.

එය ජනප්‍රිය ස්ථානයක් නිසා තටාකයක් එක පුද්ගලයෙකුට ඩොලර් 298 ක මුදලකටත්, අමතර පුද්ගලයෙක් සඳහා ඩොලර් 6.50 ක් බැගින් ද ගෙවා කළින් වෙන් කරවා ගත යුතුයි. පැය දෙකක් එහි බැස ඉන්නට ලැබෙද්දී කන්නට අමතර ගාස්තුවක් නැතිව බියර් ක්‍රැකර් ද, ඒවායේ තවරා කන්නට “ටයිරෝලියන් මස් ස්ප්‍රෙඩ්” එකක් ද ලැබේ. ගෙදර ගෙනියන්නට තමන් නාපු බියර් පෙණ ඇති බෝතලයක් ද එහි බැස සිටි සෑම පුද්ගලයාටම බැගින් ලැබේ.

තටාකයේ ඇති බියර් බීම අවදානම් සහිත යැයි අනතුරු අඟවති!!!

ඔස්ට්‍රියාවේ ෆ්‍රැන්කින්ග් හි දී Landhotel Moorhof නමින් ඇත්තේ බියර් බැරල් විදියට හදා ඇති බියර් වල දෙන්නෙකුට බැගින් බැස සිටින්නට හැකි සංචාරක ස්පා ස්ථානයකි.

ජර්මනියේ නුසෙල් හි දී Landhotel Kummerower නමින් ඇත්තේ නුසෙලර් ක්ලොස්ටර් බියර් ඉස්කාගාරයට නුදුරින් සුව පහසුවට බියර් බොමින් සිටිය හැකි, ස්පා පහසුකම් ලබාගත හැකි කුලියට ගන්නට පුළුවන් කාමර වෙති. නුසෙලර් ක්ලොස්ටර් ඉස්කාගාරය සුප්‍රසිද්ධ බිව්වාම වයසට නොයන බියර් වලටයි!!! එය වසර 400 ක් පැරණි ඉස්කාගාරයකි. 12 වැනි සියවසේ තාපසාරාමයක් පැවති ඉඩමක එය ඉදිකර ඇත. සෞඛ්‍ය හා ආයුෂ වැඩිකරනවා යැයි කියන දේවල් ඔවුන්ගේ බියර් වලට දමා ඇතැයි කියැවේ. නාන්නට ගැනීම පිණිස විශේෂයෙන්ම හැදූ බියර් වර්ගයක් ඔවුන්ගේ බියර් ස්පා හි දී භාවිතයට හදා ඇතත් ස්ටාර්කන්බර්ග් මාලිගාවේ බියර් තටාක සේ කට්ටියකට ගිහින් බැස නාන්නට තටාක හැදූ තැනක් ලොව වෙන නැත.

අරක්කු බියර් බදු වැඩිකරපු නිසා ඒවායේ මිල ඉහළ ගිය ලද සති අන්තයක මෙම සටහන දැමීම ගැන මගේ බලවත් කණගාටුව!!!!! :)

ඒ අස්සේ අද රුසියාවේ පැවැත්වූ ප්‍රථම ග්‍රාන්ඩ් ප්‍රී තරඟයෙන් ජයගත් ලුවිස් හැමිල්ටන්ට ජයවේවා!!! ව්ලැඩමියර් පූටින් ද ඔහුට අතට දී සුබ පැතුම් පිරිනැමුවේය. රැසියාවේ ග්‍රාන්ඩ් ප්‍රී පටන් ගැනීමට හැකියාව ලැබුන අපූරැ වෙළඳපොල තවත් අගයමි, එහි ගුණ වයන්නට තවත් වෙහෙසෙමි. :)

සත්‍ය චේ ගුවේරා කවුදැයි හෙළිදරව්ව

Posted in Uncategorized by arunishapiro on ඔක්තෝබර් 9, 2014

che

අර්නෙස්ටෝ ‘චේ’ ගුවේරා මිය ගියේ 1967 ඔක්තෝබර් 9 වැනි දිනයි. මීට කළින් චේ ගුවේරා ගැන ලියූ සටහන් මෙතැනින්, සහ මෙතැනින් කියවත හැකියි.

1964 දෙසැම්බර් 11 වැනිදා එක්සත් ජාතීන්ගේ මහා රැස්වීම අමතන්නට චේ නිව් යෝර්ක් නගරයට පැමිණියේය. දිග වැසි කබායක් සහ  රතු තරුවක් සහිත බෙරෙ තොප්පිය ඇදේට පැළඳගත් ඔහුගේ ආරක්ෂාවට පොලීසිය යොදවා තිබිණ. අසලබඩ නිව් ජර්සි හි පදිංචි කියුබාවෙන් පිටමං කරන ලද්දවුන් “ඝාතකයා!” කියමින් චේ ට එරෙහිව උද්ඝෝෂණ කරන්නට පැමිණ සිටියහ. චේගේ ආරක්ෂාවට නිව් යෝර්ක් හි පොලීසිය සීරුවෙන් සිටියහ.

එක්සත් ජාතීන්ගේ ගොඩනැඟිල්ල අසල රොබට් කොනොලි නම් නිව් යෝර්ක් පොලිස් නිලධාරියා සේවයේ යෙදී සිටියේය. ග්ලැඩිස් පේරේස් නම් කාන්තාවක් ස්පාඤ්ඤ බසින් මොර දෙමින් චේ ට පිහියෙන් අනින්නට පොරකද්දී රොබට් සහ තවත් පොලිස් නිලධාරියෙක් නියපොතු සීරුම් සහ හපාකෑම් විඳගෙන ඇය අතින් පිහිය ඉවත් කරන්නට සමත් වූහ.

එක්සත් ජාතීන්ගේ මහා රැස්වීමේ දී චේ ගුවේරා සිය කතාව පැවැත්වීය. “ඝාතන?” ඔහු මඳක් නිහඬ වූයේ එය අසන්නන් සිත් තුල කිඳා බසින තෙක්ය. “සහතිකයෙන්ම, අපි ඝාතන කරනවා!” ඔහු කියා සිටියේ ඒ මහා සභාවේ අත්පොළසන් නාදය මැද්දේය. “අපි දිගටම ඝාතන කරගෙන යනවා එහි අවශ්‍යතාවය ඇති තාක් කල්. මෙය අරගලයේ හතුරන්ට එරෙහිව මරණය දක්වා කරන සටනක්!” යැයි ඔහුගේ වදන් සභා ගර්භය තුල රුව් දුනි.

