බර්ලිනයේ සිට ලියමි

ජර්මනියේ බර්ලින් නුවර දී නෙමෙයි. මේ බර්ලින් ගම තියෙන්නෙ ඇමෙරිකාවේ මේරිලෑන්ඩ් ප්‍රාන්තයේ. 1677 දී Burley කියන අයෙක් ඉඩම් කෑල්ලක් අරගෙන උතුර-දකුණ මහා මාර්ගයේ නවාතැනක් ඉදිකරනවා. “Burley Inn” තමයි මේ බර්ලින් නගරය බවට හැරෙන්නෙ.

1890 -1900 ගණන් වල ඉදි වූ ගොඩනැඟිලි අදත් පාවිච්චි කරන ගමේ පින්තූරයි මේ සටහනට ඇතුලත් කරන්නෙ. දියුණු තාක්ෂණය හා දියුණු නගර වගේ ම, ආමිශ් වැනි පාරම්පරික අඩු තාක්ෂණයෙන් හා ගම්බද ජීවිතයෙන් කාලය ගෙවීමත් එකිනෙක හා අත්වැල් බැඳගෙන ඒම ඇමෙරිකාවේ ලක්ෂණයක්. ඒත් මේ සටහන ඒ ගැන නෙමෙයි. මේක යුරෝපීය සංක්‍රමණික පුරවැසියන් ගැනයි. වෙනස් වෙන්නට අකමැති, එහෙත් නොදැනීම වෙනසකට භාජනය වෙන යුරෝපය ගැනයි. මේ නීත්‍යානුකූලව යුරෝපීය රටවල් වල වාසය කරනා අය ගැන.

2000 වෙද්දි බ්‍රිතාන්‍ය්‍යේ දොස්තරවරු 33.7% ක් ඉපදිලා තියෙන්නෙ වෙන රටක. අයර්ලන්තයේ ඒ ගණන 35.3% ක්; ස්විට්ස්සර්ලන්තයේ 28.1% ක්. 2002 දී තවත් අධ්‍යාපනය හා පුහුණුව වැඩි අයව ගෙන්වා ගන්න සැලැස්මක් Highly Skilled Migrant Program හදපු බ්‍රිතාන්‍ය මේ දිනවල එය නවතා දාල. සුවිසල් සමාජ සංකල්පය මේ දවස්වල බංකොළොත් නිසා.

දැන් ලෝකයේ හැම රටකට ම ඕනා ඉහළ අධ්‍යාපනයක් හා පුහුණුවෙන් වැඩි අයව නෙමෙයි. ජර්මනියට සංක්‍රමණිකයන් ගෙන්වා ගැනීම පටන් ගනිද්දී තුර්කි අය ගෙන්වා ගන්නේ ජර්මානුවන් කරන්න අකමැති වැඩට. තුර්කි අය ජර්මන් ජනගහණයෙන් 2.4% ක්. ඔස්ට්‍රියාවේ ඒ වැඩ කරන්නෙ යුගොස්ලාවියා සහ තුර්කි සම්භවය ඇති අය. 2006 වෙද්දී ඔස්ට්‍රියාවේ ඉන්නා සංක්‍රමණික ජනගහණය රටේ ජනගහණයෙන් 9.8% ක්. ප්‍රංශයේ සංක්‍රමණිකයන් වැඩියෙන් ඇවිත් ඉන්නේ උතුරු අප්‍රිකාවෙන් (ඇල්ජීරියා, ටියුනීසියා, මොරොක්කෝව). 2008 වෙද්දී ප්‍රංශයේ මිලියන 11.8 ක් විදේශයක උපන් සංක්‍රමණිකයන් සහ ඔවුන්ගේ ප්‍රංශයේ ඉපදුන දරුවන්. සංක්‍රමණික පුරවැසියන් රටේ ජනගහණයෙන් 19% ක්.

