ගිනි නිවන හමුදාවේ බෙල්ලො උත්සවය

කාමෝද්දීපනය ඇතිවෙන්නේ දේශපාලනයෙන් කියලා සමහරු සැක කළාට, තවත් පිරිසක් හිතනවා කාමෝද්දීපනය සඳහා කෑම ජාතිත් තියෙනවා කියල. එහෙම කෑම ජාති අතර රයිනෝසිරස් අං වගේම බෙල්ලොත් ඉන්නවා. හැබැයි මේ කෑම වලින් කාමෝද්දීපනය වඩවනවා කියන එකත් ‘ගුඩ් ලක්, මිස්ට ග්‍රොස්කි’ කිව්වා වගේ නාගරික වෘත්තාන්තයක් ද?!!

නාගරික වෘත්තාන්තයක් කියන්නෙ මෑත කාලයක නගරයකින් බිහිවෙච්ච කට කතාවක්. අර යාළුවෙක්ගෙ යාළුවෙකුට වෙච්ච දෙයක් වගෙ පැතිරිලා යන කතා.

රෝම අධිරාජ්‍යයෝ බෙල්ලන් මිල දී ගෙන තියෙන්නෙ උන්ගෙ බරට රත්තරන් වලින් ගෙවලයි කියන එකත් එහෙම කතාවක් ද දන්නෑ!

කාමයේ හා ආදරයේ දෙව්දුව කියන ග්‍රීක ඇෆ්‍රඩයිටි මුහුදෙන් බෙල්ලො පියනක ඇවිත් ඊරෝස් බිහිකරපු නිසා aphrodisiac කියන වචනය බිහිවුන කතාවත්, කැසනෝවා හැම සන්ධ්‍යාවකම බෙල්ලෝ 144 ක් කෑව කතාවත් වෘත්තාන්ත වලට අයිති ඇති!!

අපිට ටිකට් දෙකක් ලැබුණ Powellville ගිනි නිවන හමුදාවේ බෙල්ලො උත්සවයට. මගෙ සුද්දා මීට කළින් මෙවැන්නකට සහභාගි වෙලා නැහැ. අළුත් අත්දැකීමකට මාත් හැමදාම සූදානමින් තමා ඉන්නෙ.

ඇමෙරිකාවේ ගිනි නිවන හමුදා ඇමෙරිකන් ඉතිහාසයත් එක්ක ඉතා ළං වූවක්. ලී වලින් තමයි ඇමෙරිකාවේ නිවාස බොහොමයක් අතීතයේ පටන් නිම වෙන්නෙ.

බෲස් ලී මිට මොළවලා පාරක් ගැහැව්වම බිත්තිය දෙබෑ වෙනවා දැකලා ඇතිනෙ චිත්‍රටපටි වලින්. මේ පැත්තෙ දී එහෙම කඩන්න වැඩි ශක්තියක් අවශ්‍ය නැහැ. බිත්ති මැදින් දුවන 4X4 ලෑලි අහු නොවෙන තැනකට මිට මොළවලා ගහන්න විතරයි ඕනා, පපඩම් බිත්ති!!

1631 දී බොස්ටන් ආණ්ඩුකාරයා තහනම් කරන තෙක් නගරයේ චිමිනි පවා නිමැවෙලා තියෙන්නෙ ලීයෙන්.

කට්ටියක් එක්ක එකතු වෙලා රටේ හැම දෙයක් ගැනම කතා කරපු ෆිලඩෙල්ෆියාවේ තරුණයෙක් හිටිය. හේ නමින් බෙන්ජමින් ෆ්‍රෑන්ක්ලින්. ස්පාඤ්ඤ භාෂාවෙන් ආපු ‘ජුන්ටා’ යන වචනයේ එක තේරුමක් ‘රැස්වීම’ යි. ඉතින් බෙන්ජමින්ගෙ රැස්වීම් වලට නමක් වැටුන ‘ජුන්ටෝ ක්ලබ්’ කියල. ඒ අය රැස්වුනේ තැබෑරුමක!

ලීයෙන් තැනූ නිවාස ගිනි ගනිද්දී, අතීතයේ ඇමෙරිකාවේ ගිනි නිවන්න ‘බාල්දි කණ්ඩායම්’ දාලා තිබුණ. ෆිලඩෙල්ෆියාවේ ගිනි නිවන කටයුතු කාර්යක්ෂම කරන්න ජුන්ටෝ සංගමය එකතු වෙලා උපකරණ ලැයිස්තුවක් හැදුව. ළඟම තියන ළිඳෙන් වතුර ගන්න හම් බාල්දියක්, නිවසක බඩු අයින් කරන්න ලොකු කූඩයක්, ඉනිමඟක් යනාදිය හැම ගෙයකම තිබීම අනිවාර්ය වූවා.

ජුන්ටෝ සංගමය පටන් ගත්ත ‘එක්සත් ගිනි නිවන කොම්පැණිය’ වසර කිහිපයක දී ඇමෙරිකාවේ හදිසි ගින්නෙන් ආරක්ෂිතම නගරය ෆිලඩෙල්ෆියාව බවට පත් කළා.

බෙන්ජමින් ෆ්‍රෑන්ක්ලින් විතරක් නෙමේ ඇමෙරිකාවේ මුල් ම ජනාධිපති ජෝර්ජ් වොෂිංටන් ද ගිනි නිවන හමුදාවක ස්වේච්ඡා සේවයේ යෙදුන අයෙක්. ඒ කාලේ වගෙ ජනාධිපතිවරු අද කොහෙද?!!

අදත් ඇමෙරිකාවේ වැඩියෙන් තියෙන්නෙ ස්වේච්ඡා ගිනි නිවන හමුදා. වෙනත් රැකියා කරන අය තමන්ගේ කාලය පුහුණුවට හා ගිනි නිවන්න යොදවනවා. පළාතේ ආධාර මුදල් වලින් තමයි මේ ගිනි නිවන හමුදා නඩත්තු වෙන්නෙ.

අපි සහභාගී වෙච්ච බෙල්ලෝ උත්සවය වාර්ෂිකව පැවැත්වෙන්නෙ ඒ ගමේ ගිනි නිවන හමුදාවට ආධාර එකතු කරන්න. ඇතුල්වීමේ ටිකට් පතක් ඩොලර් තිහක්. කන්න පුළුවන් තරම් බෙල්ලො කන්නත්, බොන්න පුළුවන් තරම් බියර් බොන්නත් පුළුවන්.

පැත්තක හිටියා තම්බපු නැති බෙල්ලො ඒ වෙලාවෙම ඇරලා දෙන කළු ඇමෙරිකන් කෝකියෝ දෙන්නෙක්. පණ පිටින් ඉන්න බෙල්ලො කන අය වැඩිය දැක්කෙ නැහැ. බෙල්ලො ගැන දැනුමැති අය කිව්වෙ පණ පිටින් බෙල්ලො කද්දී ෂැම්පේන් හරි විස්කි හරි බොන්න ඕනා මොනව හරි විෂබීජ තියනවා නම් ඒවත් මරන්න කියලා!

පෝලිමේ ඇතුලට ගිහින් වාඩි වුනාම මේසයට ගෙනැත් බෙල්ලො බාල්දියක් හලනවා. මේ තම්බපු බෙල්ලො. මේවාට නිතර යන එන අය තමන්ගෙ බෙල්ලො අරින පුංචි පිහියත් අරගෙනමයි ඇවිත් උන්නෙ. බෙල්ලා ඇරලා, සෝස් ටිකක් හෝ දෙහි යුෂ බිංදුවක් ඉහළ, පිහි තුඩෙන්ම බෙල්ලා කටට දා ගන්නවා. ඊට පස්සෙ බියර් උගුරක් බොනවා.

