මතකය නැති මොළය නිසා …
“අපට මතක තියෙන්නේ අපට වටහා ගතහැකි දෑ ය. අපිට වටහාගත හැක්කේ අපි අවධානයක් යොමු කරන දෑ ය. අපි අවධානයක් යොමු කරන්නේ අපිට ඕනෑකමක් ඇති දෑ ට ය.” -E.B. Bolles, Remembering and Forgetting: An Inquiry into the Nature of Memory (1988)
අත්දැකීම් නිසා ආවේගයන් හට ගනියි. ඒ ආවේගය මඟින් අවධානය රඳවා ගනියි. ඒ රැඳි අවධානයෙන් වැටහීම හා ඥානය ලැබේ. එහි ප්‍රතිඵලය මතකයයි. අවධානය යනු ආහාර ජීර්ණ පද්ධතියක් වැනි ය. අපි කන ආහාර අපි තැන්පත් කර ගන්නේ නැත. ඒවා කුඩා කුඩා කොටස් වලට කඩා දමා යන ගමනේ දී ඒවා ශරීරයේ කොටසක් කර ගැනෙයි. අවධානය කරන්නේ අපේ අත්දැකීම් වලින් රඳවා ගන්නේ මොනවා දැයි තීරණය කර එයින් අපේ මතකය පෝෂණය කර ගැනීමයි. මතකය යනු අත්දැකීම් ගබඩාවක් පමණක් නොව එය නිතර භාවිතයට ගන්නා තැනකි. අපි ගිල දාන සමහර දේ ජීර්ණය නොවන්නා සේ අපි අවධානයෙන් තොරව අත්දකිනා දෑ බොහෝ ය. (ඉහත පොතෙනි.)
මෙය මතකය ගැන කරන සම්පූර්ණ වූ සටහනක් යැයි වරදවා නොසිතන්න. පොත් සිය දහස් ගණනින් ලියා ඇති විෂයයක් (විශේෂයෙන් මම පිළිතුරකටත් උපාධි නිබන්ධන ලියනා සේ දීර්ඝ උත්තර දෙන අයෙක් නිසා!) ගැන ලියන්නට දෑ බොහෝ ය. මුද්‍රිත පොතක අනවශ්‍ය පිටු පෙරලා කැමති පිටු පමණක් කියවත හැකිය. මෙහි එය කිරීම නොහැකි නිසා කෙටියෙන් (හැකි තරම්) සටහන ලියමි.
මතක කුට්ටියක් (memory chunk) යනු කුමක් ද? කුට්ටි යන වචනය මොළය හා සබැඳිව මුලින් ම පර්යේෂණාත්මක ලිපියක් පළ කරන්නේ සවිඥානක මනෝවිද්‍යාඥ ජෝර්ජ් ඒ. මිලර් විසින් 1956 දී ය. මිලර් රීතියට අනුව සාමාන්‍ය පුද්ගලයෙකුට වැඩ කරන මොළයක මතක තියා ගත හැකි වස්තු ගණන 7 ± 2 කි. එනම් 7 කට දෙකක් අඩුවෙන් හෝ වැඩියෙනි. උදාහරණයක් ලෙස ඉලක්කම් හතක දුරකතන අංකයක් මතක කුට්ටියකි.
Joseph LeDoux 2002 දී පෙන්වා දෙන අන්දමට අපේ මොළයේ ගබඩා කරන තොරතුරු තැන්පතුව ‘කුට්ටි’ ආකාර දෙකකින් සිද්ධ වේ. විස්තරාත්මක (declarative) සහ අවිස්තරාත්මක (nondeclarative). දත්ත සහ තොරතුරු මොළයේ එක තැනක නොව විවිධ වූ තැන්වල අතිරික්තයන් සේ ගබඩා කර ඇත. ඒ නිසා නිතර ප්‍රයෝජනයට ගන්නා දත්ත හා තොරතුරු මතකයේ පවතින අතර කලාතුරකින් පරිහරණයට ගන්නා දත්තය හෝ තොරතුර මතක් කර ගැනීම පහසු නැත. විභාග සමය තුල විෂයය මතකයන් විභාගය අවසන් වූ සැනින් අමතක වී යාම ඊට නිදසුනකි!!!
