අයිඩහෝ ප්‍රාන්තයේ වොලාස් ටවුම

මොන්ටෑනා ප්‍රාන්තය පහුකරගෙන බටහිරට යද්දී රිදී මිටියාවතේ පතල් කනින දිස්ත්‍රික්කයේ දී හමුවෙන්නෙ අයිඩහෝ ප්‍රාන්තයේ වොලාස් ටවුම. මුහුදු මට්ටමෙන් අඩි 2,728 (මීටර් 831) ක් ඉහළ පවතින ටවුමක්.

රිදී පතල් කනින්නට ආපු අය නිසා හැදිච්ච ටවුමක්. බඩු සහ මගීන් ප්‍රවාහනය පිණිස විවිධ පැති වලින් ආපු දුම්රිය සේවා දෙකක් නැවතුන දුම්රිය ස්ථානයකුත් තිබුණ නිසා එය ටවුමේ අගය වැඩි කළා.

මේ ටවුම පටන් ගත්ත එහි ඉඩම් අයිතිකාරයෙක් වූ කර්නල් ඩබ්ලිව්. ආර්. වොලාස් ගේ නම තමයි ටවුමට වැටෙන්නෙ. පතල් කනින අයගේ කතන්දර වලින් තමයි මේ ටවුමේ ඉතිහාසය හැදෙන්නෙ. ඒ කාලයේ හාරපු රිදී පතල් බලන්න තවමත් සංචාරකයන්ට යන්න පුලුවනි. ඒ කාලයේ පැවති තතු දක්වන කෞතුකාගාර බොහොමයක් අතර පතල් කනින අය වෙනුවෙන් සේවා සැපයූ ගණිකා වෘත්තියේ යෙදුනු අය වෙනුවෙන් වූ කෞතුකාගාරය අපි ගිය දවසේ වහලා.

2010 ජනගහණ සංඛ්‍යා දත්ත අනුව 784 දෙනෙක් ඉන්න ටවුමේ වාසය පවුල් 190 කින් හැදිලා තියෙන්නෙ.

ඇමෙරිකාවේ ගොඩනැඟිලි බොහොමයක ඉස්සරහා පැත්තේ මුදුනක එය නිමැවුන වසර සඳහන් කිරීම අතීතයේ ජනප්‍රිය විලාසිතාවක්. 1800 ගණන් වල අග දී නිම කරන ලද ගොඩනැඟිලි වල එදා එල්ලපු නාම පුවරු තවමත් ඒ විදියට එල්ලා තියෙන හැටිත් දකින්නට පුලුවන් මෙය ඵෛතිහාසික නගරයක් හැටියට සංචාරකයන් වෙනුවෙන් විවෘත වෙලා තියෙන නිසයි.

ටවුම පුරාම ඇවිදින්න පැයක් යන්නෙ නැහැ. Dante’s Peak (1997) චිත්‍රපටිය රූ ගත වෙලා තියෙන්නෙ මෙම ටවුමේ. ටවුම ළඟ තියෙන කන්ද තමයි ගිනි කන්දක් හැටියට ඩිජිටල් වෙනසකට භාජනය වෙන්නෙ. Heaven’s Gate (1980) චිත්‍රපටිය ද මෙහි රූ ගත වූවක්. ලානා ටර්නර් නැමති නිළිය ඉපදිලා තියෙන්නෙත් මේ ටවුමේ.