අරුණි ශපීරෝ‍ වෙතින්

අවදානමක් ගත්තා නම් අද කොහොමද?

Posted in Uncategorized by arunishapiro on පෙබරවාරි 12, 2021

බිට්කොයින් යනු බුබ්බුලයක් යැයි ද එය පුපුරා යාවි යැයි ද කියා සිතීම සාධාරණ වූ සැකයකි. ඊට අවදානමක් ගන්නා ඕනෑම පුද්ගලයෙක් එය එසේ නොවන්නේය කියා කියන්නේ නැත.

ටෙස්ලා කොම්පැණිය විසින් පහුගියදා බිලියන 1.5 කට බිට්කොයින් මිල දී ගැනීම නිසාත්, අනාගතයේ දී බිට්කොයින් දී ටෙස්ලා වාහන මිල දී ගන්නට හැකියාව පාදන බව ප්‍රචාරය වීමත් නිසා ඒ ගැන ඇති අවධානය ඉහළ යන්නටත්, ඒ නිසාම බිට්කොයින් මිල ඉහළ යෑමත් දකින්නට ලැබුණි.

බිට්කොයින් ගැන බ්ලොග් සටහනක් මම මුලින්ම එකතු කරන ලද්දේ 2013 දී ය. ඉන්ටනෙට් හරහා බිට්කොයින් වලින් සිද්ධ වූ පළමු ගණුදෙනුව, එනම් (Laszlo Hanyecz) බිට්කොයින් දහදාහකට පිට්සා දෙකක් මිල දී ගැනීම ගැන ඒ සටහනේ ලියුවෙමි. බිට්කොයින් වලින් පිට්සා මිල දී ගන්නට කැමැති යැයි ලැස්ලෝ ඉල්ලීමක් ඉන්ටනෙට් හි සටහන් තබයි. 2010 මැයි 22 දින ඒ ඉල්ලීම සපුරාලන්නට බාර ගන්නා jercos විසින් බිට්කොයින් දහදාහකට පිට්සා දෙකක් ලාස්ලෝට ඩිලිවරි කරන්නට එකඟ විය.

එදින පටන් බිට්කොයින් පරිහරණය කරන්නන් අතර මැයි 22 දිනය “බිට්කොයින් පිට්සා දිනය” හැටියට හැඳින්වෙන්නට පටන් ගැනුණි.

එසේම බිට්කොයින් දහදාහක් සඳහා ලබාගත් පපා ජෝන්ස් පිට්සා දෙකේ දවසේ වෙළඳපල අගය කුමක්දැයි කියා දක්වන @TheBitcoinPizza නමින් ට්විටර් ගිණුමක් ද ඇත. එයට අනුව මෙය ලියද්දී ඒ 2010 ගණුදෙනුවේ පිට්සා දෙකේ දැන් අගය ඇමෙරිකන් ඩොලර් 468,681,974.75 කි.

මෙය ලියද්දී බිට්කොයින් එකක් ඇමෙරිකන් ඩොලර් 47,753.30 කි.

2010 ජූලි 28 දා බිට්කොයින් ගැන දන්නා අය අතලොස්සක් වූ කාලයේ දී එකක් ගන්නට ආයෝජකයන් ගෙව්වේ සත 6 කි. 2011 දී එය $3.19 කි. 2012 දී එය $13.54 කි.

මම මෙහි ප්‍රථම බිට්කොයින් සටහන පළ කරන්නට ඒ ගැන තතු සොයද්දී බිට්කොයින් එකක් $300 ක් පමණ විය. ඒ වසරේ මම සහභාගී වූ ඔස්ට්‍රියන් අර්ථ ශාස්ත්‍ර සම්මන්ත්‍රණයක දී හිතවතුන් අතර බිට්කොයින් නොමිලේ බෙදා දුන් අය සිටියහ. ඔවුන් කතා කළේ ඒවායෙන් මිල දී ගත හැකි භාණ්ඩ තියෙන්නේ කොතැනකදැයි කියායි. ආයෝජනය සඳහා තබා ගැනීම ගැන කතා කළ අය සිටියේ ඉතා අල්පයකි. බොහොමයකට එය හුවමාරු මුදලක් කිරීමේ දැඩි උවමනාවක් ඇති බව පෙනිණ. 2013 දෙසැම්බර් මාසයේ දී ප්‍රථම වරට බිට්කොයින් මිල සැබෑ ඉහළ යෑමක් පෙන්නුම් කළේය. බිට්කොයින් එකක් $638 ක් විය.

අලුතින් එන ඩිජිටල් මුදල් වලින් යම් ප්‍රමාණයක් නොමිලේ බෙදා හරිමින් ඒවා ප්‍රචලිත කරන්නට ගන්නා උත්සාහයන් අද පවා දකින්නට ලැබේ. ආයෝජන කරන අය එකම තැනක සියළු වත්කම් තියාගන්නට අකමැතියි. ඒ නිසා මෙවැනි වෑයම් වෙත ඇදී යන අය නොමඳව සිටිති. වත්කම් වැඩි කරගන්නට අවදානම් නොගෙන නොහැකියි. ඒත් තමන් ගන්නා අවදානම් මොනවාදැයි කියා හැකි තරම් දුරකට සොයා බලන්නට අවදානම් ගන්නට යන්නා දැන සිටිය යුතුයි.

ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න /  වෙනස් කරන්න )

Google photo

ඔබ අදහස් දක්වන්නේ ඔබේ Google ගිණුම හරහා ය. පිට වන්න /  වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න /  වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න /  වෙනස් කරන්න )

%d bloggers like this: