ආරාධනාවයි!

මේ දිනවල ඇමෙරිකාවේ ඊසාන පැතිවල දැඩි උෂ්ණත්වයක් පවතී. ඊයේ නිව් යෝර්ක් නගරයේ උෂ්ණත්වය ෆැරන්හයිට් අංශක 103 දක්වා ඉහළ ගියේය. මහජන පිහිනුම් තටාක ජනයාගෙන් පිරි යද්දී නගරවල සිහිල් සුවය ලබාදෙන ස්ථාන රාශියක් විවෘත වුණි. ඒ වායු සමනයෙන් සීතල සුළං තම නිවසේ ලබා ගැනීමට වත්කමක් නොමැති අය වෙනුවෙනි.

අත්ලාන්තික් මුහුදෙන් ගලා එන ස්වභාවික සුළ‍ඟේ සිහිල් සුවය නිසා මා ජීවත්වන පැත්තේ උෂ්ණත්වය ෆැරන්හයිට් අංශක 90 වුවත් එය ගත වෙහෙස නොකරයි. ඩෙලවෙයාර් ප්‍රාන්තයේ රෙහොබොත් මුහුදු වෙරළට පසුගිය සති අන්තයේ නිදහස් දිනය නොහොත් ජූලි 4 දිනය සමරනු පිණිස ලක්ෂයක ජනතාව රොක් වූහ.

සිහිල් සුවය විඳින්නට ඇමෙරිකාවේ ඊසාන මුහුදු වෙරළේ Ocean City, Maryland වෙත පැමිණෙන අයට මගේ අතින් පිළියෙල කරන ආහාර වේලක් ‍රස විඳින්නට ආරාධනාවකි මෙය. අවන්හල විවෘතව ඇත්තේ සංචාරක සමයේ දී පමණයි. එසේම මම හැමදාම හෝ හැම වේලාවකම එතැන නැති නිසා මම උයන කෑම කන්නට නම් කළින් දැනුම් දී එන්න. තේ, කෝපි හෝ සෝඩා වීදුරුවක් හා රසැති අතුරුපසක් මගේ ගානේ නොමිලේ! නේපාලයෙන් පැමිණි රාජ් නැමති ලුයිසියානා විශ්ව විද්‍යාලයේ ජීව-වෛද්‍ය ඉංජිනේරු ශිෂ්‍යයෙකුත්, බුල්ගේරියාවෙන් ආ ඇලෙක්ස් නම් වූ ගැටවරයෙකුත් හා කසක්ස්ථානයෙන් ආ තවම ඉංග්‍රීසි වචන විස්සකට වඩා කතාබහ නොහැකි ඉවාන් නම ඇති තරුණයා ද සමඟ මගේ දියණිය ද එහි සේවය කරන අය අතර වෙති.