අරුණි ශපීරෝ‍ වෙතින්

අයුක්තියේ නියැළෙන්නට හැකි අසාධාරණ බලය ඉවත් කරමු

Posted in Uncategorized by arunishapiro on මාර්තු 22, 2015

බ්‍රිතාන්‍ය යටත් විජිතයක් ලෙසින් සිට නිදහස ලැබුවත් ලංකාවේ ජනතාව දාස භාවයට යන පාරේ තවත් දිගටම ගමන් කිරීම නවතා දමා නැත. රත්තරන් වෙරළේ වැසියන් මෙන්ම ලංකාවේ වැසියන් ද ප්‍රයෝජනවත් මෝඩයින්ට රැවටී කල් ගෙවති.

මේ මෝඩයන් පාලන බලයෙන් පන්නා දැමීමෙන් ඵලක් නොවේ. මේ මෝඩයන් බලයෙන් පහ කර ගෙදර යැව්වාම වෙන්නේ ඔවුන් වෙනුවට වෙනත් මෝඩයන් ඒ තැන් වලට රිංගා ගැනීම පමණකි. මෝඩයන් කියා බනින්නට පුළුවන්කම පවා තහනම් කිරීම මෝඩයන්ගේ ගතියයි.

දුරාචාරය පිරි වෙළඳපොල යැයි බොරැ කියා හංවඩු ගසා, එය පාලනයට සදාචාරයෙන් පිරුණු ආණ්ඩුවක් සෙවීමේ නිශ්ඵල වෑයම තුල තවත් කොපමණ කාලයක් ලැග ඉන්නවා ද?

යම් පුද්ගලයෙක්ට කළ නොහැකි කර්තව්‍යයක් පටවා එය කරන්නට යැයි කීමෙන් ඵලක් නැත. මෙය වැඩි වාදයකින් තොරව බොහෝ දෙනෙක් පිළිගනිති. මන්ද, සෑම පුද්ගලයෙක්ම පාහේ යම් යම් දේ කරන්නට නොහැකි අයව දන්නා හඳුනන නිසයි.

එහෙත් එසේම ආණ්ඩුවකට ද කළ නොහැකි කර්තව්‍යයක් බාර දී ප්‍රතිඵල බලාපොරොත්තු විය නොහැකි යැයි කියද්දී, එය පිළිගන්නට බහුතරය අකමැති වෙති. ආණ්ඩුවක් විසින් පොරොන්දු වූ පරිදි ඉටු කර නැති අවස්ථා ඕනෑ තරම් දන්නා අයෙක් වුවත්, මේ ආණ්ඩුවට බැරි වුනාට වෙන ආණ්ඩුවකට පුළුවන් යැයි පමණක් තවත් දිගින් දිගටම කියමින් සිටියි.

එසේ සිටින්නේ තමන් ඉදිරියේ අතපය බැඳ දමා හිරකර තබද්දී වුවත් සදාචාරාත්මක ලෙසින් ප්‍රතිඵල ගෙනෙන වෙළඳපොල නම් යාන්ත්‍රණය නොදැක්කා සේ ය.

වෙළඳපොල දුරාචාරයෙන් පිරි වූවක් යැයි ද, ජනතාව ඉදිරියේ පවතින හැම වැරැද්දක්ම ධනේශ්වරයේ ඵලවිපාකය යැයි ද කියන අය වැඩියෙන් පැතිර සිටිය දී, ඒ මිථ්‍යාවෙන් අන්ධ වූ මිනිසුන්ට සත්‍යය දකින්නට නොහැකියි.

ධනේශ්වරයේ ඵලවිපාකයන් දකින්නට ඇත්තේ බටහිර දියුණු රටවල් වලයි. ධනේශ්වර වන්නට සොච්චමක් සමත් වෙද්දී, බහුතරයක් වූ දුප්පත් මිනිසුන්ගේ ජීවිත සමෘද්ධිමත් වෙති.

යහපාලනයට හැකියාව ඇති සොච්චමක් සොයන හැදියාවක් ධනේශ්වරයට එරෙහි වූවන්ගේ හුරු පුරැද්දක් වුවත්, ධනවත් වෙන්නට හැකියාව ඇති සොච්චමක් පමණක් ලොව සිටින බව ඔවුන් පිළිනොගනිති. ඒ සොච්චම විසින් මහත් ධනස්කන්ධයන් රැස් කරන්නට සමත් වෙද්දී අනෙක් සියළු දෙනාගේ ද ජීවිත සමෘද්ධිමත් වෙන බව ද ඔවුන් පිළිනොගනිති.

අධර්මිෂ්ඨ ආණ්ඩුවක රැකවරණයෙන් පමණයි දුරාචාර ධනේශ්වරය එළිබහින්නේ. එවිට යුක්ති සහගත අන්දමින් මහත් ධනස්කන්ධයක් උපයා ගැනීමේ හැකියාව පුරවැසියාට අහිමි වී යයි.

ගණුදෙනුවක් හෝ හුවමාරැවක් සිද්ධ වෙන්නට නම් යුක්ති සහගත බවක් පදනම් විය යුතුයි. අයියෝ ඕක සාධාරණ මිලක් නෙමෙයි කියා තමන් සමඟ කේවල් කරන වෙළෙන්ඳා වෙතින් ඉවත් වී යන අවස්ථා කොතරම් අත්දැක තිබෙනවා ද? ඒත් ඒ මිල සාධාරණ නැතැයි කියන පාරිභෝගිකයා, ඒ වෙළෙන්ඳා විසින් විකුණන්නට තබා ඇති බඩුව බලහත්කාරයෙන් පැහැර ගෙන යන්නේ නැත. එහෙම යන අයව අපි හඳුන්වන්නේ පාරිභෝගිකයෙක් කියා නොව හොරෙක් කියායි. මංකොල්ලකාරයා කියායි.

මිල මුදල් වලට බඩු භාණ්ඩ ගණුදෙනු කරන ජනතාව ඒ නිසා හොරැන් ගෙන් වෙනස් වූවන් වෙති. ඔවුන් ආචාර ධාර්මික වූ අයයි. අනිත් අයගේ දේපල අයිතියට ගෞරවයක් දක්වන අයයි.

ගණුදෙනුවක් කරන්නේ නීතිය අනුගමනය කරන නිසයි. සදාචාරාත්මක බැඳීමකින් සිටින නිසයි. ගණුදෙනුවක් සිද්ධ වෙද්දී සම්පත් එක් අයෙකු වෙතින් තවත් අයෙකුට පැවරීමක් සිදුවේ. ගණුදෙනුවක් නැත්නම් හැමෝම තමන් සතු වූ දේවල් වල අයිතිය තබා ගනිති. ගණුදෙනුවක් වෙන සෑම අවස්ථාවකම දී ම එය සිද්ධ වෙන තැන වෙළඳපොලක් කියා හැඳින්වේ. පොල, කෝපි කඩේ, සුපර් මාකට්, වෙළඳ සංකීර්ණය හෝ අන්තර්ජාලය ද ගණුදෙනුවක් සිද්ධ වෙන්නේ නම් එතැන යුක්තිගරැක වෙළඳපොලකි.

යුක්තිගරැක ස්වභාවය නිසා පමණක් මිනිස්සු වෙළඳපොලේ ගණුදෙනු කරන්නට පෙළඹී නැත. තමන්ගේ සිතුම් පැතුම් පමණක් නොව අනුන්ගේ සිතුම් පැතුම් ගැන ද කල්පනා කර බලන්නට හැකියාවක් ඇති එකම සත්වයා මිනිසායි. වෙළඳපොල අපිට ඒ ඉඩකඩ පාදා දෙයි.

හංදියේ කඩෙන් කන හැම වතාවකම අයෙක් රෝගී වෙනවා නම් ඒ හංදියේ කඩෙන් ආහාර ගැනීමෙන් ඒ පුද්ගලයා වැළකෙයි. ඔහු අනිත් අයටත් අනතුරැ අඟවයි. ඒ හංදියේ ආහාර රස නැත්නම් එක පාරක් ආහාර ගත් අයෙක් නැවතත් එහි ගොඩ නොවදියි. අනිත් අයටත් දැනුම් දෙයි. වැඩිකල් නොගිහින් හංදියේ කඩය බංකොළොත් වී යයි.

ගණුදෙනු කරන අයට අනුන්ගේ තැනට තමන්ව දමා ඔවුන්ගේ රැචි අරැචිකම් මොනවා වේදැයි සොයා බලන්නට ඉඩ ප්‍රස්ථාව වෙළඳපොල විසින් සපයන්නකි.

ප්‍රචණ්ඩත්වය වෙනුවට වෙළඳපොල කැමැත්තෙන් කරන ගණුදෙනු වලට ඉඩ පාදයි. සමාජයක සාමාජිකයන් ලෙසින් අනිත් අය ගැනත් සලකා බලන්න යැයි නිතරම මතක් කිරීමක් සිද්ධ කරයි.

එහෙත් වෙළඳපොල යනු යුක්ති සහගත, සදාචාර ගණුදෙනු වලට ඉඩ ලැබෙන තැනක් නොවේ යැයි ජනතාව රැවටී සිටිති. ඒ නිසා කැමැත්තෙන් ගණුදෙනු කරන නිදහස් මිනිස්සු අතර මැද්දට පැන ඒවා කෙසේ කවුරුන් විසින් සිද්ධ කළ යුතු දැයි තීරණය කරන්නට බලලෝභීන් පිරිසකට බලය දී ඇත.

බලලෝභීන්ට බලය පිරිනමන්නට නිදහස් ජනතාවක් රවටා තිබීම යනු මිනිස්සුන්ව කොයි තරම් වහල් බවකට ඇද දමා තිබීමක් ද?!!!

හැමදාමත් කරන මේ මෝඩයන් පළවා හැර වෙන මෝඩයන් පත් කරගන්නවා වෙනුවට අයුක්තියේ නියැළෙන්නට ලැබෙන අසාධාරණ බලයක් ඔවුන්ට පැවරීමෙන් වැළකී සිටීම ඊට වඩා සුදුසු නැද්ද?!!!

මාර්තු 31 වැනිදා පෙව 11 ට කොළඹ 5, ශ්‍රී සම්බුද්ධ ජයන්ති මන්දිර ශාලාවේ දී පැවැත්වෙන “ධනවාදයේ සදාචාරාත්මක බව” දේශනයේ කථිකයා වන ටොම් ජී. පාමර් ලියූ “වෙළඳපොල ගැන මිථ්‍යාවන් විස්සක්” යන ලිපිය ඇසුරිනි.

Advertisements

One Response

Subscribe to comments with RSS.


ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න / වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න / වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න / වෙනස් කරන්න )

Google+ photo

ඔබ අදහස් දක්වන්නේ ඔබේ Google+ ගිණුම හරහා ය. පිට වන්න / වෙනස් කරන්න )

%d bloggers like this: