අරුණි ශපීරෝ‍ වෙතින්

ඕවර්ටන් ජනේලය

Posted in Uncategorized by arunishapiro on පෙබරවාරි 16, 2021

ආධුනිකයන් විසින් වෘත්තීය පුහුණුව ලද අයට වඩා හොඳින් ප්‍රතිඵල පෙන්නනවා නම් ඒ වෘත්තියේ කුමක් හෝ අඩුපාඩුවක් ඇති බව පෙන්වා දුන්නේ තෝමස් සෝල් (Thomas Sowell) නම් ඇමෙරිකන් අර්ථ ශාස්ත්‍රඥයායි.

එය තව දුරටත් පැහැදිලි කරන්නට ඔහු වෛද්‍ය වෘත්තියෙන් උදාහරණයක් ගෙන දක්වයි. වෛද්‍ය අධ්‍යාපනයක්, පුහුණුවක් නැතිව ගෙදර කුස්සියේ ඇති පිහි වලින් සැත්කම් කරන්නට ඉස්පිරිතාලයේ ඉන්නා වෛද්‍යවරැන්ට වඩා හොඳ හැකියාවක් ඇත්නම් සම්පූර්ණ වෛද්‍ය වෘත්තියම අපකීර්තියට පත් වේ.

එහෙත් වර්තමානයේ දී අධ්‍යාපනය සපයන්නට කිසිත් පුහුණුවක් නොමැති දෙමව්පියන් ගෙදර පාසැල් වලින් තම දරැවන්ට උගන්වා ඉහළ උපාධි ඇති මහා වැයක් දරන පාසැල් ක්‍රමයට වඩා සාර්ථක ප්‍රතිඵල ලබන්නට සමත් වෙති. ඒත් තවමත් අපි මේ අධ්‍යාපනය බෙදන වෘත්තියේ යෙදෙන අයව ඒ ගැන මහා දැනුමක් සතු විශේෂඥයන් හැටියට සලකමු.

මෙවැනි තත්වයක් උදා වී ඇත්තේ මධ්‍යම සැලසුම් ක්‍රමයකින් ආර්ථිකය හසුරැවන්නට යන නිසා බව තෝමස් සවෙල් පැහැදිලි කරයි.

ඉහළ අධිකාරියකින් සැමට බලපාන තීරණ ගෙනෙද්දී, අධ්‍යාපන දෙපාර්තමේන්තුවකින් කුමන විෂයයන් සමත් විය යුතු ද නැද්ද හෝ කුමන විෂයයන් අධ්‍යයනය කළ යුතු ද නැද්ද යනාදිය තීරණය වෙද්දී ඒවායේ සැලසුම් හදන්නට උපදෙස් දෙන විශේෂඥයන් මහා විශාල සංඛ්‍යාන දත්ත දිහා බලමින් ඒ තීරණ ගෙනෙති. ඔවුන් නිරීක්ෂණයට ගන්නා ඒ දත්ත සමූහය සාමාන්‍ය ජනතාවට වටහා ගත නොහැකියි. ඔවුනට ඒවා දකින්නට ද ලැබෙන්නේ නැත.

කාලයෙන් කාලයට ඔවුන්ගේ ක්‍රමය වෙනස් කරද්දී මේ මධ්‍යම සැලසුම්ගත ආර්ථිකයන් තමන්ගේ අසාර්ථක තත්වයන් වසා ගන්නේ ඒවා කළින් ආණ්ඩුවේ ප්‍රතිපත්ති යැයි දක්වමිනි. නැත්නම් “අලුත්” “යහපත්” “නවීන” සමාජයක් ගොඩනඟන්නට වෙනත් ප්‍රතිපත්ති ගෙන ආ යුතු යැයි කියමිනි.

නිදහස් වෙළඳපොල ආර්ථිකයන්ට වඩා මහත් පසුපසකින් මේ මධ්‍යම සැලසුම්ගත ආර්ථිකයන් සිටින බව නොකියා මේ විශේෂඥයන් ඒ හැමදාම ගෙනෙන සැලසුම් වල අසාර්ථක බව පටවන්නේ ඔවුන්ගේ සැලසුම් හැදීමේ ක්‍රමය මත නොව වෙනත් කුමන හෝ කාරණයටයි.

වෙළඳපොලට තීරණය කරන්න ඉඩක් නොදෙන විට කොතරම් ඉහළ උපාධි තිබුණත්, කොතරම් දත්ත එකතු කළත්, කොතරම් සැලසුම් හැදුවත් ආර්ථිකය සාර්ථක බවක් කරා ගමන් කරන්නේ නැත. ආර්ථිකය දුර්වල වෙද්දී ඒකීය පුද්ගලයන්ට ද පැහැදිලි ආදායම් මාර්ගයක් තෝරා ගැනීමේ හැකියාව මැකී යයි. එවිට ඒ ඒ කාලයට ආණ්ඩුවෙන් කියන ඒ ඒ විෂය හදාරා ඊ ළඟට රැකියාවක් ආණ්ඩුවෙන්ම ලබා දෙන තුරැ බලා සිටින්නට සිද්ධ වේ.

ජෝසෆ් පී. ඕවර්ටන් නැමැත්තා මිචිගන් හි මහජන ප්‍රතිපත්ති සඳහා වූ මැකිනැක් කේන්ද්‍රයේ විධායක තනතුරක් දරන කාලයේ නිදහස් වෙළඳපොල වෙනුවෙන් පෙනී සිටින සංවිධාන වල අරමුණ පැහැදිලි කරන ක්‍රමයක් නිර්මාණය කළේය. මෙය ඕවර්ටන් ජනේලය හැටියට හැඳින්වේ. ඕවර්ටන් ජනේලය කියන්නේ ප්‍රතිපත්ති සාධනයේ දී හමුවෙන ඕනෑම ගැටළුවක් ඉදිරියේ එය නිරාකරණය කරන්නට පිවිසෙන ක්‍රම මහත් සංඛ්‍යාවක් තිබෙන බව පෙන්වීමයි. ඒවා අක්ෂ රේඛාවක පිළිවෙලකට තැබිය හැකියි.

ආණ්ඩු පාලනය අවශ්‍ය යැයි කියන විසඳුම් (මෙය නිදහස් වෙළඳපොල සංවිධාන වෙනුවෙන් සකස් කරන ලද්දක් බව නැවත මතක් කරමි) එහි වැටෙන්නේ අවසානයටයි. ඒකීය පුද්ගලයාට නිදහස සහ වගකීම ලැබෙන විසඳුම් මුලින් තිබේ.

ඕනෑම ප්‍රතිපත්ති සම්පාදනයක දී දේශපාලනඥයන් මේ විසඳුම් වලින් උපකුලකයක් පමණක් ප්‍රායෝගික ඒවා යැයි සලකති.

අධ්‍යාපන ප්‍රතිපත්ති සැකසීමේ දී එක් අන්තයක පවතින උදාහරණයක් නම් රජයේ පාසැල් වලට පමණක් ඉඩ දී පුද්ගලික පාසැල් තහනම් කිරීමය. අනෙක් අන්තයේ ඇත්තේ රජයේ පාසැල් අධ්‍යාපනය බෙදීමෙන් සහමුලින් ඉවත් වීමය.

බොහෝ සමාජ වල මේ අන්ත දෙක සාකච්ඡාවට ලක්වෙන්නේ නැත. අධ්‍යාපන ප්‍රතිපත්ති ගැන කතාබහේ දී හැම විටම කතාබස් වෙන්නේ රජයේ පාසැල් වලට කොතරම් ප්‍රමාණයකින් අරමුදල් වැඩි කළ යුතු ද යන්න ගැනයි.

මේ ගැන කතාබහක් සමාජයේ පටන් ගැනෙද්දී, මෙතෙක් කාලයක් එක අන්තයක් පමණක් දැන සිටි ජනතාවකට, එනම් රජය පමණක් අධ්‍යාපනය බෙදන්න දන්නවා යැයි විශ්වාස කළ ජනතාවක් අනෙක් ආකාර ගැන කතාබහට ඉඩක් පාදා ගනිති. අනතුරැව ඔවුන් තම රජයෙන් තමන් කැමති වෙනත් ආකාර වලින් අධ්‍යාපනය ලබා දිය නොහැකි මන්දැයි විමසන්නට හා ඉල්ලා සිටින්නට පටන් ගනිති.

රටේ පාලන බලයේ සිටීමට නම් ජනතාව කැමති දේවල් කරන්නට සිද්ධ වෙන නිසා, රජයක් ජනතාවගේ ඉල්ලීමට සවන් දෙන්න උත්සාහයක් ගනියි. ඒත් හැමදාම ඉල්ලන්නේ අරමුදල් වැඩි කරන්න කියා පමණක් නම්, එය රජයට කරදරයක් වුවත් සතුටු කරදරයකි. කාලයෙන් කාලයට පොඩ්ඩක් පොඩ්ඩක් අධ්‍යාපන සඳහා වැය කරන අරමුදල් ඉහළ යවමින් අපි කොතරම් ඇප කැප වී අධ්‍යාපනය බෙදනවා දැයි කියන්නට පුළුවන්කම ලබා ගනිති.

ඉතින් මෙන්න අධ්‍යාපනය සපයන ආකාර සඳහා දේශපාලන ප්‍රතිපත්තියක් පෙන්වන ඕවර්ටන් ජනේලයක්:

-රජයේ පාසැල් කිසිවක් නොතිබීම
-තමන් තෝරන අධ්‍යාපන සඳහා පමණක් දෙමව්පියන් වැය දැරීම
-පුද්ගලික හා ගෙදර පාසැල් රෙගුලාසිකරණයෙන් තොරව විපරමින් පමණක් සිටීම
-ටියුෂන් ගාස්තු සඳහා බදු සහන
-ටියුෂන් ගාස්තු සඳහා රජයෙන් වවුචර පත්
-පුද්ගලික හා ගෙදර පාසැල් අඩු රෙගුලාසිකරණයෙන්
-රජයේ මුදලින් එහෙත් ස්වාධීනව පැවැතෙන පාසැල්
-රජයේ පාසැල් කැමති එකක් තෝරාගැනීමට අවසර
-රජය මඟින් නියෝග කරන අධ්‍යයන පරිපාටිය අනුගමනයට සිද්ධ වීම
-පුද්ගලික හා ගෙදර පාසැල් ඉතා දැඩි රෙගුලාසිකරණයට යටත් වී. දෙමව්පියන් දෙවතාවක් වැය ගෙවීම
-ගෙදර පාසැල් තහනම්
-පුද්ගලික පාසැල් තහනම්
-රජයේ පාසැල් පමණකින් අනිවාර්ය අධ්‍යාපන වැඩ සටහනක් ලැබීම

තව විස්තර සඳහා මෙතැනින් ගිහින් බලන්න: http://www.mackinac.org/OvertonWindow

අඩු රෙගුලාසිකරණයෙන් යුතු, එනම් ගෙදර දී ඉගෙන ගන්නා බවට දෙමව්පියන් සහතිකයෙන් කැමති කෙනෙකු වෙතින් අධ්‍යාපනය ලබා රජය පවත්වන විභාගයට පෙනී සිටින්නට ඉඩ ලැබෙන ක්‍රමයක් හෙවත් ගෙදර පාසැල් ක්‍රමයකට (home school) ඉඩ ලැබෙනවා නම් වර්තමාන ලංකාවේ අධ්‍යාපනය වෙනුවෙන් කියා නාස්ති වෙන වැයෙන් මහා විශාල ප්‍රමාණයක් ඉතිරි කරගන්නට හැකියාව ලැබේ. ඒ ඒ විෂයයන් උගන්වන දක්ෂ ගුරැවරැන්ට අන්තර්ජාලයෙන් මහා පිරිසකට එකවර පාඩම් උගන්වා නව ආදායම් මාර්ග ඇති කරගන්නට හැකියාව පෑදෙනු ඇත. වෙළඳපොලට ටිකක් හෝ ඉඩක් ලබා දෙන විට වෙළඳපොල විසින් අපූරැ ආකාරයෙන් අඩු වැයෙන් වැඩි ප්‍රතිඵල සපයන්නට සමත් වෙයි. මන්ද, වෙළඳපොල යනු සංඛ්‍යාන දත්ත දිහා බලා අනුන්ට සැලසුම් හදන විශේෂඥයෙක් නොව ඒ ඒ අයට ඒ ඒ අවස්ථාවේ දී වැඩියෙන්ම වටිනාකමක් ඇත්තේ කුමක් ද එය සපයන්නට හැඩ ගැසෙන, අපි සියල්ලන්ගේම කැමැත්ත හා අකමැත්ත සොයා බලා අඩුපාඩු පුරවන්නට දත්, අපූරැ යාන්ත්‍රණයක් නිසයි.

ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න /  වෙනස් කරන්න )

Google photo

ඔබ අදහස් දක්වන්නේ ඔබේ Google ගිණුම හරහා ය. පිට වන්න /  වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න /  වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න /  වෙනස් කරන්න )

%d bloggers like this: