අරුණි ශපීරෝ‍ වෙතින්

ෆිඩෙල් කැස්ත්‍රෝ

Posted in Uncategorized by arunishapiro on නොවැම්බර් 30, 2016

cuban-hall-of-fame-a-full-wall-mural-of-fidel-castro මේවායේ ඇත්ත නැත්ත සොයාගත හැකි මූලාශ්‍ර ඕනෑතරම් අන්තර්ජාලයේ තිබුණ ද, මන්තර ගුරුකම් වලින් වස්කම් විස්කම් කරන අයට හිනාවෙන පිරිස අතරේ ද කැස්ත්‍රෝගේ කියුබාව යනු පැසසුම් ලැබිය යුතු රටක් යැයි මුලාවී සිටින අය දකින්නට හැකියි. මේ සටහන ඒ අය සඳහා නොවේ. යමක සත්‍ය අසත්‍යතාවය සොයා දැනගන්නට කැමති අයටයි මේ තොරතුරු ලියන්නේ.

ෆිඩෙල් කැස්ත්‍රෝ මිය ගිය බව අසා හිතා නොබලා ශෝක ප්‍රකාශයක් නිකුත් කළ කැනඩාවේ ‘සෙල්ෆි අගමැතිවරයා’ හොඳ හැටියට “නා ගත්තේය.” ප්‍රජාතන්ත්‍රවාදී රටක නායකයා වූ ජස්ටින් ටෲඩෝ ළිං මැඩියෙක් සේ නිකුත් කළ ප්‍රකාශයට පිළිතුරු වශයෙන් අන්තර්ජාලයේ #TrudeauEulogies නමින් උත්ප්‍රාස ප්‍රකාශ ලිවීමේ රැල්ලක් පැතිර ගියේය.

විවිධ රටවල අභ්‍යන්තර කටයුතුවලට මැදිහත්වන ඇමෙරිකාවේ උගුල් වලට හසු නොවන්නට සමත් වූ පමණින් අයෙක් කීර්ති ප්‍රශංසාවට පාත්‍ර විය යුතු යැයි සිතන අය එඩ්වඩ් ස්නෝඩන් හෝ ජූලියන් අසාන්ජ්ට එවැනි තත්වයක් දෙන්නට ඉදිරිපත් නොවෙති.

ඔවුන්ට කියුබන් විප්ලවය පාවා දුන් ෆිඩෙල් වීරයෙකි. කියුබන් වැසියන් 3,615 වෙඩි තබා මරා දැමූ ෆිඩෙල් වීරයෙකි. ඒ හැරෙන්නට සුවිශේෂ උසාවි පිහිටුවමින් 1,253 ක් ඝාතනය කළ ෆිඩෙල් වීරයෙකි. 1966 දී සිවිල් හා හමුදා සොල්දාදුවන්ගේ ලේ පයින්ට් හතක් බැගින් බලහත්කාරයෙන් ගෙන පයින්ට් එකක් $50 කට බැගින් මුදල් වලට කොමියුනිස්ට් වියට්නාමයට විකුණූ ෆිඩෙල් වීරයෙකි. කියුබන් වැසියන් රටෙන් පළා යන්නට තැත් කරද්දී ඔවුනට වෙඩි තැබූ, සිරගත කළ, මරණ දණ්ඩනය නියම කළ, නැව් මුහුදුබත් කළ ෆිඩෙල් වීරයෙකි. ඇමෙරිකාව අනෙක් රටවල අභ්‍යන්තර කටයුතු වලට ඇමෙරිකන් සොල්දාදුවන් යවද්දී විරෝධතාවය දක්වන අයට, ඩොලර් මිලියන 500 ක් දක්වා වාර්ෂික මුදල් සහනාධාර 1981 දී පටන් ලබාගනිමින් ඇන්ගෝලාවේ යුද කටයුතු සඳහා කියුබන් හමුදා යැවූ ෆිඩෙල් වීරයෙකි. වෛද්‍යවරු, ගුරුවරු, ගොඩනැඟිලි ඉදිකරන ශ්‍රමිකයන්, විද්‍යාඥයන්, ඉංජිනේරුවන් සහ වෙනත් වෘත්තිකයන්ව බලහත්කාරයෙන් රටවල් 91 ක සේවයට පටවා වාර්ෂිකව ඩොලර් බිලියන 8.2 ක් ලබාගන්නා ෆිඩෙල් වීරයෙකි.

කෙටියෙන් කිව්වොත්, මිනිස්සු මැරුවාට කමක් නැත. ඔවුන්ට පළා යන්නට ඉඩ නොදුන්නාට කමක් නැත. ඔවුන්ගේ ශ්‍රමය බලහත්කාරයෙන් සොරාගත්තාට කමක් නැත. වාමාංශිකයෙක් නිසා ෆිඩෙල් වීරයෙකි.

1936 සිට 1938 දක්වා කාලය රැසියාවේ මහා භීෂණය සිද්ධ වූ කාලය හැටියට සැලකේ. එහි මූලිකත්වය ගත් ජෝසෆ් ස්ටාලින්ටත් වඩා වැඩියෙන් දේශපාලන සිරකරුවන්ව සිරබන්ධනයේ තැබීම ෆිඩෙල් කැස්ත්‍රෝ අතින් සිද්ධ විය. ෆිඩෙල් බලයට පැමිණි පළමු වසර 3 දී ඔහු මරා දැමූ කියුබන් වැසියන් සංඛ්‍යාව හිට්ලර්ගේ ජර්මනියේ පළමු වසර හයේ දී මරා දැමූ ජර්මන් වැසියන් සංඛ්‍යාවට අධික වේ. නැගෙනහිර ජර්මනියෙන් පළා යන්නට තැත් දරා මිය ගිය සංඛ්‍යාවට වඩා විසි ගුණයකට වැඩි කියුබන් වැසියන් කියුබාවෙන් පළා යන්නට ගත් උත්සාහයන් තුලින් මිය ගියහ.