යමක් මතක තියා ගන්නට අවශ්‍ය නම් අභිප්‍රාය (intend), ගබඩා (file) සහ පුරුදු වීම (rehearse) මඟින් එය කරනු හැකි යයි මුලින් ම කියන්නේ 1512 දී ඉරාස්මුස් විසිනි!! අද දිනයටත් එය සත්‍යයකි.
ගර්භනී මොළයක අමතක වීම් සිදුවීම සාමාන්‍යයකි. ලන්ඩනයේ ඇති Royal Postgraduate Medical School හි Anita Holdcroft විසින් කරන ලද පර්යේෂණයකට අනුව ගැබිණි සමයේ දී මොළය 3-5% ත් අතර හැකිළීමක් සිද්ධ වේ. ඇල්සයිමර් රෝගියාගේ මොළය 10% ක් පමණ හැකිළේ. දරුවා ප්‍රසූත කර මාස හයක් යද්දී මොළය යථා තත්වයට නැවත පත්වේ. ඉතින් ඔබ ගැබිණි කාන්තාවක් නම් දරු ගැබ පවතින මාස 9 දී සහ ඊට පසු මාස 6 කාලය තුල දී පෙනී සිටින තරඟ විභාගයකට සූදානම් වීම දැඩි අභියෝගයකි.
මතකයක් ගොඩ නැඟීම ඡායාරූපයක් ගැනීම හා සමාන ය. 1. දර්ශනයක් ආලෝකයට ප්‍රතිචාර දක්වන ෆිල්ම් එකකට අල්ලා ගත යුතුය. 2. ඒ ෆිල්ම් එක රසායන භාවිතයෙන් develop කරගත යුතුය. 3. දර්ශනය හැමදා රඳවා ගන්නට රසායන යෙදිය යුතුය. යමක් අල්ලා ගන්නා මතකය immediate මතකය වෙයි, develop කරන්නේ short-term මතකයෙනි, හැමදා පවත්වා ගන්නේ long-term මතකයෙනි.
දහස් ගණනින් දත්ත සමූහයන් ඒවා ඇහෙන තත්පර දෙකක් හෝ ඊට අඩු කාලයක් අල්ලා ගෙන සිටින්නට immediate මතකයට හැකිය. දත්ත හා තොරතුරු පිරි ප්‍රවෘත්ති වාර්තාවක් හෝ දේශනයක දී ඒවා සියල්ල ඇහෙද්දී මතකයේ රැඳෙනවා යැයි හිතට දැනේ. එහෙත් ප්‍රවෘත්ති/දේශනය අවසානයේ දී මතකයේ ඇත්තේ කිහිපයක් පමණි. දවසේ අවසානයේ දී තවත් අඩු ය. දවස් දෙක තුනකට පසු දත්ත තිබි බව මතකය. ඒවා මොනවා දැයි අමතක ය. කවුරු හෝ දුරකතන අංකයක් ඔබට කියූ විට මුල් තත්පර දෙකේ එය හොඳින් මතකයේ ඇත. එය තත්පර දෙකින් පසු අමතක නොවන්නට නම් තත්පර දෙකකට වඩා වැඩි කාලයක් එය නැවත නැවත හඬනඟා කියැවිය යුතුය. නැත්නම් කොළයක කුරුටු ගා ගත යුතුය.
‘දිව අග තියෙනවා, ඒත් මතක් වෙන්නෙ නැහැනෙ’ අවස්ථාවේ දී එය දැනගත් ස්ථානය, හිතේ තිබි ආවේගය, ශාරීරිකව කෙසේ සිටියා ද යනාදිය මතක් කිරීමෙන් එය මතක් කරගත හැකිය. එනම් ඒ හා බැඳි අනිත් දේවල් ගැන සිහි කිරීමෙන් එය ගබඩා වූ තැනට යන්නට පාර හදා දෙයි.
පර්ස් එක, යතුරු කැරැල්ල තිබ්බේ කොහේදැයි අමතක වූ විට එය අන්තිමට අතේ තිබුනේ කොහේදී ද, කොයි වේලාවේ දී ද, කවුරු ළඟ සිටිය දී ද යනාදිය සිහි කරන්න. නිතර ඒවා තියන තැන් අමතක වෙනවා නම් නිතර ඒවා එකම තැනක තැබීමෙන් සොයා ගැනීම ද පහසුය!!
දැඩි ආවේගාත්මක වූ මතකයක් නැවත සිහි කරන්නට යද්දී, එහි details ඇත්ත ඇති සැටියෙන් නොව තමන් පමණක් ලද අත්දැකීම අනුව (තමන්ට දැනුන විදියට) මතකයේ ද ගබඩා වී ඇත!! ඒ නිසා එවැන්නක් ගැන තම මොළයේ ඇති මතකය සම්පූර්ණයෙන් ම විශ්වාස නොකර එය දන්නා තව කෙනෙකු ගෙන් විමසීම ද සුදුසු ය.
බලවත් කම්පනයක් සිදු වූ විට ඒ ගැන මතකය සහමුලින් නැති වී යාම සාමාන්‍යයකි.
අරුණි ශපීරෝ වෙතින් 
//ගර්භනී මොළයක අමතක වීම් සිදුවීම සාමාන්‍යයකි//
මේ කරුන මා දැන නොසිටි එකක්. ගොඩාක් ස්තූතියි.
එතකොට ඇල්සයිම කියන්නෙ මොකක්ද…?
maathalan,
ඒ ගැන ළඟදීම දවසක ලියන්නම්.
ආයිබෝවන්ඩ කිව්ව නෝනෙ. මේක නං ආයි බොන්ඩම වෙන සබ්ජෙක්ට් එකක්.ඔය මොලේ තියනව නේද? ඕක හරිම අපූරු ගැජමැටික් එකක් නෙව.
මම අහල තියෙන විදිහට short-term memory එකෙන් long-term memory එකට දත්ත ගෙනියන කොට , ඔක්කෝම ගෙනියන්නෙ නෑ, එහෙන් මෙහෙන් මැද හිඩස් හිටින්නයි ගිහින් දාන්නෙ. මේක කරන්නෙ , ඉඩ ඉතුරු කර ගන්නලු. අන්න ඒ හිඩස් තමා, අර ” දිව අග තියෙන” -missing links. ඒත් මොලේ තියෙන අපූරු හැකියාවක් තමා ඒ -missing links නැවත නිපදවා ගැනීමේ හැකියාව.
මේ ඉතිං බකුසු මොලේට තේරිච්ච හැටියි, වැරද්දක් තියේ නං සමාව භජනය කරන සේක්වා!
අගේ ඇති බකුසු මොළයක්….. ලොකු ඇස් වලින් , ඝන කළුවරේ ඉදන් , මතක තියා ගන්න හැටි අපූරුයි. විශේෂයෙන් බස්සන්ට මතකය වැදගත් ඇති… දහවලට වඩා කළුවරේ මග සොයා ගන්න….
D.G.M බස්සා,
වැඩිය මේ පැත්තෙ කරක් ගහන්නෙ පරිස්සමෙන්. අන්න හැරී පොටර් රසිකයො බස්සො හොයනවාලු මේ දවස්වල චිත්‍රපටිය නැඟලා යන නිසා!!!
//එහෙන් මෙහෙන් මැද හිඩස් හිටින්නයි ගිහින් දාන්නෙ. මේක කරන්නෙ , ඉඩ ඉතුරු කර ගන්නලු// මම නම් ඔය කතාව අහලා නැහැ. දන්න තරමින් ඉවර නොවෙන ඉඩක්, අපි පාවිච්චියට නොගන්න තරම් විශාල ඉඩක් තියන්නෙ ලෙඩ දුකක් නැති සාමාන්ය් මොළයකට.
//නැවත නිපදවා ගැනීමේ හැකියාව// කියනවාට වඩා සුදුසු වෙයි නැවත මතක් කර ගැනීමේ හැකියාව කිව්වොත්. මොකද මතකය අළුතින් යමක් නිපදවන්නෙ නැහැ. ගබඩා කරගත් දේවල් යළි මතක් කරලා දෙනවා පමණයි.
පිහිනන්න දන්න කෙනෙක් වතුරකට වැටුනොත් හිත හිත මතක් කරගන්න කාලයක් යොදවන්නෙ නැතිව ක්ෂණියකින් පිහිනා දිවි බේරාගන්න තැත් දරන්නෙ. වතුර යට හුස්ම නොගන්න, අත පය ගහන්න, පිළිවෙලින් කළ යුතු පියවර සියල්ල මතකයට ආවේ නැති පළියට එයින් කියන්නෙ මතකයේ හිඩැස් තියනවා කියලා නෙමෙයි. ඒ සියල්ල එකින් එක පියවර අනුගමනය නොකර කරන්න තරම් මතකයක් පුහුණුව විසින් ගබඩා කරලා තියනවා කියලා.
හුටා, ඒකත් එහෙමද? මාත් ඔය එහෙන් මෙහෙන් ඇහිඳපුවා මතක තියෙන විදිහටයි කිව්වෙ. දැං බලාන්ටකෝ, ඒකෙත් හිඩැස් නොවැ. Phew…ඇති යන්තං, මොලේ ඇති වෙන්ට ඉඩ තියෙන බව දැණ ගත්තා, දැං දෙඤ්ඤං රම්පෙට පොරි හැලෙන්න.
//විශේෂයෙන් මම පිළිතුරකටත් උපාධි නිබන්ධන ලියනා සේ දීර්ඝ උත්තර දෙන අයෙක් නිසා!//
හැබෑටම අරුණි …මම මේ ගැන හරියට හිතුවා. අරුණි මේ තරම් දිග පෝස්ට් , මේ තරම් කරුණු කාරණා එක්කල ගලපල ලියන්නෙ කොහොම ද කියලා.
මට නම් ඕනි කියන්න තියෙන දේ , පුලුවන් තරම් කෙටියෙන් කියන්න වගේම ලියන්නයි.එහෙම කරද්දි මට වාසි වලට වඩා අවාසි සිදුවුන අවස්ථා බොහෝමයි…මොකද කියනව නම් බාගයක් හිතේ තියානයි ලියල හෝ කියල තියෙන්නේ….
විඥානය ගැන බරසාර ලිපි වගයක් මේ දවස් වල “වචන ටැක්සි“ කියන බ්ලොග් එකේ යනවා. ඉඩ තියනම් කියවල බලන්න. ( ක්වොන්ටම් විද්‍යාව සහ විඥානය ගැන)
මේ මතක තබා ගැනීමේ ක්‍රියාවලියේ දී පෙනේරයක් වෙනව ද? කුල්ලක් වෙනව ද කියන එකත් වැදගත් නේද?
හෙහ්..හෙහ්.. බස්සො දන්න Quantum mechanics කිව්වලු. ඕං ඕකෙ තියනවා Heisenberg uncertainty principle කියල එකක්. ඒකෙන් කියන්නෙ අපිට මේ හරි වගේ පේන දේ, අපි හරියි කියලා හිතාගෙන ඉන්න දේ, එහෙම නොවෙන්න පුළුවනි කියලයි, පරීක්ෂකයා විසින්ම ඒ පරීක්ෂන්ණය නිසාම, තමාගේ “නියැඳිය” අපවිත්‍ර කරනවා කියල , තමයි ආරලු බුරුලු ඇරල කිව්වොත් කියවෙන්නෙ. මේක අපි වගේ “ජොන් බාස්” ලගෙ ලෝකෙටත් අදාල වෙනවා. මොකද අපි “නිගමන” වලට එළඹෙන්නෙ, අපේ “පාට කන්නාඩි” පැළඳගෙන නිසා.
෴ සොඳුරු සිත ෴,
මට මෙච්චර දිගට ලියාගෙන යද්දීත් සමහර තැන් වල හිතේ තියන දෙයින් ටිකයි ලියැවිලා තියෙන්නෙ කියලා දකිනවා. මගේ අඩුපාඩුව කෙටියෙන් පැහැදිලි කරන්න නොදන්නකම.
ක්වොන්ටම් විද්‍යාව සහ විඥානය ගැන එච්චර බරසාර ලිපි මට නම් වැටහෙන්නෙ නැහැ කොච්චර උත්සාහයක් ගත්තත්. සමහර විට උඩින් දාපු //අපිට වටහාගත හැක්කේ අපි අවධානයක් යොමු කරන දෑ ය. අපි අවධානයක් යොමු කරන්නේ අපිට ඕනෑකමක් ඇති දෑ ට ය// නිසා වෙන්නැති!!!
ඔය පෙනේරය ගැනයි කුල්ල ගැනයි මම වෙන වෙන තැන්වල ලියපුවා දැකලා තියනවා. ගෙදර තියන පෙනේරයයි කුල්ලයි දෙකම අරගන හලල බැලුවා. දෙකම කරන්නෙ එකම, එනම් පැති දෙකකට වෙන් කරන එක නේද? මතකයේ තියාගන්න අවශ්‍ය දේවල් අනවශ්‍ය දේවල් කියලා වෙන් කරන එක කොහොම කරන්න ද? අමතක කරන්න හදන දුක දේවල් කවදාවත් අමතක නොවෙද්දී. අමතක කරන්න හදන කොට වැඩි වැඩියෙන් මතකයට එද්දී. අමතක කරන එක පැත්තකට දාලා සිටිය දී හොරෙන් ම ඒ දුක් මතකය මතකයෙන් පැන යද්දී …
අක්කේ…
ඉතාම වැදගත් ලිපියක්…
මම යමක් පැහැදිලි කර ගන්න කැමතියි… අපේ මතකය (මතක ශක්තිය ) hard disk එකක් වගේ වැඩකරනවාද ? මම අදහස් කලේ අනවශ්‍ය දේවල් මතකයේ තබා ගැනීමෙන් මතකයේ ඉඩ ඉවරවීමක් වගේ දෙයක් වෙනවාද ?
මම මෙහෙම අහන්නෙ මාවම උදාහරණයට අරගෙන ( අත්ථානි උපමංකථ්වා..).. මම වයස අවුරුදු විසිහතරක් පමන වෙනකම් කියවීමට හුඟාක් කාලය ගත කල කෙනෙක්… හැම විෂයයක් ගැනම කියෙව්වා… මට හොඳ මතක ශක්තියක් තිබුණ.. කිසිම technique එකක් භාවිතා කලේ නෑ… කියවන අහන දේ හොඳට මතක තබා ගන්න පුළුවන් වුණා… දැන් ( @ 37 ) එහෙම මතක තබාගැනීමට අපහසුයි.. නොයෙකුත් techniques භාවිතා කිරීමට සිදුවෙනවා… නමුත් ඉස්සර මතක තබාගත් දේ තාම මතකයේ තියෙනව…
මේක මෙතනින් නවත්තන්න එපා මේ ගැන තව ටිකක් ලියන්න.. mind mapping ගැනත් යමක් ලියන්න හැකිනම් ස්තුතිවන්ත වෙමි…
අනුන්ගේ කතාවලට හොම්බ දැමීම, ඉතිං මගේ සහජ පුරුද්දනෙ, ඕං මාත් දැම්ම “හොට.”
ඔය මතකය ගැන වඩා හොඳ උපහැරණයක් තමා, L2 cache memory සහ main memory. L2 cache memory එක ධාරිතාව කුඩයි, හැබැයි හරිම වේගවත්, හොය හොය ඉන්න ඕනෙ නෑ, පටස් ගාලා” බඩු හෑව්”. පුරස්නෙ වැඩිය දත්ත තියාගන්න බෑ, ඉතිං RAM එකට හරි , HDD page file එකට හරි ගිහින් දානවා. HDD නං ඒකෙ දත්ත ලියන්නෙ කුට්ටි කරලයි. හැබැයි එතන missing links හිටියොත්, බඩුම තමා.
මතකයේ තමා ගැනීම වගේම , අමතක කිරීමත් එක වගේම වැදගත් ස්වභාවික ක්‍රියාවලියක්. නිකං හිතන්න කාපු “බූට්” පාරක් අමතක නොවෙනවා නං වෙන වැඩේ, හුටා නේද? අළුත් දත්ත වලට ඉඩ දෙන්න, පරණ, වැඩිය පාවිච්චි නොවෙන එව්වා මකල දානවා. ඒත් සම්පූර්ණයෙන්ම wipe-out කරන්නෙ නෑ, ඒත් missing links වැඩිවෙනවා. ඉතිං මතක් කරගන්න අමාරුයි. එහෙම අමතක නොවෙන්න නං, නොයෙකුත් techniques භාවිතා කරල මතකය පුහුණු කරවන්න වෙනවා. එක ක්‍රමයක් තමා , මතක තියාගන්න අමාරු දේ දන්න දෙයක් එක්ක ඈඳීම. මතකයිද මෙන්න මේක” උපාලි ඊයෙ නැවෙන් ගිහින් දම්මි නිදිද බලල වරෙන්?”