කොමියුනිස්ට්වාදයේ කළු පොත යැයි හැඳින්වෙන්නෙහි ඒ ගැන පර්යේෂණ පවත්වන ලද්දවුන් විසින් සටහන් තබන පරිදි ඒ දශකය අවසන් වෙද්දී 14,000 ක් කියුබානුවන් නීතිමය ක්‍රියාදාමයකින් තොරව ඝාතනය කරන ලදි.

එදා චේ ගුවේරා එසේ කියද්දී අත්පොළසන් දුන් එක්සත් ජාතීන්ගේ සංවිධානය පසු කලක දී ස්ලොබොඩාන් ම්ලෝසවිච් අටදාහක් මරන්නට අණ දුන්නා කියා ඔහු සමූල ඝාතකයෙක් යැයි නම් කළහ.

එක්සත් ජාතීන්ගේ සංවිධානය බටහිර රටවල කැමැත්ත අනුව කටයුතු කරනවා යැයි සමහර අය සිතති. එක්සත් ජාතීන්ට තිබෙන ඔවුන්ටම ආවේනික වූ හැදියාව කුමක්දැයි මේ අය සොයා බලන්නට නොදනිති.

චේ ගුවේරා එදා එක්සත් ජාතීන් ඉදිරියේ දී මෙසේ ද කියයි, “එක්සත් ජනපදයේ ආණ්ඩුව නිදහස වෙනුවෙන් පෙනී සිටින්නක් නොවේ, එය එරටේම ජනගහණයෙන් විශාල කොටසක් සහ ලෝක ජනතාව පීඩනය කරන සහ සූරා කන්නකි!” අත්පොළසන් නාදය සහ හුරේ දැමිල්ල තවත් වැඩිවේ. යැංකි අධිරාජ්‍යවාදය “කරකියාගත නොහැකිවුන්ව ගිල දමන මාංශ භක්ෂක සතෙක්,” කියද්දී තවත් ප්‍රීති ඝෝෂාවක් සභාවේ පැතිර යයි.

නිව් යෝර්ක් නගරයේ චේ ගෙව්වේ දවස් අටක් පමණි. එහෙත් ඔහුව හමුවෙන්නට ආ අය සියල්ලන්ම තම අපේක්ෂා ඉටුකර නොගත්හ. ලීසා හවර්ඩ් නම් හොලිවුඩ් නිළිය තම මෑන්හැටන් පෙන්ත්හවුස් හි චේ සහ ඩෙමොක්‍රැටික් පක්ෂ සෙනෙට්වරයෙක් සඳහා සාදයක් පැවැත්විය. නිව් යෝර්ක් ටයිම්ස් සඟරාව ඔහුව සම්මුඛ සාකච්ඡාවකට සහභාගී කරගති. “නිදහසේ පාර යන්නේ බුලට් මැදින්,” යැයි චේ එහි දී කීය.

චේ හමුවන්නට පැතූ මැල්කම් X ට ලියන ලද පණිවිඩයක් පමණක් ලැබිණ. මැල්කම් X හාලම් හි ඔඩොබොන් බෝල්රූම් එකට රැස්වූ ජනතාව සමඟ ඒ ලියුම හැර “මේක චේ ගුවේරා වෙතින්,” යැයි කියද්දී ප්‍රීති ඝෝෂාවෙන් ශාලාව දෙදරුම් දුනි. “ඔබත් සමඟ එකතුවෙන්නට ලැබුනා නම් හොඳයි බ්‍රදර් බාබු .. ඒත් කියුබන් ජනතාවගේ සහ විශේෂයෙන්ම ෆිඩෙල්ගේ උණුසුම් සුබ පැතුම්!” යැයි චේ එහි මැල්කම් X ට ලියා තිබිණ.

නිව් යෝර්ක් හි රොකෆෙලර්ලා සහ හොලිවුඩ් නිළියන් සමඟ ගැවසෙන අස්සේ චේ ලිබර්ටි ප්‍රතිමාව, ලිබර්ටි සීනුව සහ වොෂිංටන් ස්මාරකය යනාදිය පුපුරැවා හරින බෝම්බ ප්‍රහාර කළු ජාතිකයන්ගේ නිදහස් බලඇණියක් සමඟ සැලසුම් කරන්නට ද කාලයක් සොයාගෙන තිබුණු බව නිව් යෝර්ක් පොලීසිය, FBI, සහ කැනඩාවේ අශ්වයන් මත නැඟගත් රාජකීය පොලිස් හමුදාව විසින් සොයා ගන්නේ තවත් මාස කිහිපයකට පසුවයි.

එහෙත් මෝඩකම චේතනාවක් වූ ලෝකයක එයින් මිදෙන්නට නොව එහි ඇලී ගැලී සිටින්නටම මිනිසා පෙළඹෙයි.

2004 දී නිව් යෝර්ක් මහජන පුස්තකාලයේ ඇති තෑගි කඩයේ චේ ඔරලෝසු විකුණන ලදි.

2005 දී “හාවානා හි සාහිත්‍ය” නමින් උත්සවයක් නිව් යෝර්ක් මහජන පුස්තකාලයේ දී ම පැවැත්විණ.

නිව් යෝර්ක් පුස්තකාලයේ අය එවැනි තීරණ ගන්නේ මෝඩකම චේතනාවක් කරගෙනයි.  ජෝර්ජ් ඕර්වෙල් ගේ “1984” ප්‍රබන්ධය කියවන්නට දීම යනු කඩාකප්පල්කාරී අදහස් බෙදා හැරීමක් කියා කැස්ත්‍රෝගේ කියුබාවේ ඒ වරදට වසර 25 ක් සිරබත් කන පුස්තකාලාධිපතිවරු දහ දෙනා ඔවුනට සිහිවෙන්නේ නැත. 2004 දී සිරබත් කන ඔවුන් 10 දෙනා සමඟ සිරබාරයේ සිටින තවත් 65 ක් නිදහස් කරන්නට යැයි ඇමෙරිකන් පුස්තකාල සංගමය එක්සත් ජාතීන්ගේ මානුෂික අයිතිවාසිකම් කොමිසමෙන් ඉල්ලා සිටියේය.

එදා “සහතිකයෙන්ම, අපි ඝාතන කරනවා!” කියද්දී චේ ගුවේරාට ශාලාව දෙදරන්නට අත්පොළසන් දුන්නේ එක්සත් ජාතීන් විසිනි. මෙදා එක්සත් ජාතීන්ගේ මානුෂික අයිතිවාසිකම් කොමිසම ප්‍රබන්ධයක් බෙදා හැරි නිසා සිරබත් කන දහ දෙනෙක් නිදහස් කරන්නට යන ඉල්ලීම නොසලකා හැර කැස්ත්‍රෝ ගැන කිසිත් වරදක් නොකියා මුනිවත රකිති.

බුද්ධි හීන ලෝකයක බුද්ධිමතෙක් ජීවත් වන්නේ කෙසේද?

උම්බෙර්ටෝ ෆොන්ටොවා 2007 දී ලියන ලද “සත්‍ය චේ ගුවේරා කවුදැයි හෙළිදරව්ව: සහ ඔහුට අතිශයින් ඇලුම් කරන ප්‍රයෝජනවත් මොට්ටයන්” පොත ඇසුරිනි.

බලකාමය සහ මෝඩකම යන දෙකම හොඳ චේතනා නොවේ

Posted in Uncategorized by arunishapiro on ඔක්තෝබර් 2, 2014

Photographer: Lakruwan Wanniarachchi

Photographer: Lakruwan Wanniarachchi

තමන් උඩුගං බලා පිහිනනවා යැයි පාරට්ටු බාන අය හිටියාට හැම පැත්තකින්ම දකින්නට ලැබෙන්නේ ගලන අතටම අනිකුත් අයටත් වඩා වේගයෙන් පිහිනන අයයි. වෙනසක් ගෙනෙනවා යැයි පොරොන්දු වෙන සියල්ලන්ම පෙනී සිටින්නේ අනුන්ට නීති හදන අසාර්ථක ක්‍රමයේය.

සාමූහිකත්වය අගයන මිනිස්සු ඇයි මේ උඩුගං බලා යනවා යැයි කියාගත්තාව වීරයෙක් සේ දකින්නේ යැයි ද තවත් අවුලකි!!!!

හතුරෙක් මවා පාමින් කල්ලියේ බලය තමන් අතට ගන්නට උත්සාහ කළ බලලෝභින් බ්‍රිතාන්‍ය යටත්විජිතයෙන් මුලින්ම ගැලවුන ඇමෙරිකාවේ ද සිටියහ. එහෙත් 1796 දී “ව්‍යාජ ජාත්‍යාලය මවා පාන රැවටීම්කරුවන්ගෙන් ආරක්ෂා වෙන්න,” යැයි කියූ ජෝර්ජ් වොෂිංටන් වැන්නෙක් 1948 ලංකාවේ නොසිටියේය. 1787 දී ව්‍යවස්ථා සමුළුවේ අවසන් වාද වටය නිම වී නිදහස් ශාලාවෙන් පිට වී යන බෙන්ජමින් ෆ්‍රෑන්ක්ලින් වෙතින් කාන්තාවක් “ඉතින් ඩොක්ටර්, අපිට ලැබුනේ මොකක් ද, ජනරජයක් ද රාජාණ්ඩුවක් ද?” යැයි විමසීය. ඔහුගේ පිළිතුර වූයේ “ජනරජයක්, අපට තියාගන්නට හැකිනම්,” කියායි.

නිදහස යන්න ව්‍යවස්ථාවක ලිව්වාට, සම්මත කරගත්තාට ඉබේ ආරක්ෂා වෙන්නේ නැත. එක පුද්ගලයෙකුගේ නිදහස කප්පාදු වෙන සෑම අවස්ථාවකම සමාජයක සියළු සාමාජිකයන්ගේ නිදහස ද කෙමෙන් කප්පාදු වෙන්නට පටන් ගනියි. ඒ නිසා නිදහස ආරක්ෂා කරගන්නට නම් නිතර දෙවේලේ විමසිල්ලෙන් සිටිය යුතුයි. නැත්නම් ජනරජයක දීත් රාජාණ්ඩුවක ලෙස ක්‍රියාකරන අයව ඊට අකමැති ජනතාව විසින්ම පත්කර ගෙන ඇතිබව දකින්නට ලැබේ.

මම අකැමති නිසා පමණින් යම් දෙයක් කරන්නට වෙනකෙකුට නිදහසක් මම නොදෙන්නේ නම්, ඔහු අකමැති වූ මම කැමති දෙයක් මට කරන්නට ද නිදහසක් සාමකාමීව ලැබෙන්නේ නැත. ඒ කෙසේදැයි වටහාගත හැකියාව නැතිවෙද්දී, නිදහස නිසා දෙදෙනාගේම ජීවිත යහපත් වෙන ආකාරය වැටහෙන්නේ නැත. ඉතින් දෙදෙනාගේම නිදහස කප්පාදු කරන්නට අහක ඉන්න බලලෝභීයෙක්ට බලය අල්ලාගත හැකියාව ලැබේ.

මිනිස් වර්ගයාගේ ප්‍රගතිය අනිවාර්යෙන්ම සිද්ධ වන්නක් නොවේ. ඉතිහාසයේ අඳුරු යුගයන් බොහොමයකි. ආයුෂ දීර්ඝ වීම, දැනුම වර්ධනය, වළක්වාගත හැකි රෝගාබාධ අඩුවීම, උප්පත්තියේ දී ම මිය යන සංඛ්‍යාව පහළ යෑම, මන්ද පෝෂණයෙන් පෙළෙනවුන් අඩුවීම යනාදිය ක්‍රමානුකූලව යහපත් පැත්තට පමණක් ගමන් කරන ලද ඉතිහාසයක් මිනිසාට නැත. සමහර යුගයන් හි දී මිනිසා වේගයෙන් ප්‍රගතිය සාක්ෂාත් කරගත්තෙකි. තවත් කාල වකවාණු වල දී කළින් ලැබූ දියුණු තත්වයන් බොහොමයක් වේගයෙන් අහිමි කරගත්තෙකි.

සම්මාදිට්ඨිය යනු තමන් විසින් වටහා ගත යුත්තකි. එහෙත් සිංහල බෞද්ධයන් අද පෙනී සිටින්නේ අනුන්ගේ සම්මාදිට්ඨිය කුමක් විය යුතුදැයි තීරණය සඳහා නම් ඔවුන් බෞද්ධයන් ද?

චතුරාර්ය සත්‍යයක් හැටියට දුකට හේතුව තණ්හාව යැයි බුදුන් වදාළහ. ධනවතාට ඔහුගේ වස්තු සම්පත් වලට තණ්හාවක් ඇතැයි කියා ඒවා බලහත්කාරයෙන් උදුරාගෙන දුප්පතුන්ට බෙදා දෙන්න යැයි බුදුන් වදාළේ නැත. තමන්ගේ පියරජු ලවා රටවැසියන්ට නීති හදන්නට නොව බුදුන් වෙහෙසුනේ එක එක පුද්ගලයාට ධර්මය කියා දෙන්නටයි. ධර්ම සංගායනා පැවැත්වූයේ ධර්මය පැහැදිලි කරගන්නටයි. නැතිව රටේ නීති මොනවාදැයි තීරණය කරන හෝ ඒවාට බලපෑම් කරන බලය අල්ලා ගන්නට නොවේ.

ධනවතාට ඔහුගේ වස්තු සම්පත් වලට තණ්හාවක් ඇතැයි ගිරව් මෙන් කියන අයට බලලෝභය ද තණ්හාවක් බව වටහා ගැනීම ඉතා අසීරු ඇයි?!!!!

මේ අනගාරික ධර්මපාලගේ 150 වැනි ජන්ම සංවත්සර වසරයි. ඒ අනුස්මරණ දේශනයක දී මහාචාර්ය ජේ. බී. දිසානයක විසින් කියන ලද්දක් ලංකාවේ ඉංග්‍රීසි පුවත්පතකින් කියැවීමි. බුද්ධ ශාසනය නඟාලීමටත්, ලෝකයට බුදු වදන ගෙන යාමටත් අඩුම වශයෙන් තව 25 වතාවක් හෝ නැවත ඉපදෙන්නට කැමැත්තක් අනගාරික ධර්මපාලට තිබුණාලු. ඉතින් අප්පමාදෝ අමතපදං යන්න වටහා නොගෙන බුදු දහමේ චිරස්ථායී බව වෙනුවෙන් පෙනී සිටි අනගාරික ධර්මපාල වීරයෙක් වූ බෞද්ධයන් තමන් නිවන් දැකීම කල් දානවා යැයි කියන බවක් ඇහෙද්දී එය පුදුමයක් නොවේ.

එසේම සම්මාදිට්ඨිය ප්‍රතික්ෂේපය නිසා බුද්ධාගම කුමක්දැයි අමතක වී ඇති රටක වැසියන් නිවන් දැකීම කල් දැමීම කරන්න පුළුවන් ද බැරි ද ගැනත් සංවාදයක් ගෙන යනවා ඇසීමත් පුදුමයක් නොවේ!!!!!

මියන්මාරයේ මුස්ලිම් වැසියන් ඝාතනය කළ 969 සංවිධානයේ නායක අශාන් විරතු ද අනුන්ට හොඳ මොනවාදැයි තීරණ ගන්නට තණ්හාධික වූ බලලෝභියෙකි. බුද්ධාගමේ සහ මුස්ලිම් ආගමේ අය අතර විවාහ වලට අවසර නොදෙන්න යැයි නීති ගෙනෙන්නට යෝජනා කරන, රොහින්ග්යා මුස්ලිම් වැසියන් වෙනත් රටකට පිටමං කරන රාජ්‍ය සැලැස්මකට පක්ෂ වූ, මුස්ලිම් ව්‍යාපාර වර්ජනය කරන්න යැයි පෙනී සිටින්නෙකි.

වස්තු සම්පත් ලෝභී තණ්හාධික ධනවතා ඉන් තම නිවන කල්දමා ගත්තෙකි. ඔහු වස්තු ගොඩගහන්නට රටේ නීති කඩා ඇත්නම් ඔහුව සිරගෙදරට යැවිය හැකියි. එහෙත් අනුන්ට නීති හදන බලලෝභී තණ්හාධිකයෙක් නූගත් ජනතාව විසින් වීර නායකයන් කරගනිද්දී සිරගෙවල් වලට වැඩියෙන් යන්නේ ඒ නූගත් ජනතාවයි. ජීවිත අහිමිවෙන්නේ ඒ නූගත් ජනතාවටයි.

යුරෝපය යුදෙව්වන්ට සැලකූ ආකාරයෙන් ලෝකයේ බෞද්ධයන් වඳ කරන්නට යන මුස්ලිම් ජනකොට්ඨාශයක් ලොව නැත. ඇමෙරිකාවට ඉස්ලාමීය දේශයක් හදන්නට යන ත්‍රස්තවාදී හතුරා අවශ්‍ය මෙන්, ඉස්ලාමීය දේශයක් හදන්නට යන අයට ඇමෙරිකන් හතුරා අවශ්‍ය මෙන්, සිංහල බෞද්ධයන්ට ද දැන් පොදු හතුරෙක් පෙන්වා අනුන්ට නීති ගෙනන තම බලය වැඩිකරගන්නට යන බලලෝභීන් කොට්ඨාශයක් ලැබී ඇත. එවැනි බලලෝභීන්ව වීරයන් සේ දකිනවා ද නැද්ද යන්න අනුව සිංහල බෞද්ධයන්ගේ අනාගතය තීරණය වෙනු ඇත.

ස්මාට් ෆෝන් අතැති වුවත්, ‘එව බලව’ භාවිතයට නොගන්නේ නම් බෞද්ධ යැයි කියාගැනීම නමට කරන්නක් පමණි. ලොව ආශ්චර්යයමත් තම ඒකීය පුද්ගල මෝක්ෂය සාක්ෂාත් කරගත හැකි පැහැදිලි බෞද්ධ දර්ශනය දායාද වූවත්, “එව බලව” භාවිතයට නොගෙන රැල්ලේ යාමේ හුරැවෙන් ගැලවීම ව්‍යාජ ජාත්‍යාලයෙන් අන්ධ වූවන්ට ඉතා දුෂ්කර වූවකි.

“අවංක එහෙත් රැවටුන පරමාදර්ශීවාදීන්,” හැටියට සාමූහිකවාදීන්ව කිසිවිටෙක සැලකිය නොයුතුයි. අනෙකුත් අය වෙනුවෙන් කියමින් යම් මිනිසුන් පිරිසක් වහල්ලු කරගැනීම පරමාදර්ශයක් නොවේ; එයින් යෝජනා වෙන්නේ කුමක් වුවත් සාහසිකත්වය යනු ‘පරමාදර්ශීය’ වූවක් නොවේ. බලහත්කාරයෙන් “හොඳක් කරන්න’ යන්න හොඳ චේතනාවක් යැයි කිසිවිටෙක සැලකිය නොයුතුයි. බලකාමය සහ මෝඩකම යන දෙකම හොඳ චේතනාවන් නොවේ. -අයින් රෑන්ඩ් “ඇමෙරිකන්වාදයට පෙළපොතක්”

“Do not ever consider collectivists as ‘sincere but deluded idealists.’ The proposal to enslave some men for the sake of others is not an ideal; brutality is not ‘idealistic,’ no matter what its purpose. Do not ever say that the desire to ‘do good’ by force is a good motive. Neither power-lust nor stupidity are good motives” — Ayn Rand in her “Textbook of Americanism.”