පාසැල් ගුරුවරයෙක් වූ හියුබර් මාතොස් බතීස්තා පළවා හරිනු පිණිස පටන් ගත් ගරිල්ලා ව්‍යපාරයේ සටන් වැදුනෙකි. 1959 ජනවාරි 8 වැනිදා ෆිඩෙල් සමඟ කියුබන් විප්ලවයේ ජය සමරන ලද්දෙකි. එහෙත්, “අපි කොමියුනිස්ට් නොවේ,” කියාගෙන බලයට ඇවිත් අනතුරුව මැතිවරණ පැවැත්වීමෙන් ෆිඩෙල් අයින් වෙද්දී මාතොස් සිය තනතුරෙන් ඉල්ලා අස් වූයේය. මාතොස්ව ඝාතනය කරන්නට රාවුල් සහ චේ ඉදිරිපත් වූහ. නමුත් මරාදැමුව හොත් ඔහු කියුබානුවන් අතර මෘතවීරයෙක් වේ යැයි කියූ ෆිඩෙල් මාතොස්ව වසර 20 ක් හිරේ දැම්මේය. හිරෙන් එළියට ආ පසු මාතොස් රටින් පිටවීය.

මැතිවරණයක් නොපවත්වා, විරුද්ධ වෙන අය සියල්ලන්වම එක්කෝ ඝාතනය කරමින් නැත්නම් හිරේ දමමින්, වසර 50 ක් රටේ පාලන බලය අල්ලාගෙන සිටි ෆිඩෙල්ව වාමාංශිකයනට පෙනෙන්නේ මහා පෞරුෂයෙන් පිරුණ පුද්ගලයෙක් හැටියටයි. ලෙනින්, ස්ටාලින්, මාඕ යනාදීන් සැබෑ මාක්ස්වාදය රට පාලනයේ දී යොදාගත් පුද්ගලයන් නොවන බව කියා සිටිනවුන් පවා ෆිඩෙල් ගැන ගුණ වර්ණනා ලියති.

රෙයිනාල්ඩෝ අරිනාස් යනු ෆිඩෙල් සිරගත කළ ලේඛකයෙකි. රෑ පාත්වෙන්නට පෙර (Before Night Falls) නමින් ලියූ ජීවිත සටහන් වලින් තමා සිරබත් කෑ හැටි ගැන ඔහු සටහන් තබයි. ෆිඩෙල්ගේ කියුබාව සමරිසියන්ව රස්සා වලින් නෙරපන ලදි. කොමියුනිස්ට් පක්ෂයේ සාමාජිකත්වය නොදී සිටියහ. සිරකඳවුරුවල ගාල් කර ඔවුනට කුරිරු වදහිංසා දුන්හ. 1980 ගණන් මැද දී HIV ඇති සියල්ලන්වම කියුබාවේ මානසික රෝහල්වලට ගාල් කරන ලදි. 2010 දී තමන් සමරිසියන්ට කළේ “මහා අයුක්තියක්” යැයි ෆිඩෙල්ම කියා සිටියේය.

සීනි කර්මාන්තයෙන් ආදායම් ඉපැයූ වතුයායක අයිතිකරුවෙකුට දාව ඉපදෙන ෆිඩෙල් සිය රටේ ජනතාවගෙන් තමන්ගේ සුල මුල වසන් කරන ලදි. භූමි හෝ ගොඩනැඟිලි අයිතිය සාමාන්‍ය ජනතාවට නැති රටක ඔහුට දූපතක අයිතිය තිබුණි. සුපිරි බෝට්ටු හා නිවාස 20 ක අයිති සතු විය. වසර 50 කට ආසන්න කාලයක් කිසිම පුද්ගලික ව්‍යාපාරයක් තහනම් වූ රටක ඇමෙරිකන් ඩොලර් මිලියන 800 කට වඩා පුද්ගලික ශුද්ධ වත්කමක් තිබුණත්, ෆිඩෙල් රටවැසියන්ට කිව්වේ වෙරළ ළඟ කුඩා පැළක තමන් ජීවත්වෙන බවයි. මරණ දණ්ඩනය හිමිවීම නියත නම් සැබෑ තතු හෙළිකරන්නට රටේ කිසිවෙක් ඉදිරිපත් වේ දැයි කියා ෆිඩෙල්ගේ ගුණ වයන අය සිතන්නේ නැත.

ජනමාධ්‍ය හරහා මිනිසෙක් මරා දමන ආකාරය ප්‍රචාරය කරන්නට අයිසිස් ත්‍රස්තවාදීන් පටන් ගත්තේ මෑතක දී ය. එවැනි ත්‍රස්තවාදී ක්‍රියා ෆිඩෙල් සහ චේ පටන් ගත්තේ 1959 ජනවාරියේ දී ය. පෙළ ගසා හිසට වෙඩි තබා චේ සහ ෆිඩෙල් අතින් මරා දැමෙන කියුබන් වැසියන්ගේ නම් ගම් ඇතිව අන්තර්ජාලයෙන් දකින්නට හැකි වූවත් ෆිඩෙල්ගේ ගුණ වයන අයට ඒවා ෆිඩෙල්ට එරෙහි ප්‍රචාරක කටයුතු පමණි.

ඇමෙරිකන් රජය ලෝකයේ අනේක ත්‍රස්තවාදයන් වපුරන්නට සිය රටවැසියන්ගේ බදු මුදල් යොදා ගැනීම ගැන උරණ වන ඇමෙරිකන් වැසියන් ප්‍රසිද්ධියේ ඒ ගැන ලොවට කියන්නට මහා ජනරැළි පවත්වමින් විරෝධතා පෙළපාලි යති. කියුබන් රටවැසියන්ගේ වෙහෙසෙන් විදෙස් ත්‍රස්තවාදීන් පෝෂණය කිරීම ගැන පෙළපාලි යන්නට කියුබාවේ කිසිවෙකුට අවසර නැත්තේ මන්දැයි හිතන්නට ෆිඩෙල්ගේ ගුණ වයන අයට නොහැකියි.

ඔහුට හැදූ පිළිම නැහැ, ප්‍රතිමා නැහැ. ඔහුගේ නමින් වීදියක් නම් කර නැහැ, ගොඩනැඟිල්ලක් නම් කර නැහැ යැයි කියමින්, ගෞරවයට ප්‍රශංසාවට පත් විය යුත්තෙක් හැටියට ෆිඩෙල් දකින අයට ෆිඩෙල් අදහන්නේ නැති අයව, කියුබාවේ සිතන්නට හැකියාව ඇති අයව, වෙඩි තබා මරා දැමීම, සිරගත කිරීම සහ ශ්‍රමික වහලුන් කරලීම පෙනෙන්නේ නැත.

සටහනට එකතු කර ඇත්තේ කියුබාවේ හවානා නගරයේ බේස්බෝල් Hall of Fame හි ඇති බේස්බෝල් පිත්තක් අතැති ෆිඩෙල්ගේ බිත්ති සිතුවමකි.

ඇයි කියන්න, මා සහෝදරයා
ආඥාදායකයන් මරන්නේ
සහ යුද්ධ කරන්නේ මන්දැයි කියා
කීර්තියට ද, භෞතික වස්තු සඳහා ද,
විශ්වාසයන්ට ද, ද්වේශය නිසා ද,
බලයට ද,
ඔව්, ඒ හැරෙන්නට තවත් දෙයක් නිසා
ඔවුන්ට කරන්න පුළුවන් නිසා.”

වෙනිසියුලාවේ රහසිගත බිට්කොයින් ආර්ථිකය

Posted in Uncategorized by arunishapiro on නොවැම්බර් 29, 2016

Money

බදු ගෙවීමෙන් වැළකීම, අපරාධ කරන්නට යොදා ගැනීම, ඒ නිසා අපේ ආරක්ෂාව අඩුවීම, ඒ නිසා අපිව වැඩියෙන් දුප්පත් කරවීම යනාදි කරුණු හේතු දක්වා සල්ලි නෝට්ටු ක්‍රමයෙන් රටවැසියන් අයින් කළ යුතු යැයි පොතක් ලියන ලද්දේ කෙනත් එස්. රොගොෆ් නමැති හාවඩ් විශ්ව විද්‍යාලයේ අර්ථ ශාස්ත්‍රඥ මහාචාර්යවරයෙකි. ඔහු ජාත්‍යන්තර මුල්‍ය අරමුදලේ හිටපු ප්‍රධානියෙකි. මෙතෙක් කාලයක් වැඩි ප්‍රසිද්ධියක් නොමැතිව රට්ටු අතර සල්ලි මුදල් ගණුදෙනු අවම කරන්නට උත්සාහ ගත් ලෝකයේ විවිධ රටවල නායකයන්ට දැන් එළිපිටම එහි නියැළෙන හැකියාව සල්ලි මුදලේ සාපය (The Curse of Cash) නමැති එම පොත තුලින් පාදා දී ඇත.

ඉතින් සිය බැංකු ගිණුමේ මුදල් ATM එකකින් කෑෂ් හැටියට ගනිද්දී බද්දක් පනවන්නට සූදානමක් අද යුරෝපීය යුනියනයේ කතාබස් වේ. ඒ සල්ලි මුදල් නොහොත් කෑෂ් ළඟ තබාගැනීම සහ එයින් ගණුදෙනු කිරීම අධෛර්මත් කරවනු සඳහායි. ජංගම හා තැන්පතු ගිණුම් විස්තර පුද්ගලික බැංකු විසින් මහ බැංකුවට දන්වන බැවින් මුදල් සංචාලනයට (manipulation) පහසු ඉඩකඩක් මහ බැංකුවට පෑදේ.

ඇමෙරිකන් මහ බැංකුව (ෆෙඩරල් රිසව්) විසින් පහසු මුදල්/අඩු පොලී නිකුත් කරන ප්‍රතිපත්තිය ගැන මහජනතාවගේ කෝපය, ජනාධිපතිවරණයේ දී ඩොනල්ඩ් ට්‍රම්ප්ගේ ජයග්‍රහණයට හේතු වූවා යැයි ඊයේ පෙරේදා කියන ලද්දේ හිටපු ඩලාස් ෆෙඩරල් රිසව් බැංකු සභාපතිවරයෙක් වූ රිචඩ් ෆිෂර් ය. ඒ දේශනයට සවන් දුන් බැංකුකරුවන් මුදල් කප්පාදුව ගැන දත්ත ද, ඇමෙරිකාවේ මහජනතාවට ඒ ගැන වැඩි වැටහීමක් ඇතැයි සිතිය නොහැකියි.

ෆියාට් මුදල් රහසිගතව හැසිරවීමෙන්, මහ බැංකුව නිකුත් කරන මුදල් සැපයුම වැඩි කිරීමෙන් රටවැසියන් අතර ආර්ථික අසමානතාවයන් වැඩිවේ. මෙය සිද්ධ වෙන්නේ මුදල් සැපයුම වැඩි කරන්නට මහ බැංකුව ගෙනෙන අලුත් මුදල් මුලින්ම ලැබෙන්නේ මහ බැංකුව දන්නා හඳුනන ලොකු සහ වැඩි ගණුදෙනු ඇති හවුල්කාරයන්ට බැවිනි. සෙසු සමාජයේ වැසියන්ට කළින් ක්‍රය ශක්තිය නොහොත් මිලට ගැනීමේ හැකියාව ඒ අයට වැඩිවේ. එයින් ඔවුන්ගේ ජීවන මට්ටම් ඉහළ දමාගන්නට තල්ලුවක් ලැබේ.