කතෝලික ආගම අදහන බහුතරය ඉන්නා ඔස්ට්‍රියාවේ දරු උපත් අඩු වී යන්නේ කාලාන්තරයක සිට. දරුවන් හදන්න ඔස්ට්‍රියන් අම්මලාව කැමති කරවා ගන්නට මෙහෙම නීති හැදෙනවා. ගැබ්ගත් පසු දරු උපතට කළින් මාස 8 ක් ද, දරු උපතෙන් පසු මාස 8 ක් ද Schutzfrist නොහොත් ගැබිණි නිවාඩුවක්. ඒ ගැබිණි නිවාඩු කාලයේ රැකියාවක් කිරීම තහනම්. පඩිය 100% ක් ලැබෙනවා.

ඊට අමතරව වසර 1-3 කාලයක නිවාඩු යන්න පුළුවන්. තාත්තාට ද නිවාඩු යන්න පුළුවන්. ඔස්ට්‍රියන් ගැබිණි මවට දෙන පඩිය Wochengeld 2008 දී හැදෙන්නෙ අවසන් මාස තුනේ ලැබි වේතනයේ මුළු එකතුව (net wage) අනුව. නිවාඩු යන්න හා නත්තල් දීමනා ද එයට එකතු වෙනවා. රැකියාව ඇය වෙනුවෙන් ආයතනය ආරක්ෂා කර තිබිය දී වසර 1-3 අතර කාලයක් මාසයකට €436/- පඩියක් එක්ක ගෙදර ඉන්න මවකට අවස්ථාව ලැබුණත්, ඉපදෙන දරුවා වෙනුවෙන් ආණ්ඩුව විසින් දරුවා බලාගන්නා මුදලක් Kinderbetreuungsgeld දුන්නත්, කතෝලික ඔස්ට්‍රියානු කාන්තාවන් අතර එන්න එන්න ම දරු උප්පත්ති අඩු වී යනවා.

යුරෝපීයයන් අතර දරු උප්පත්ති ඔස්ට්‍රියාවේ තරම් නොවූවත් කෙමෙන් කෙමෙන් අඩු වී යද්දී සංක්‍රමණික යුරෝපීයයන් අතර දරු උප්පත්ති ඉහළ යන ප්‍රවණතාවය තමයි දැන් දකින්නට ලැබෙන්නේ. මේ යන වේගයට එසේ සිද්ධ වුවහොත්, යුරෝපීයය සමාජයේ සංක්‍රමණිකයන් වෙතින් හැදෙන පුරවැසියන් යුරෝපීය සමාජයේ බහුතරය වී ඔවුන් තමයි යුරෝපීය සභ්‍යත්වය කොයි අතක ගෙන යනවා දැයි තීරණය කරන්නෙ.

ඔබාමාගේ තාත්තා ඉපදුනේ කෙන්යාවේ. තාත්තලා අම්මලා වෙන රටවල් වල ඉපදුනු අය වුනාට දූලා පුතාලා තමන් ඇමෙරිකානුවන් යැයි හඳුන්වා ගැනීම, ඇමෙරිකාව රටක් හැටියට බිහි වූ දා සිට මුහුණ දුන් දෙයක්. ඇමෙරිකාවේ ප්‍රාන්තයක ඉපිද තව ප්‍රාන්තයක ඉගෙනීම, රැකියා හා පදිංචියට යන අය වැඩියි. නූතනයේ දී සංක්‍රමණික නොවූ යුරෝපීයයන් අතර උපන් ගමෙන් වෙන ගමක පදිංචියට යන අය අඩුයි.

නිකලස් සාකෝසීගේ තාත්තා ඉපදුනේ හංගේරියාවේ. තාත්තා හංගේරියාව හැර දා පැනලා යන්නෙ දෙවැනි ලෝක යුද්ධයෙන් පසුව. සාකෝසී 2006 මැයි මාසයේ Bamako, Mali හි දී immigration choisie නම් ප්‍රංශයට එන අයට තෝරා බේරා පුරවැසි බව දෙන ක්‍රමයක් යෝජනා කළේය.

ඉතින්, සාකෝසී යෝජනාවට විරුද්ධ අය මෙහෙම සිංදු කිව්වහ:

ඔහුගේ නම නිකලස් සාකෝසී ය
ඔහු සංක්‍රමණික තෝරා ගැනීමේ ක්‍රමය සොයා ගත්තේ ය
ඔහු සංක්‍රමණික හංගේරියානුවෙකුගේ පුතෙකි
ගේලික් ඔටුන්නක් දිනා ගන්නට හදන්නෙකි
ශක්තිමත් දේහයෙන් යුතු නීග්‍රෝ ජාතිකයා ඔහුගේ හොඳ දත් සමඟ සදහටම පිටත් වී ගිහින්!
අද, කළු ජාතිකයා විශ්ව විද්‍යාල උපාධියක් සහිත වූ දක්ෂෙයක් වෙන්න ඕනෑය
මේවා තමයි අලුත් වහල් නැවේ අලුත් ප්‍රමිතීන්
ඔහුට ගටක් තිබ්බා ඒක කියන්නට, අප්‍රිකානු සංචාරයක යෙදෙද්දී ම
නිකලස් සාකෝසී!
ඇයි ඔබේ තාත්තා හංගේරියාව දාලා ආවේ?

කාලයෙන් කාලයට එක එක රාජධානි වලට යටත් වූවාට යුරෝපීයයන් ඉන්නේ මම ප්‍රංශ, මම ජර්මන්, මම ඉංග්‍රීසි, මම වේල්ස්, මම ස්කොටිෂ් යන ලේබල් වලින්. ඔවුන් යුරෝපීයයන් බවට පත්වෙන්නේ මෑතක දී. තවම ඒ ලේබල් එකට ඔවුන් හුරු නැහැ.

2014 දී යුරෝපීය යුනියනයේ ඉන්න බ්‍රිතානය්‍යෙන් ස්කොට්ලන්තය වෙන් වෙන්න වෑයමක් ගෙනැවිත්.

ස්කොට්ලන්තයේ ප්‍රධාන ආගම ජනගහණයෙන් 42.4% ක් අදහන ස්කොට්ලන්ත පල්ලියයි. රෝමානු කතෝලික 15.9%; ආගමික බැඳීමක් නැතැයි කියනා අය 27.5%; ඉස්ලාම් 0.8% ක්. ස්කොටිෂ් සුදු අය ජනගහණයෙන් 88.09%; සුදු බ්‍රිටිෂ් අය 7.38%; අනිත් සුදු අය 1.73%; සුදු අයිරිශ් 0.98%; මිශ්‍ර වර්ග 0.25%; දකුණු ආසියානුවන් (පාකිස්තාන, ඉන්දියානු, බංගලාදේශි..) 1.09%; කළු අය 0.16%; චීන්නු 0.32% ක්. විස්තර විකිපීඩියාවෙන්.

ස්කොටිෂ් ස්වාධීන උත්සාහයේ එක පරමාර්ථයක් තමයි ඒ අයට තමන්ගේ නීති හදාගන්නට හැකියාව ලැබීම. අනික රටේ ආරක්ෂාව හා විදේශ ප්‍රතිපත්ති වල දී පරමාණු අවි එහි මුහුදේ නොතැබීමට තීරණ ගත හැකිවීම සහ NATO සම්බන්ධය අත්හැරීමට හැකිවීම. තවත් වැදගත් වූවක් තමයි ස්කොට්ලන්තයේ තෙල් ආදායම ස්කොට්ලන්තයේ වීම!!!

චන්දයකින් කැමැත්ත ප්‍රකාශ කරලා බ්‍රිතාන්‍ය්‍යෙන් අයින් වෙන ස්කොට්ලන්තයට යුරෝපීය යුනියනයේ සාමාජිකත්වයට නැවත අයැදුම් පතක් ඉදිරිපත් කරන්න වෙනවා. බහුතර මතය කරදරයක් නැතිව එය ලැබේවි යන්නයි. ඒත් 2014 වෙද්දි යුරෝපිය යුනියනයේ ඉතිරි වෙන අය කවුරු වේවි ද? ස්කොට්ලන්තය ඒ අයැදුම් පත්‍රය යවාවි ද?!!!

Advertisements