**** සටහනේ ඡායාරූපය Foreign Correspondents Association of Sri Lanka හි අවසරයෙන් පළකරන්නකි. ඡායාරූප ශිල්පියාගේ හෝ එම සංවිධානයේ අදහස් නොව මේ සටහනේ අන්තර්ගතය මගේ දැක්මයි.

නැහැ මේ පාර ඒක වෙනස් නැහැ

Posted in Uncategorized by arunishapiro on සැප්තැම්බර් 29, 2014

(Xaume Olleros / AFP / Getty)

(Xaume Olleros / AFP / Getty)

“ඉංග්‍රීසි භාෂාවේ වැඩියෙන්ම වැය අධික වචන හතර “මේ පාර ඒක වෙනස්” -This time it’s different-” යැයි කියා ඇත්තේ සර් ජෝන් ටෙම්පල්ටන් විසිනි.

1912 දී ටෙනසි ප්‍රාන්තයේ ඉපදුන ඔහු යේල් විශ්ව විද්‍යාලයෙන් අධ්‍යාපනය ලබන්නට ටියුෂන් වලින් කොටසක් හොයාගත්තේ පෝකර් සූදු ක්‍රීඩාවෙනි. කොටස් වෙළඳපොලේ ලද ජයග්‍රහණ වලින් බිලියනපතිවරයෙක් වූ ඔහු බිලියනකට වඩා මුදල් සමාජ සේවා කටයුතු සඳහා පරිත්‍යාග කර ඇත. 1964 දී ඇමෙරිකන් පුරවැසිකම අත්හැර දැමූ ඔහු එම ක්‍රියාවෙන්, සිය ජාත්‍යන්තර අයෝජන අරමුදල විකුණා ලැබූ මුදල් වලින් තවත් ඩොලර් මිලියන සීයක් ද පරිත්‍යාග කරන්නට සමත් විය.

“මේ පාර ඒක වෙනස්,” බව මැද පෙරදිග නැවත පටන් ගත් ඇමෙරිකන් යුද්ධ ගැන බහුතරයකගේ මතයයි. විපක්ෂයක් සොයා ගැනීම මේ දිනවල අසීරු වූවකි.

ප්‍රස්තුතයක් සදොස් නම් එය බුෂ්ලා කරද්දී වැරදි වෙන්නේත් ඔබාමා කරද්දී නිවැරදි වෙන්නේත් නැත.

ඉස්ලාම් දේශයක් හදන්නට යන ත්‍රස්තවාදීන් කුරිරු අන්ධ භක්තික උන්මාදයකින් පෙළෙනවුන් යැයි පැහැදිලි කරන්නට අමුතුවෙන් උත්සාහයක් ගැනීම අවශ්‍ය නැත. ඔවුන් සිවිල් වැසියන් අමු අමුවේ මරා දමන රාක්ෂයන්ය.

එහෙත් ඒ නිසා ඇමෙරිකාව රාක්ෂයන් වඳ කරන පරමාර්ථයෙන් යුද්ධයට යෑම අනවශ්‍යයයි. ලෝකයේ තැන් තැන් වල තමන්ගේම සිවිල් වැසියන් අමු අමුවේ මරා දමන රාක්ෂයන් බොහොමයක් සිටියහ. අදත් සිටිති. හෙටත් සිටිනු ඇත. ඇමෙරිකාවට ඔවුන් වඳ කරන බලය (එයට හැකි වූ බවක් මේ තාක් කල් පෙන්වා නැති බවත් පැත්තකින් තියමු!!!!) ලැබෙන්නේ කුමන ආචාර ධාර්මික වගකීමක් යටතේ ද?

නයිජීරියාවේ ඊසාන දිග පිහිටි විශාලතම නගරය සහ බොර්නෝ ප්‍රාන්තයේ අගනගරය වූ මයිදුගුරි “සාමයේ නිවස” යන ජනප්‍රිය නාමයෙන් හැඳින්වෙයි. මුස්ලිම් අය විසින් මුස්ලිම් නොවන අයව සමූලඝාතනය 1960 ගණන් හා 70 ගණන් සිට සිද්ධ වෙන්නකි.

2009 ජූලි මස එහි දී බොකො හරාම් ඉස්ලාමීය ත්‍රස්තවාදී සංවිධානය විසින් 700 ක් පමණ පිරිසක් ඝාතනය කළහ. 2003 ජූනි 18 වැනිදා පාසැලකට කඩා වැදුනු බොකො හරාම් විභාගයට පෙනී සිටින සිසුන්ට පහර දී නව දෙනෙක් මරා දැමූහ. ග්වාසා සහ බාමා ඇතුළු යාබද තවත් නගර කිහිපයක් දැන් ත්‍රස්තවාදීන්ගේ යටතේ පවතී. ඔවුන්ගේ අරමුණ මයිදුගුරි අල්ලා ගැනීමයි. එය අල්ලා ගත්තොත් නයිජීරියාවේ ඊසාන දිග කලාපය සම්පූර්ණයෙන් බොකො හරාම් අතට වැටේ. මයිදුගුරි හි මහජන පාසැල් වසා දමා ඇත. අන්තර්ජාතික රාජ්‍ය නොවන සහ ආධාර සපයන සංවිධාන පළාත අත්හැර දමා ගිහින් ඇත්තේ බොහෝ කලකට පෙරයි. වගා කටයුතු නැවතුන නිසා ආහාර මිල ඉහළ නැඟ ඇත.

1994 අප්‍රේල් 7 දා සිට ජූලි මැද තෙක් දවස් සීයක පමණ කාලයක් තුල දී ලක්ෂ පහක් සහ මිලියනයක් අතර රුවන්ඩාවේ වැසියන් සමූල ඝාතනය කෙරිණ. ඒ රටේ මුළු ජනගහණයෙන් 20% ක් පමණ. එවක රැවන්ඩාවේ ජීවත් වූ ටුට්සි ජනතාවගෙන් 70% ක් පමණ මිය යද්දී ඇමෙරිකාව නිකම් බලාගෙන සිටියේය. එවක නැති වගකීමක් එක මාධ්‍යවේදියෙකුගේ (යුද පවතින තැන්වල සිට වාර්තා කරන්නට යන්නේ අනතුරුදායක තත්වයක් නැතැයි සිතන වාර්තාකරුවන් ද?!!!!) හිස ගසා දැමීම නිසා හදිසියේම පහළ වී ද?

ඒ කාලයේ දී ම උතුරු කොරියාවේ දිනකට මිනිසුන් දෙදහසක් පමණ මරා දැමිණ. වසර තුනක කාලයක දී මිලියන 3.5 ක කොරියන් ජීවිත අහිමි වූ අතර අන්තර්ජාතික ආධාර සහ මුළු උතුරු කොරියාවටම කන්න දෙන්න ආහාර යැව්වත් ඔවුන්ගේ නායකත්වය එම අරමුදල් හමුදාව ශක්තිමත් කරන්නට යොදාගත් බව කියැවේ. උතුරු කොරියානුවන් තම කුරිරැ පාලකයන් වෙතින් බේරාගත යුතු මනුෂ්‍යයන් නොවේ ද?!!!!

Shin Dong-hyuk උපදින්නේ ශ්‍රම සිරකඳවුරකයි. හාමතයෙන් හා වධහිංසා වලින් පීඩා විඳින සිරකරුවන් උතුරු කොරියාවේ දෙලක්ෂයකට අධික සංඛ්‍යාවක් සිටින බව නිදහස සොයා නොව බඩගින්න නිවාගන්නට ඒ සිර කඳවුරෙන් පැන ආ ෂින් කියයි. සිරකරුවන් අතර තුනෙන් එකක් දරුවන් වෙති. ඒ දරුවන් ගැන දුක්වෙන ලෝක ජනතාවක් නැත්ද?

2013 දී සෝමාලියාවේ මොගාදිෂූ හි එක්සත් ජාතීන්ගේ කාර්යාලය ළඟ දී මරාගෙන මැරෙන බෝම්බකරුවෙක් මිනිස් ජීවිත 15 ක් ඝාතනය කරන්නට සමත් විය.

මේ වසරේ අගෝස්තු මාසය තුල දී සවුදි අරාබිය විසින් සෑම දිනකටම එක මිනිසෙකු තරම් ආසන්න ප්‍රමාණයක් මරා දමන්නේ නීති සම්පාදනය තමනට පවරාගත් ඔටුනු පැළඳි ලෝකයක මරණ දණ්ඩනය ක්‍රියාත්මක කිරීමෙනි.

ඉරකායේ, පාකිස්තානයේ, යෙමෙන් හි එකිනෙකා හා යුද වදින කල්ලි විසින් හිස් ගසා දමමින් මිනිසුන් මරණ හැටි සොයාගන්නට අවශ්‍ය ඕනෑම අයෙකුට (චීනයේ දී හැර) අද තම ස්මාට් ෆෝන් එකෙන් පුළුවනි. අනෙක, දිනන්න බැරි යුද්ධ වලට තවමත් යනවා නම්, නිදහස් මිනිස්සු බලලෝභීන් අතින් මැරෙන්න කළින් බේරාගන්න යනවා නම්, එහෙනම් ඇයි හොංකොං වැසියන් වෙනුවෙන් වහාම ඇමෙරිකන් හමුදාවක් යවන්න බැරි?!!!!

බටහිර ආක්‍රමණිකවාදය සහ බටහිර කුමන්ත්‍රණවාදය ගැන කියන්නට පසුබට නොවෙන, තමන් උඩුගං බලා පිහිනනවා යැයි කියාගත්තවුන් ද, ඒවා ගැන කිසිත් නොකියා ඒත් ඉස්ලාමීය දේශය හදන්නට යන අය නැතිභංග කරන්නට සිරියාවට ගහන එක අවශ්‍ය යැයි ද, කමක් නැතැයි ද, කියති.

ජනතා හතුරෙක් නැත්නම් හතුරාගෙන් ජනතාවගේ ආරක්ෂාව සලසන නායකයා තමන් යැයි කියාගන්නට ද නොහැකියි. බුෂ් පුතාට ත්‍රස්තවාදී හතුරෙක් අවශ්‍ය වූවා සේ බරක් ඔබාමාටත් ත්‍රස්තවාදී හතුරෙක් අවශ්‍යයයි. ඉස්ලාමීය දේශයක් හදන්නට යන අයව මුලිනුපුටා දමන්නට යැයි ඇමෙරිකාව මුල් වී යුද්ධයක් පටන් ගත්තාම, ඔවුන්ටත් ඇමෙරිකන් හතුරා ලැබේ.

ඉස්ලාමීය දේශයක් හදන්නට එකතු වෙන අයට වැඩියෙන් ලෝකය පුරා ඇමෙරිකන් හතුරාට එරෙහිව සටන් කරන්නට එකතු වෙන අය හැමදාම වැඩියි.

ඉතින් ඇමෙරිකන් හතුරා නිසා දැන් ඔවුන්ගේ සංවිධානයට වැඩි අවධානයක් ද, ඒ නිසාම ඔවුනට වැඩියෙන් ආධාර මුදල් එකතු කරගන්නට ද අවස්ථාව පෑදේ.

බුෂ් තාත්තා වේවා, බිල් ක්ලින්ටන් වේවා, බුෂ් පුතා වේවා, නොබෙල් සාම තෑග්ග දිනාගත් බරාක් ඔබාමා වේවා, අනුන්ට නීති හදන්න කැමති බලලෝභීන්ට අවශ්‍ය හතුරෙක් සොයාගන්නටයි. ලෝකයේ බියකරු මුස්ලිම් අන්තවාදයක් පැතිරෙනවා යැයි බටහිර රටවල බලලෝභීන් කියද්දී ලංකාවේ ද මුස්ලිම් අන්තවාදයක් පැතිර යනවා යැයි කියන්නට ලංකාවේ බලලෝභීන් ද පෙරට එති. ඒ කිසිවෙකුට තමන්ගේ අන්තවාදීග්‍රාහීත්වය දකින්නට නොහැක!!!!!!

වැරද්ද ඇත්තේ අයෙක් අන්තවාදයක එල්බ සිටීම ද?

වැරැද්ද ඇත්තේ අන්තවාදයක් පෙරටු කරගනිමින් මිනිස් ජීවිත හිංසනයට එළඹීම ද?

ඉස්ලාමීය දේශයක් හදන්නට යන ත්‍රස්තවාදීන් සම්පූර්ණයෙන්ම හා පරම වශයෙන්ම භූමි කොට්ඨාශයක හිර වී සිටින සහ හතුරන් විසින් වටකරගත් කොටසකි. ඔවුන් විසින් ආක්‍රමණය කර පාලනය කරන බටහිර ඉරාකයේ සහ නැගෙනහිර සිරියාවේ සුන්නි අරාබි වැසියන් ඔවුන්ට ද්වේශ කරන සහ ඔවුන්ව නැති කර දමන්නට වඩාත්ම කැමති පිරිසයි. භූමියේ පිහිටීම සහ වටේම ඉන්නා හතුරන් නිසා මේ ත්‍රස්තවාදීන්ට වැඩි කාලයක් එහි පැවත්ම ආරක්ෂා කරගත නොහැකියි. නමුත් ඇමෙරිකන් හතුරෙක් එද්දී, ලෝකයේ වෙන තැන් වල සිටින ඇමෙරිකන් හතුරන් ද ඔවුන් සමඟ අත්වැල් බැඳ ගැනීම එදත් සිද්ධ විය. අදත් සිද්ධ වේ. හෙටත් සිද්ධ වෙනු ඇත.

ඇමෙරිකාව සිරියාවට බෝම්බ දැමීම හරි හොඳ වැඩක් කියමින් දැන් හුරේ දමන අය, ඒ ඉස්ලාමීය දේශයක් හදන්නට යන ත්‍රස්තවාදීන්ට අවශ්‍ය වූයේ ද ඇමෙරිකාවේ හතුරෙක් වී ඇමෙරිකාවේ අනෙකුත් හතුරන්ගේ සහාය ලබාගන්නට බව නොදැක්කා සේ සිටිති.

ඕවා ඇමෙරිකාව පටන් ගත්තු මැදිහත්වීම් වල ප්‍රතිඵල යැයි කීම තවත් අමනෝඥ හැදියාවකි. මේ තත්වය 99.9% ක් ඇමෙරිකාවේ වරද යැයි 100% ක් පැහැදිලි නම් ස්කොට් හෝර්ටන් පෙන්වා දෙන්නේ, ඊ ළඟ යුද්ධයෙන් පහුගිය යුද්ධයේ වැරදි විසඳේවි යැයි කියමින්, මේ පාර ඒක වෙනස් නොකියා, මැද පෙරදිග මැදිහත්වීම් වලින් ඇමෙරිකාවට අයින් වී සිටීමට වඩාත්ම සුදුසු අවස්ථාව මේ දැන් යැයි කියායි.

“බඩු භාණ්ඩ මායිම් ඉක්මවා නොයන විට, සොල්දාදුවන් එසේ යනු ඇත.” -ෆ්‍රෙඩරික් බැස්ටියාට්

බඩු භාණ්ඩ මායිම් ඉක්මවා යා යුත්තේ ආණ්ඩු අතර ගහන ගිවිසුම් වලින් නොව වෙළෙන්ඳන් අතර ගහන ගිවිසුම් වලින් බව බැස්ටියාට් පෙන්වා දුන්නේය.

ඕනෑ වේලාවක ඕනෑ තරම් නිවාඩු ගන්න

Posted in Uncategorized by arunishapiro on සැප්තැම්බර් 27, 2014

richard_necker_hammock

ධනපතියන් භංගවේවා නොකියා ධනපතියන්ට සේවා සපයා ඩොලර් බිලියන පහක වත්කමක් උපයන්නට සමත් වූ රිචඩ් බ්‍රැන්සන් බ්‍රිතාන්‍ය ජාතිකයෙකි. වර්ජින් ගෲප් නමින් හැඳින්වෙන්නේ නොයෙක් ක්ෂේත්‍රයන්ට විහිද ගිය ඔහුගේ ව්‍යාපාරික උත්සාහයන් එකතුවෙන් හැදෙන කොම්පැණියයි.

බ්‍රැන්සන්ගේ අලුත්ම අත්හදා බැලීම තමන්ගේ ආයතන වල සේවකයන්ට ඕනෑම වේලාවක ඕනෑ තරම් නිවාඩු ගැනීමට ඉඩදීමයි. නිවාඩු ගන්නවාද නැද්ද යන්න සේවකයාට තීරණය කරන්න ඉඩ දුන්නාම දවසේ පැය කිහිපයක් නිවාඩු ගන්නවා ද, සතියක් නැත්නම් මාසයක් නිවාඩු යනවා ද යන්නත් එයාටම තීරණය කරන බලය පැවරීමට අදහස් කරන බව ඔහු කියා සිටී.

කොම්පැණියකට අගයක් එකතු කරන්නේ කෙසේදැයි තෝරාගැනීම ශ්‍රමිකයා අතට පවරද්දී ඒ ශ්‍රමිකයා රස්සාවේ ආරක්ෂාව (ජොබ් සෙකියුරිටි) සැලසෙන්නේ තම කාර්ය සදාචාරය නිසා යැයි අවබෝධයෙන් සිටිය යුතුය. සේවා යෝජකයා සහ සේවා දායකයා අතර මැද්දට පැන නීති දාන ආණ්ඩු සහ යුනියන් සංගම් බලයෙන් ජොබ් සෙකියුරිටි ලැබෙනවා සිතන අය කාර්ය සදාචාරය කුමක්දැයි නොදනිති.

ඇමෙරිකන් සමාගමක් වන නෙට්ෆ්ලික්ස් එවැනි නිවාඩු ප්‍රතිපත්තියක් ගෙන යන බව තම දියණිය කියද්දී ඔවුන් මෑත කාලයක ලද ප්‍රගතිය අසා තමන් ද එය අත්හදා බලන්නට යන බව බ්‍රැන්සන් දන්වයි.

නෙට්ෆ්ලික්ස් පමණක් නොව දැන් කාලයක පටන් ඇමේසන් වැනි බොහෝ ඇමෙරිකන් සමාගම් ඔවුන්ගේ පරිගණක අංශයේ සේවය කරන අයට ගෙදර හෝ තමන් කැමති ස්ථානයක සිට වැඩ කිරීමට ඉඩ දී තිබුණි. වැඩ කරන කාල සටහන් ඉල්ලා නොසිටියහ. ටයි පටි පැළඳ ගෙන මහමඟට කාලය වැය කර වැඩපොළකට යාම වෙනුවට ගෙදර ඇඳුමින් සැරසී තමන්ගේ නිවසේ සිට වැඩ කරන අය වැඩියෙන් කාර්යක්ෂම වන ආකාරය ඔවුන් අත්දැක තිබුණි.

තම සේවා ස්ථානයට තමන් දෙන දායකත්වය කොතරම් අනගිත්වයකින් යුතු වේ දැයි විදහා පාන්නට අවස්ථාවක් ලැබෙන්නේ ශ්‍රමිකයාට රස්සාවට වෙහෙසෙද්දී මුහුණ දෙන්නට සිද්ධ වන වෙනත් බාධක අඩු වී යද්දී.

එසේම වැඩියෙන් දායකත්වයක් දෙන සේවකයන් කවුදැයි තෝරාගන්නට ද ලැබෙන්නේ ඔවුන්ගේ කාර්යක්ෂමතාවයට සරිලන වේතන, බෝනස්, දිරි දීමනා සහ නිවාඩු තීරණයට සේවා යෝජකයන්ට පහසුවෙන් හැකිවෙද්දී.

සේවා යෝජකයා සහ සේවා දායකයා තම තමන් මුහුණ පාන ඍජු සිද්ධීන් හමුවේ එකිනෙකා සමඟ අත්හදා බැලීම් වලින් යා යුතු ගමන් මාර්ගය තෝරා ගනිද්දී දෙකොට්ඨාශයේම අරමුණු සාර්ථක වෙති. අහක ඉන්න අය ඔවුන්ට නීති හදද්දී දෙකොට්ඨාශයම අසාර්ථක වෙති.

මේ දිනවල වෙනෙසියුලාවේ Sidor යකඩ කම්හලේ සේවකයන් සති ගණනක සිට සිද්ධ වෙන උද්ඝෝෂණයක නියැළෙති. ඔවුන්ගේ අප්‍රසාදයට ලක් වී ඇත්තේ පුද්ගලික අයිතියකින් යුතු ලාබ සොයන කොම්පැණියක් නොවේ.

වෙනෙසියුලාවේ සමාජවාදී ආණ්ඩුව හියුගෝ චාවේස් පාලනයේ සිටි 2008 වසරේ දී සිඩෝර් යකඩ කම්හල ජනසතු කරන ලදි. ඒ ‘රුදුරු ධනේශ්වරයෙන්’ (savage capitalism) වැඩ කරන පංතිය බේරාගනු පිණිසය.

චැවේස් ගෙන් පසුව පාලනය පවරනු ලැබූ මදුරෝ අද ආර්ථික අර්බූදයක් මැද සිටියි. ඔහුට එරෙහි වූවන් දැන් වැඩියෙන් ඉන්නේ ඉස්සර පුද්ගලික වූ සිය ගණනින් ජනසතු කරන ලද කොම්පැණිවල යුනියන් සංගම් තුලයි. ජනසතුකරණයෙන් පසුව කාර්යක්ෂමතාවය සහ ඵලදායීත්වය අඩු වී ගිහින් ඒ නිසා වේතන ද අඩු වී යාමක් වෙනෙසියුලාව පුරා පොහොර කම්හල් සිට කිරි ඇසුරුම් කම්හල් සිට විරවුම්හල් දක්වා පැතිර ඇත.

1999 සිට 2013 දක්වා චැවේස් රට පාලනයේ සිටියේය. වසර 15 ක් තිස්සේ රට ආර්ථික අගාධයක් කරා ඇදගෙන යන ප්‍රතිපත්ති වලට තවමත් සහාය දෙන මදුරෝ එහෙත් අවලාද කියන්නේ නිදහස් වෙළඳපොල ධනවාදයටයි. ප්‍රශංසා කරන්නේ රාජ්‍ය මැදිහත්වීමයි.

සිඩොර් කම්හලේ අධ්‍යක්ෂක මණ්ඩලයට රජයෙන් පත්කරපු හෝසෙ ක්ලෙමෙන්ටෙ ටාටා තවමත් අගයන්නේ චැවේස්ගේ විප්ලවයයි. “රැකියාව දිගටම තිබේවි යැයි ආරක්ෂාවක් නොදැනෙද්දී ශ්‍රමිකයන් පීඩිත පංතියක්ව සිටියා. දැන් රජය ඔවුන්ට වගකීමෙන් සලකනවා,” යැයි ඔහු කියයි. විරැකියා තත්වයක් නැතැයි ටාටා පාරට්ටු බායි. ඒත් 2007 දී සිඩොර් යකඩ කම්හල, ද්‍රව්‍ය යකඩ ටොන් මිලියන 4.3 ක ප්‍රමාණයක් නිෂ්පාදනයට සමත් වුවත් මේ වසරේ දී එයින් කාලක්වත් හදාගන්නට අසමත් වේ යැයි අනුමාන වේ.

වෙනෙසියුලාවේ ජනාධිපති මදුරෝ ඉකුත් දවසක යුනියන් සංගම් නායකයෙකුව සිටියෙකි. එහෙත් ඔහු දැන් වැඩ වර්ජනයේ යෙදෙන යුනියන් සේවකයන් වංචාවේ යෙදෙන අය හැටියට සලකයි. ඔවුන්ගේ කිසිදු නීති විරෝධී ක්‍රියාවන් ගැන සාක්ෂි පෙන්වන්නේ නොමැතිව ඔවුන් මත්ද්‍රව්‍ය භාවිතයේ ඉන්නා යුනියන් සේවකයන් යැයි ලේබල් අලවයි.

1999 දී හියුගෝ චැවේස් බලය අල්ලා ගනිද්දී සමාජවාදී ක්‍රමයෙන් සේවකයන් සමෘද්ධිමත් වෙනවා යැයි පොරොන්දුවක් දුන්නේය.

සමාජවාදීන් පොරොන්දු දෙන්නට සමත්හ. ඒ පොරොන්දු විශ්වාස කරන අයගේ ප්‍රසාදයෙන් බලයට පත්වෙති. මිනිස් ස්වභාවයට පටහැනි සේ කටයුතු සංවිධානය කරති. කාර්යක්ෂමතාවයක් සහ ඵලදායීත්වයක් ලබන්නට අසමත් ප්‍රතිපත්ති වලින් අවසානයේ දී අනුන්ගේ වෙහෙසත්, අනුන්ගේ ධනයත් සහ රටේ සම්පත් සියල්ලත් කාබාසීනියා කර දමති.

බුෂ් පුතා සහ දැන් ඔබාමාත් මැද පෙරදිග යුද්ධ වල නිරත නිසා වෙනෙසියුලාවට ඇමෙරිකන් හතුරන් හෝ බටහිර කුමන්ත්‍රණකරුවන් පිට වරද පටවත නොහැකියි.

අවසානයේ දී සමාජවාදී ආණ්ඩුවක් සිය සමාජවාදී ජනතාවගේ සහාය නොලැබෙන විට දෝෂාරෝපණය එල්ල කරන්නේ ඒ සමාජවාදී ජනතාවටමය.

තමන්ම ගෙන්වා ගත් අසාර්ථක ප්‍රතිපත්ති දරා ගන්නට බැරි තරම් කටුක වෙද්දී බර්ටෝල්ට් බ්‍රෙෂ්ට් වැනි සමාජවාදියෙකුට එහෙනම් ඉතින් ආණ්ඩුවට බැරි ද ජනතාව විසුරුවා හැර වෙන ජනතාවක් පත් කරගන්න, යැයි අහන්නට සිතේ.

ඒත් කොතරම් අසාර්ථක ප්‍රතිඵල හමුවේ වුවු ද තමන්ගේ ක්‍රමය වැඩ නොකරන ක්‍රමය යැයි සමාජවාදියා කිසිදා පිළිනොගනියි.

Follow

Get every new post delivered to your Inbox.

Join 241 other followers