D.G.M බස්සා,
//නිකං හිතන්න කාපු “බූට්” පාරක් අමතක නොවෙනවා නං වෙන වැඩේ, හුටා නේද?//
බස්සා බූට් පාරක් කාලා නැතිව වගේ කතා කරන්නෙ?!! ඒ වගෙ දෙයක් අමතක කරන්න හදද්දී වැඩි වැඩියෙන් මතකයේ තියෙනවා නේද? 🙂
ආයි ඉතිං බොරු කියන්නෙ මොකටෑ? කෑවා, කෑවා, ආයි මදි නොකියන්නම කෑවා. දැං එව්වා මතක් වෙනවා අඩුයි, නෝනෙ. අපේ “රොස් පරිප්පු” හදන අසෝකමාලගෙ සාස් පාන බලන් ඉන්නව නෙව, “ටෝං” ගාලා මයෙ ඔලු ගෙඩියට වැඩම කරාන්ට..:))
සපතේරු උන්නැහේ මල්ලියෙ,
//අපේ මතකය (මතක ශක්තිය ) hard disk එකක් වගේ වැඩකරනවා ද?// ඔව් සහ නැහැ කියලා කියන්න පුළුවන් මෙන්න මෙහෙම. මතකයේ රඳවා ගන්න නම් මොළයේ මතක ගබඩා වලට තැන්පත් කරන්නෙ ඒ ඒ නියමිත තැන අනුව දාන මතකයට නමක් දීලා. එතකොට යමක් හොයද්දී නම අමතක වුනාට කොයි පැත්තට යන්න ඕනා කියලා දන්න නිසා ඒ පැත්තට ගිහින් හොයාගන්න ලේසියි. නමුත් මොළයේ ‘සර්ච්’ කරන්න බැහැ. පුටුවක වාඩි වෙලා කල්පනා කළාට ලැයිස්තුවක් දිගට වැටෙන්නෙ නැහැ අර නැතිවෙච්ච ඒක හොයාගන්න පුළුවන් වෙන්න. නමුත් හොයාගන යන ක්‍රම සහ විධි තියනවා යම් තාක් දුරට යහපත් ප්‍රතිඵල ගෙන දෙන. පුරුදු කරගත්තාම නුපුහුණු අයෙකුට වඩා වැඩි ප්‍රතිඵල ගෙන දෙන. ඒ වගේම මොළයේ තියන මතකයක් මකන්න බැහැ ඕනකමක් තිබුණට. කම්පනයකින් නැතිවෙච්ච මතකයක් ආපහු ගන්නත් බැහැ තමන් විසින් මකලා නොදැම්මාත්. ඒ වගේම මොළයේ ස්වභාවය තමයි අමතක කරන්න හදන දේවල් වැඩි වැඩියෙන් මතක් කරදීමත්!!
මොළයට මතක තියා ගන්න ඕන දත්තය, තොරතුර, සිද්ධිය හෝ වස්තුව ඇහෙන, දකින, කියවන වේලාවේ දී ම ඒ ගැන යම් සුවිශේෂණයක් හා ආදේශයක් එක්ක හිතන එක මතකය පහසු කරන එක ක්‍රමයක්. හරියට අළුත් folder එකක් ඇරලා අළුත් file එකක් save කරනවා වගේ. ඒක ආයෙත් මතක් කරගන්න ඕන වුනාම අර තමන් විසින් හදා ගත්ත සුවිශේෂණය හා ආදේශය පස්සේ හඹා ගිහින් ගබඩාවේ රාක්කයෙන් එය හොයා ගන්න (මතකයට ගන්න) පුළුවන්. තමන් විසින් සුවිශේෂණය හා ආදේශය තීරණය කළ යුතුයි. මන්ද, මොළයේ ගබඩා කරන මතකයන් පුද්ගලයාගේ ඒකීය වූ දේ නිසා.
//මම අදහස් කලේ අනවශ්‍ය දේවල් මතකයේ තබා ගැනීමෙන් මතකයේ ඉඩ ඉවරවීමක් වගේ දෙයක් වෙනවා ද?// නැහැ. ඉඩ ඉවර කරන්න තරම් කිසිම පුද්ගලයෙක් (අයින්ස්ටයින් වුවත්) සම්පූර්ණ මොළය පාවිච්චියට ගෙන නැහැ. අපි උපදින විට බිලියන 23 ක් මොළ සෛල එක්ක උපදින්නෙ. එක නියුරෝනයක් තවත් නියුරෝන සිය ගණනක් හා සම්බන්ධ වෙනවා. ඒවා සම්බන්ධ වෙන්නෙ සිනැප්සස් (synapses) වලින්. එක නියුරෝනයකින් සම්බන්ධ විය හැකි සිනැප්සස් ගණන දාහක සිට දහ දාහක් පමණ දිවෙනවා. මොළයේ cerebral cortex කියන පැත්තෙ පමණක් සිනැප්සස් ගණන් කරන්නට වසර මිලියන 32 ක් යයි කියලයි කියන්නෙ.
මතකය වයසට යද්දී අඩුවීම මිනිස් ස්වභාවයයි. අර කළින් දැම්ම සටහනේ 88 වියැති නැන්දම්මාට දැන් වැඩියෙන් මතක තියෙන්නෙ පහුගිය වසර 5 -10 දේවල් නෙවෙයි වසර 20 -30 කට එහා දේවල්. ඒ ගැන තව දවසක ලියන්නම්.
බලමු ඉස්සරහට, ලියන්න තරම් හැකියාව තියෙයි ද කියලා ඔය හැම දෙයක් ගැනම!! mind mapping වැඩිය භාවිතය මතකය දියුණු කරනවාට වඩා යම් සැලසුම් හදන්නයි.
Dear….
මේ ලිපිය මතකයෙන් යන්න කලින් තවත් වැදගත් කරුනු ටිකක් දන්න්නකෝ අමතක නොවෙන්නම..
Red see,
ආයුබෝවන්! මෙන්න කළින් ලියපු සටහනක් දැනට කියවන්නකො.
මිලිතත්පර 500ක යශස -500 milliseconds of fame
නියමයි අක්කේ ගොඩක් දේවල් දැන ගත්තා
මේ ලිපියට අදාළත්වයක් නැති වුණත් ඇමරිකාව හා සෝවියට් දේශය අතර තිබුණු සීතල යුද්ධය ගැන විස්තර ටිකක් මට හොයා ගන්න පුලුවන් වෙයිද ??? සිංහලෙන් තිබෙනවා නම් වඩාත් හොඳයි 🙂
ගොඩක් විස්තර දැනගත්තා අරුණි, මගෙ පාසැල් කාලෙ අන්තිම මම හරිම මානසික පීඩනයක හිටියේ. මම මගෙ අම්මලගෙන් ඈත්වෙලා පුංචි අම්මා ලග ඉදන් ඉගෙන ගත්තේ. ඒ කාලෙ මට මගෙ ජීවිතේ ප්‍රශ්ණ ගොඩකට මුහුන දෙන්න උනා. මට දැන් ඒ කාල පරිච්ඡේදය මතකයට නගාගන්නම බැහැ. කොටින්ම කියනවානම් මම පැසැලෙන් දෙවන වතාවට ඇඩ්වාන්ස් ලෙවල් කල බව මම දැනගත්තේ මගෙ යෙහෙළියකගෙන්. මට ඒ බව මතකයේ තිබුනේ නෑ. පාසැලෙන් අස්වෙලා සැම්බියා ගියා. අම්මා ලඟට. ඊට පස්සෙ ජීවිතේ ආයෙත් සුන්දරව ගෙවුනා. මම හිතන්නෙ මම නොදැනුවත්වම මගෙ මොළයෙන් අර අදුරු මතකය මකා දමලා කියලයි. ගොඩක් වෙලාවට මම මතක් කරන්න උත්සාහා කරනවා. ඒ උනාට මතක් කරගන්නට අමාරුයි. මේ දේ ගැන විස්තරය අද දැනගත්තා. ස්තූතියි ඔබට.
Chandi,
චාන්දි අක්කා, මතක් කරන්න උත්සාහ ගන්නත් එපා. ඒ මතකයන් නැති වීම ස්වභාවිකව සිදුවෙන හටගත් සිත් කම්පනයෙන් පුද්ගලයා බේරාගත් වෑයමක් විදියට දැක සතුටුවන්න.
THE WEB IS YOUR NEW MEMORY
http://news.discovery.com/tech/web-new-memory-110720.html