බියර් බොන්නෙ නැති අයට සෝඩා පාන තිබුණ. බෙල්ලො කන්නෙ නැති අයට හරක්මස් සැන්විච් තිබුණ. තම්බපු බෙල්ලො කන්න අකමැති අයට තෙලෙන් බැදපු බෙල්ලො සැන්විච් තිබුණ.

අපිට ඉස්සරහින් වාඩිගත් කෙනාට දවසක් මුතු ඇටයක් හම්බ වුනාලු. ඒ වසර දහයකට පෙර. මේ උත්සවයට නොකඩවා එන කෙනෙක්.

මේ අය කාපු බෙල්ලෝ මේ පළාතේ චෙසපීක් බොක්කේ ධීවර කර්මාන්තයට අයිතියි.

උත්සවයට සහභාගී වෙච්ච සංඛ්‍යාව එදා දවසේ දාහකට ආසන්නයි.

උත්සවයට ආපු අය හැඳගෙන හිටියේ ගෙදර දී අඳින වස්ත්‍ර. කතාබහ කළේ මුව දඩයම් හා මාළු මරන්න ගියාම ලැබිච්ච අත්දැකීම් ගැන. එතැන සිටි පිරිස වැඩිදෙනා ගොවියෝ, වඩුවෝ, යාන්ත්‍රික කම්කරුවෝ සහ පොලිස් නිලධාරියෝ. ඉස්සර වැඩිය කාන්තාවෝ ආවේ නැහැ කියල අර මුතු ඇටය හම්බ වෙච්ච මනුස්සයා කිව්වා. ඊයේ නම් කාන්තා පක්ෂයේ අඩුවක් දැක්කෙ නැහැ. ආසියාව පැත්තෙන් ආපු අයෙකුට හිටියෙ නම් මම පමණයි.

කන බොන වේගය අඩු වෙද්දී ‘ගන් රැෆල්’ තරඟයක් පැවත්වුණා. රෙමින්ග්ටන් 700, බෙරෙටා 3901 සහ ටී/සී ඔමෙගා තුවක්කු 3 ක් තෑගි!!

දැන් වැඩ කරන ජනතාවගෙන් අයෙක් ගෙදර වියදමට තියන සල්ලි තුවක්කුවක් ගන්න වියදම් කරන එක ‘හොඳ’ නැහැනෙ. ඉතින් මෙහෙම ආධාර දිය යුතු තැනක දී ‘දිනුමකින්’ තුවක්කුවක් ලැබුණම ‘කමක් නැති’ නිසා ද කොහෙද හිටපු හැමෝම ඒ රැෆල් එකට සහභාගී වුනා.

අවසානයේ තව කන්න, තව කන්න කිය කියා බෙල්ලෝ බාල්දි අරන් ශාලාව වටේ ගිය ගිනි නිවන හමුදා අය බියර් එකත් ළඟට ගෙනැත් දෙන්නත් ඉදිරිපත් වෙනවා දැක්ක. හැමෝම ඇති තරම් කාලා, ඇති පදම් බීලා විසිරිලා ගියා.

කාපු බෙල්ලන්ගෙ පියන් විසි කරන්නෙ නැහැ. බිත්තර දාන කුකුලන්ට කැල්සියම් අවශ්‍ය නිසා උන්ගෙ කෑම වලට එකතු කරන්න යොදා ගන්නවා. මේ පැත්තෙ සමහර නිවෙස්වලට යන අඩිපාර උඩින් දාන්නෙ බෙල්ලො පියන් කුඩු කරලා. ඒ වගේම ආපහු මුහුදු වෙරළටම ගල්පර ශක්තිමත් කරන්න එකතු කරන බෙල්ලෝ පියන් නිසා පරිසරය රැකිලා තවත් බෙල්ලෝ ජනගහණය වැඩි කරන්න උපකාර වෙලා තියෙනවා.

කැසනෝවා කාපු බෙල්ලො 144 ට වඩා කාපු අය නම් ෂුවර් එකට ඉන්නැති!!!