මහ බැංකුවේ මුදල් සැපයුම ඒ අයගෙන් පසුව මැද පංතියට හා දවසේ ආදායම් උපයන අයට එද්දී, ආර්ථිකය උද්ධමනයට හසු වී හමාරයි. ඉතින් මහ බැංකුව මුදල් සැපයුම වැඩිකරන හැම අවස්ථාවක දී ම, සාමාන්‍ය රටවැසියාගේ ජීවන මට්ටම පහළ බසියි. කෙනත් රොගොෆ් වැනි අය සාමාන්‍ය රටවැසියාට ඒ ගැන පැහැදිලි කරන පොත් නොලියති.

උගෝ චෑවෙස් 2003 දී ස්ථාවර විනිමය අනුපාතිකයක් ස්ථාපිත කළේය. මේ වෙද්දී කළුකඩේ එක ඇමෙරිකන් ඩොලරයක මිල බොලිවාර් තුන්දහසකි. එය තව දින කිහිපයක දී තවත් වෙනස් වෙනු ඇත. එදා ගණන් කර බැලූ නෝට්ටු මෙදා තරාදියෙන් කිරා බලන්නට කඩකාරයන්ට සිද්ධ වී ඇත. කඩවල බඩු රාක්ක හිස් වී, පාසැල් දරුවන් බඩගින්න නිසා ක්ලාන්ත වෙන සිද්ධීන් අහන්නට ලැබේ. පහසුකම් අඩුවීම නිසා ඉස්පිරිතාලයේ දී අලුත උපන් දරුවන් කාඩ්බෝඩ් පෙට්ටිවල පේලියට බහාලූ පින්තූර ලෝක මාධ්‍ය වලින් දකින්නට ලැබුණි. වෙනිසියුලාවේ වැසියන් බොහොමයක් අද රජය විසින් මාසිකව බෙදන (ඩොලර් 9 ක් පමණ) සමෘද්ධියකින් ජීවත් වෙන්නට වෙර දරති.

බඩු ගන්නට කියා කොලොම්බියාවට ඇදෙන වෙනිසියුලාවේ වැසියන් එන්න එන්නම වැඩිවීම නිසා, දැන් වෙනිසියුලානුවන්ව පිටුවහල් කරන්නට කොලොම්බියාව පටන් ගෙන ඇත.

එහෙත් ආර්ථික අර්බූදයෙන් අස්වැසිල්ලක් ගන්නට සමත් වී සිටින පිරිසක් වෙනිසියුලාවේම රහසිගතව ජීවත්වෙති. ඔවුන් බිට්කොයින් මුදල් උපයන අයයි. බිට්කොයින් සඳහා මිල පාලනයක් නැත.

නොනැවතී දුවන පරිගණක වලින් බිට්කොයින් කනින්නට වෙනිසියුලානුවන්ට හැකියාව ලැබෙන්නේ වෙනිසියුලාවේ රජය තවමත් ඉතා අඩු මුදලකට විදුලි බලය සපයන නිසයි. හිටිවන ඇණ හිටන විදුලි සැපයුමෙන් නොව කාර්මික කලාපයන් ආශ්‍රිතව සිය පරිගණක මෙහෙයවන මේ බිට්කොයින් උපයන අය අඩුවැයකට මිල පාලනයකින් යුතු භාණ්ඩයක් (විදුලි බලය) ලාබයක් උපයන භාණ්ඩයක් (බිට්කොයින්) බවට පත්කරගන්නට සමත් වී සිටිති.

වෙනිසියුලාවේ බොහෝ බිට්කොයින් උපයන්නන් දිනකට ඩොලර් 1,200 ක් පමණ උපයන බව කියැවේ. අන්තර්ජාලයෙන් බිට්කොයින් වලින් ගෙවමින් තෑගි කාඩ් ලබාගෙන ඒවායෙන් ඇමෙරිකාවේ ඇමසොන් ප්‍රයිම් පෑන්ට්‍රි වැනි සේවාවකින් ආහාර ආනයනට, බෙහෙත් සහ වෙනත් ඇමෙරිකන් භාණ්ඩ ෆ්ලෝරීඩාව හරහා ගෙන්වා ගන්නට ඔවුන් විවිධ උපක්‍රම තුලින් හැකියාව ලැබ සිටිති.

මේ බිට්කොයින් උපයන අය තම පරිගණක ඇත්තේ කොතැනදැයි සඟවාගෙන ඉන්නට මහත් පරිශ්‍රමයක් දරති. රටේ රහසිගත පොලිස් සේවාව නොහොත් සර්විසියෝ බොලිවෙරියානෝ ඩ ඉන්ටෙලිජෙන්සියා නැසියොනාල් (SEBIN) නිලධාරීන් ඔවුන්ව අල්ලා ගතහොත් අත්අඩංගුවට ගන්නේ යැයි කියා හෝ අපරාධ නඩු පවරන්නේ යැයි කියා හෝ ඔවුන් සතු මුදල් බලෙන් පැහරගැනීමට උත්සාහ කරන නිසා ඔවුන් එසේ සැඟවී ඉන්නට වෙහෙසෙති.

වෙනිසියුලාව තුල බිට්කොයින් පරිහරණයට ජනතාව එකතුවෙද්දී හුවමාරුව, විකිණීම සහ තොරතුරු බෙදාගැනීම, බිට්කොයින් වෙනිසියුලා වැනි ෆේස්බුක් සමාජ තුලින් රහසිගතව කරන්නට එහි නියැළෙන අය පටන් ගෙන තිබේ. බිට්කොයින් ගැන ප්‍රසිද්ධියේ කතා කරන අන්තර්ජාල අඩවියක් තිබුණ ද, අනෙක් රටවල මාධ්‍ය සල්ලි මුදල් ගැන කියන්නා සේ වෙනිසියුලාවේ රාජ්‍ය මාධ්‍ය දක්වන්නේ බිට්කොයින් යනු සයිබර් අපරාධකාරයන්ගේ අතකොළුවක් හැටියටයි.

වෙනිසියුලාවේ බිට්කොයින් ගැන තොරතුරු මෙම ඉංග්‍රීසි ලිපිය ඇසුරිනි.

ඇමෙරිකන් පෙර සිරිතක් උත්සවාකාරයෙන් මෙසේ සමරන ලදි

Posted in Uncategorized by arunishapiro on නොවැම්බර් 24, 2016

අද ඇමෙරිකාවේ Thanksgiving Day හෙවත් ස්තූති පුද කිරීමේ දිනයයි. අනෙක් බොහෝ ඇමෙරිකන් තොරතුරු මෙන්ම මෙම උත්සවය ගැන විස්තර ද, විසල් රාජ්‍ය රිසි වූවන් අතින් පාසැල් හා ප්‍රධාන ජනමාධ්‍ය තුලින් බෙදන ලද්දේ වෙනස් කතාවකි. අන්තර්ජාලය තුලින් විකල්ප මාධ්‍ය බිහිවෙද්දී මෙහි ඇත්ත කතාව බෙදා ගන්නට අපිට හැකියාව ලැබිණ.

නිදහස් මිනිසුන් අතර නිදහස් ගණුදෙනු තුලින් ඉතා සුළු කාලයක දී ලෝකයේ මිනිසුන් භුක්ති විඳින්නට සමත් වී සිටින සමෘද්ධිය වෙනුවෙන් ස්තූතිවන්ත වෙන්නට ඇමෙරිකන් විය යුතු නැත. සතුටු ස්තූතිවන්ත දිනයක් ඔබ සැමට!!!

අරුණි ශපීරෝ‍ වෙතින්

1620 දී Mayflower නැමති නෞකාවෙන් ඇමෙරිකාවට ගොඩ බැසි pilgrims නැමති යුරෝපීයයන් කොට්ඨාශයක් මැසචූසෙට්ස් ප්‍රාන්තයේ ප්ලිමත් නම් උපනිවේෂයක් පිහිටුවා ගත්හ. හේමන්තයට මුහුණ දුන් උපනිවේෂයේ වාසීන් අතරින් බාගයක් මිය ගියහ.

කොලනියේ හෙවත් උපනිවේෂයේ ආණ්ඩුකාරයා වූ විලියම් බ්‍රැඩ්ෆෝර්ඩ් ලියන History of the Plymouth Plantation නොහොත් ‘ප්ලිමත් වතුයායේ ඉතිහාසය’ යන්නේ සඳහන් වන්නේ ප්‍රිල්ග්‍රිම් වැසියන් සාගතයෙන් පෙළුණු බවයි. දූෂණ, සංකූලය (confusion) හා අසතුට ඔවුන් අතර පැතිර තිබිණ.

වසන්තයේ හා ගිම්හානයේ දී අනුභවයට සරිලන තරම් ඵලදාව වැවෙන්නට ඉඩක් නොදී රැයේ දී මෙන් මහ දවාලේ දී ද බෝග වගාවන් වලින් වැඩි කොටසක් සොරා ගත්තවුන් වැඩියෙන් සිටියහ. සාගතය හා මරණය ඔවුන් ලුහුබැඳ ආහ. 1621 සහ 1622 දී පවත්වන ලද අස්වනු උත්සව වලින් ඔවුන් සියල්ලන්ගේ ම බඩගින්න නිවුනේ කෙටි කාලයකට පමණි. එම අස්වනු උත්සව මරණයට නියමිත වූ අයෙකුගේ අන්තිම භෝජනයක් වැනි යැයි බ්‍රැඩ්ෆෝර්ඩ් සටහන් තබයි.

නුහුරු දේශගුණයක, නුහුරු පසක, නිසි ඵලදාවක් ලබාගන්නේ මොනවායෙන් දැයි ඔවුන් දැන සිටියේ නැත. සාගතයෙන් ගැලවෙන්නට ඔවුන් ස්වදේශී ඉන්දියානුවන් වවන තිරිඟු වගාව පටන් ගත්හ. ඇමෙරිකාවට…

View original post 535 more words

රජයේ මුදල් වෙනුවට අතින් ලියූ නෝට්ටු

Posted in Uncategorized by arunishapiro on නොවැම්බර් 22, 2016

මුදල් ලොව බිහි වූයේ මිනිසුන් අතර ගණුදෙනු පහසු කරන්නට බව රජයට අමතක වී ඇති අවස්ථාවක දැනගන්නට ලැබෙන ප්‍රවෘත්තියක්.

රෑ දොළහට ක්‍රියාත්මක වන පරිද්දෙන් ගෙනන ලද නීතිය නිසා අද සල්ලි මුදල් අර්බූදයකට මුහුණ පා සිටින ඉන්දියාවේ, මියන්මාර් මායිම ආසන්නයේ පිහිටන පිටිසරබද මිසොරාම් හි කාව්බන්ග් ගමේ වැසියන් එදිනෙදා මුල්‍ය කටයුතු පිරිමසා ගන්නට ‘කඩදාසි කූපන්’ භාවිතාය පටන් ගෙන ඇතැයි වාර්තා වේ.

මුදල් නෝට්ටු හිඟ අර්බූදය සමනය වී අලුත් මුදල් ලැබෙන තෙක් කඩදාසිවල ලියන ලද පොරොන්දු නෝට්ටු වලින් ගණුදෙනු කිරීමට එහි සිල්ලර කඩයක අයිතිකරු වූ පීසී ලාල්මච්චුනා තම ගමේ වැසියන්ට ඒත්තු ගන්වන්නට සමත් වී ඇත.

රැපියල් සීයේ හා පනහේ සල්ලි මුදල් හිඟය නිසා, එහෙම නොකළොත් බඩු මිල දී ගන්නට හෝ විකුණන්නට කිසිත් සේ නොහැකි යැයි හේ ටයිම්ස් ඔෆ් ඉන්ඩියා පුවත්පතට කියන ලදි.

ඔහුගේ යෝජනාව අනුව, කඩකරුවන් සහ එළවළු වෙළෙන්ඳන් පසුගිය සෙනසුරාදා සිට අතින් මුදලේ ගණන ලියූ කඩදාසි කෑලි මුදල් වෙනුවට බාරගන්නට පටන් ගෙන තිබේ. පාරිභෝගිකයන් ද කැමැත්තෙන් ඊට සහභාගී වී සිටිති. කඩදාසියේ ගණන සහ එය නිකුත් කළ අයගේ අත්සන ඇත.

වෙළෙන්ඳන් නොමැති වීදි කඩ පවතින මේ ගම්පළාතේ වැසියන් කඩ එළිපත්තේ ඇති එළවළු හෝ පළතුරු තෝරාගෙන, එතැන සඳහන් මිල ගණන් අනුව මුදල් බෝතලයකට දමා බඩු රැගෙන යන්නට හුරු වී සිටින අයයි. ඉතුරු සල්ලි ද ඔවුන් ඒ බෝතලයෙන්ම අරගනිති.

කුඩා ගමක් නිසා, ගමේ අය සියල්ලන්ම හඳුනන නිසා කිසිවෙක් අනෙකාගේ දාඩිය මහන්සියෙන් උපයන ලද්දට වංචා නොකරන්නේ යැයි ගමේ අයෙක් කියයි.

ප්‍රවෘත්තිය ගත්තේ මෙතැනින්.

කළු සල්ලි මර්ධනය කියමින් ඔබේ මුදලට කෙළවීම

Posted in Uncategorized by arunishapiro on නොවැම්බර් 21, 2016

HUBLOT

රෑ දොළහේ පටන් ක්‍රියාත්මක වන පරිදි ඉන්දීය රුපියල් පන්සීයේ හා දාහේ මුදල් නෝට්ටු එදින අවලංගු කරන බව එරට අගමැති නරේන්ද්‍ර මෝඩි ජාතික රූපවාහිනියෙන් රටවැසියන්ට දැනුම් දුනි. මෙවසර අවසන්වීමට පෙර තමන් ළඟ ඇති ඒ අවලංගු නෝට්ටු බාර දී ඊට නීත්‍යානුකූල මුදල් ලබාගත යුතු නිසා දැන් ඉන්දියාවේ බැංකු පෝලිම් දකින්නට හැකියි.

ආදායම් බදු නොගෙවන, අපරාධ, ත්‍රස්තවාදය හා අල්ලස් දූෂණයෙහි නියැළෙන දුෂ්ට ජනතාව අත වූ “කළු සල්ලි” මර්ධනය කරන අරමුණින් තමා මේ පියවර ගත් බව මෝඩි කීය. ඉන්දියාවේ ආදායම් බදු ගෙවන්නෝ 2% කටත් වඩා අඩුයි. ඉන්දියාවේ රාජ්‍ය නිලධාරීන් අතර අල්ලස් දූෂණය සුලබව පැතිර පවතී.

නීතියේ රැහැනට හසු නොවී සල්ලි මුදල් වලින් ගණුදෙනු කරන අයව මර්ධනය කරනු පිණිස යැයි කියමින් විවිධ රටවල් පියවර ගන්නා ලද්දේ අද ඊයේ නොවේ. හොර සල්ලි ශුද්ධ කිරීම නවතා දමන්නට යැයි කියමින් 1970 දී ඇමෙරිකාව බැංකු රහස්‍යතා පනත සම්මත කරගත්හ. ඕනෑම බැංකු ගිණුමක ඩොලර් 10,000 කට වඩා සල්ලි මුදලක් එහා මෙහා වූවොත් ඒ ගැන වාර්තා තබාගැනීමට සියළු බැංකුවලට එයින් සිද්ධ විය. මේ පනත යටතේ සල්ලි මුදල් එළියට ගැනීම පමණක් නොව, තැන්පතු සහ විදේශ විනිමය මාරු කිරීම් ගැන ද වාර්තා තබා ගැනේ. එක බැංකු ගිණුමකින් පන්දාහක් ගෙන, තවත් බැංකුවකට ගිහින් එහි තම ගිණුමෙන් ද පන්දාහක් ගත්තොත් ආදායම් බදු දෙපාර්තමේන්තුවට ඒ ගැන වහාම දැනුම් දීමක් සිද්ධ වේ.

2001 සැප්තැම්බර් 11 වැනිදා නිව් යෝර්ක් හි ත්‍රස්ත ප්‍රහාරයෙන් අනතුරුව සම්මත කරගත් දේශප්‍රේමි පනතෙන්, එසේ පවත්වාගෙන බැංකු ගිණුම් වාර්තා ෆෙඩරල් රජයට වහාම දැනුම් දෙන ක්‍රමයක් පටන් ගැනිණ. අපේ පැත්තේ බේකරි අයිතිකාරයෙක්ට බැංකුවේ සේවකයන් විසින්, කඩේ සල්ලි බැංකුවට ගෙනෙද්දී දවසකට දහ දාහට වඩා අඩුවෙන් දාන්න නැත්නම් අපිට වාර්තා යවන වැඩ වැඩියි කියූ නිසා, ඔහු දිනපතා දහ දාහට ඩිංගක් අඩුවෙන් මුදල් දැම්මේය. ගිම්හානයේ බේකරි කෑම වැඩියෙන් විකිණී යද්දී දිනපතා බැංකුවට මුදල් නෝට්ටු දැමූ ඔහුගේ ව්‍යාපාරික ගිණුම හදිසියේම ඇණහිටුවන ලදි. එහි වූ මුදල් සියල්ලම, දේශප්‍රේමි පනත යටතේම ඇරඹුණ වත්කම් පවරාගැනීමේ නීතියකින් ප්‍රාන්තයට පවරා ගැනිණ. තමන් ත්‍රස්තවාදියෙක් නොවේ යැයි පෙන්වා දී ගිණුම නිදහස් කරගන්නට ඔහුට වසර එකහමාරක් නඩු කියන්නට සිද්ධ විණ. ඒ රාජ්‍ය නිලධාරීන් අතර අල්ලස් දූෂණ දුලබ යැයි සැලකෙන රටකයි.

දිනපතා $8000 ක් බැගින් තමන්ගේ සල්ලි තමන්ගේ ගිණුමට දාන්නේ හෝ එයින් ගන්නේ ද, ඒ ගැන වාර්තාවක් බැංකුව විවිධ රාජ්‍ය ආයතනවලට සපයනු ඇතැයි අද අපේක්ෂා කළ හැකියි. ඒත් බැංකුවක් තවත් බැංකුවකට යවන හෝ රාජ්‍ය ආයතනයකට යවන විශාල මුදල් ප්‍රමාණයන් ගැන එසේ වාර්තා සැපයිය යුතු නැත. බැංකුව විසින් තමන් හා නිතර ගණුදෙනු කරන ලොකු පාරිභෝගිකයන් යැයි හඳුන්වන අය ගැන මෙසේ වාර්තා යැවීමෙන් වැළකී සිටීමේ හැකියාව බැංකු වලට ලැබී ඇත!!!

යුරෝපා රටවලට පැනගන්නට සරණාගතයන් පොරකද්දී, නීති විරෝධී ලෙසින් මිනිසුන් ප්‍රවාහනයට උපකාර වේ යැයි කියමින් €500 නෝට්ටුව 2018 දී නවතන්නට යුරෝපීය මහා බැංකුව ක්‍රියාත්මක වූයේ පසුගිය මැයි මාසයේ දී ය. €500 නෝට්ටුව ඉවත් වූවාම යුරෝ මුදල් අතර ඉහළම නෝට්ටුව €200 වෙයි.

ස්විට්ස්සර්ලන්තයේ ස්විස් ෆ්‍රෑන්ක් දාහේ නෝට්ටුවක් තිබුණ ද එහි සැපයුම අඩු නිසා බහුල ලෙසින් භාවිතා නොවන්නකි. ෆ්‍රෑන්ක් ලක්ෂයකට වඩා වැඩියෙන් සල්ලි මුදල් වලින් ගෙවීම ස්විස් ආණ්ඩුව තහනම් කරන ලදි. ඉඩම්, වාහන, රන් රිදී පමණක් නොව, ඉහත පින්තුරයේ ඇති ලක්ෂ හතරක් පමණ වටිනා ස්විස් ඔරලෝසුව පවා සල්ලි මුදල් දී ගන්නට ද නොහැකි වෙන සේ මේ තහනම බලපායි. ෆ්‍රෑන්ක් ලක්ෂකයට වඩා වැඩි මුදලක් ගෙවිය යුතු වූවක් නම් බැංකුව හරහා ගණුදෙනුව කළ යුතුයි. ස්විට්ස්සර්ලන්තයේ ආණ්ඩුව මේ තහනම ගෙනෙන ලද්දේ ආර්ථික සංවර්ධන සංවිධානයෙන් ඔවුන්ව අපලේඛනය (කළු ලැයිස්තුවකට) දමනු ඇතැයි තර්ජනයකට පාත්‍ර වූ නිසයි.

ප්‍රංශය හා ඉතාලිය ද බැංකුවෙන් ගතහැකි සල්ලි මුදල් සහ මුදල් වෙනකෙකුට යැවීමේ ප්‍රමාණයට සීමා පනවා ඇත. අයිස්ලන්තය, සයිප්‍රසය සහ ග්‍රීසිය යන රටවල බැංකු වලින් සල්ලි මුදල් එළියට ගන්නට ගිණුම් අයිතිකරුවන් පොර කෑමෙන් ATM වසා දැමූ ආකාරය මෑතක දී අපිට දකින්නට ලැබිණ.

ස්වීඩනයේ මහජන බස් රථයක යන ටිකට් පත අද සල්ලි මුදල් දී ලබාගත නොහැකියි. මොබයිල් දුරකතනයක් මාර්ගයෙන් එය තම බැංකු ගිණුම හරහා කළින් මිල දී ගත යුතුයි. 2012 පටන් ස්වීඩනයේ ප්‍රධාන බැංකු සිය ශාඛාවන් හි දී ගිණුම් හිමියන්ට තම සල්ලි මුදල් ගිණුමට දමන්නට හෝ ගිණුමෙන් ගන්නට හැකියාව ඉවත් කරමින් පවතී. ස්වීඩනය යනු ආදායම් බදු නොගෙවන, අපරාධ, ත්‍රස්තවාදය හා අල්ලස් දූෂණයෙහි නියැළෙන දුෂ්ට ජනතාවක් වාසය කරනවා යැයි සැලකෙන රටක් ද නොවෙද්දී මෙසේ සිද්ධ වූයේ මන්ද?!!!!!!

ජේපී මෝගන් චේස් ඇතුළු ඇමෙරිකන් බැංකු බොහොමයක් 2015 දී ඒවායේ ගිණුම් අයිතිකරුවන් සතු ආරක්ෂිත තැන්පතු පෙට්ටි වල, වටිනාකම සඳහා එකතු කරන අගයක් ඇති ඒවා හැරෙන්නට ව්‍යවහාරයේ පවතින කාසි හෝ සල්ලි මුදල් තැන්පත් කරන්නේ නැතැයි එකඟතාවයක් අත්සන් කරගත්හ. එසේම සල්ලි මුදල් වලින් වාහන ෆිනෑන්ස් පොලී, නිවාස පොලී හෝ ක්‍රෙඩිට් පත් ගෙවීම් කළ නොහැකි යැයි ද තීරණය කරන්නට ද බැංකු පටන් ගෙන තිබේ.

ඉන්දියාවේ අගමැති මෝඩි මෙන්ම, සල්ලි මුදල් වලට එරෙහි යුද්ධය පටන් ගැනුනේ හොර සල්ලි ශුද්ධ කරන අපරාධකාරයන් අල්ලනවා කියමින්. 1945 වෙන තෙක්, ඇමෙරිකාවේ $500, $1000 සහ $10,000 නෝට්ටු පැවතිණ. 1930 ගණන් වල දී ඩොලර් ලක්ෂයක නෝට්ටුවක් ද බැංකු අතර මුදල් හුවමාරුව සඳහා යොදා ගැනිණ. මුදල් නෝට්ටු අච්චු ගැසීම ෆෙඩරල් ආණ්ඩුවට පවරාගැනීමෙන් පසුව රජය 1945 වෙද්දී ඒ ලොකු නෝට්ටු නිකුත් කිරීම නවතා 1969 වෙද්දී ඒවා සියල්ල සසරණයෙන් අයින් කළහ. 1969 දී $100 ක පැවති ක්‍රය ශක්තිය වර්තමානයේ දී $15.50 කි. අපරාධ වංචා දූෂණ මැඬලනවා කියමින් රජය කළේ සල්ලි මුදල් වලින් ගණුදෙනු කිරීම ජනතාවට අසීරු කිරීමයි.

මේ ඉන්දීය ලොකු නෝට්ටු තහනමෙන් ඉන්දියාවේ දුප්පතුන්ට සෑහෙන්න පාඩුයි. මොකද දුප්පතුන් ගොඩක් ගණුදෙනු කරන්නේ සල්ලි මුදල් වලින්. රාජ්‍ය හැඳුනුම්පත් නැති අයට තමන් බොහොම අමාරුවෙන් ඉතිරි කරගත්තු ලොකු නෝට්ටු මාරු කරගන්න විදියක් නැහැ. රූ දොළහට ක්‍රියාත්මක වන පරිදි නීතිය ගෙනා බැවින් කළින් මාරු කරගන්න ලැබිච්ච අයට වැඩියෙන් වාසියි. පහසුව පිණිස ලොකු නෝට්ටු තමන් ළඟ තියාගත් දුප්පතුන් තමන්ගේ ඉතුරුම් එක රැයින් නැති වී යාම ගැන හූල්ලන කාලයක් ඇවිත්.

ඒ විතරක් නෙමෙයි, අර මැඬලනවා කියපු හොර සල්ලි ජාවාරම් කරන අය, ඒ ගොල්ලන්ට තමයිලු දැන් වැඩියෙන්ම බිස්නස් තියෙන්නේ. මේ දවස්වල දාහේ නෝට්ටු මිටි සීයේ නෝට්ටු මිටි වලට දාල දෙන්න ඔවුන් රුපියල් 500 ක් බැගින් ගන්නවාලු!!!!

සුපර් ෆාස්ට් ඉන්ටනෙට් ලෝකයක්

Posted in Uncategorized by arunishapiro on නොවැම්බර් 19, 2016

ගෝලීය අන්තර්ජාල පාරිභෝගිකයන්ට තත්පරයකට ගිගබයිට් එකක් බැගින් බෑන්ඩ්විත් සපයන්නට හැකි යැයි කියන අරමුණකින් සැලැස්මක් ගෙනෙන්නේ ස්පේස් එක්ස් ආයතනයයි. දැනට පවතින චන්ද්‍රිකා සංඛ්‍යාව (1,419) තෙගුණයකින් වැඩි කිරීමට වෑයමක්, එනම් චන්ද්‍රිකා 4,425 ක් තුලින් මෙය සාක්ෂාත් කරගත හැකි යැයි කියමින් ඔවුන් මේ සතියේ මුල දී ෆෙඩරල් සංවේදන කොමිසමෙන් අවසර ඉල්ලන ලදි.

ටෙස්ලා වාහන කොම්පැණියේ ඉලොන් මස්ක් තමයි ස්පේස් එක්ස් හි ඉන්නෙත්. එයා මේ ගැන මුලින්ම කතා කළේ 2015 දී. මේ අවසරය සඳහා පිරවූ ඉල්ලුම්පතේ මුල්‍ය වියදම් ගැන සඳහනක් නැහැ. මොකද මේක පුද්ගලික ආයෝජන වලින් කරනවා කියන නිසා. චන්ද්‍රිකා යවන්නට ඇමෙරිකන් ෆෙඩරල් ආණ්ඩුවේ අවසරය පමණයි ඔවුන්ට ඕන.

ස්පේස් එක්ස් කියන්නෙ අඟහරු ලෝකයේ ජනාවාසයක් හදන අරමුණින් රොකට් අත්හදා බලන කොම්පැණිය. නැවත භාවිතා කරත හැකි රොකට්ටුවක් සාර්ථක ලෙසින් ලොව මුල් වරට නිපැදවෙන්නේ ඔවුන් අතින්. අජටාකාශයට සංචාරකයන් ගෙන යන මෙවැනි උත්සාහයන් කිහිපයක් ලෝකෙ වටෙන් ඇහෙන්නට ලැබුණත්, ටිකට් අරන් බලාගෙන ඉන්න අය දැනටමත් පෝලිමක් ගැහිල තිබුණත්, තවම එවැනි කිසිම ආයතනයක් සංචාරකයෙක්ව අජටාකාශයට ගෙන ගිහින් නැහැ.

මේ එක චන්ද්‍රිකාවක බර කිලෝග්‍රෑම් 385 ක් පමණ. කිලෝමීටර් 1,150- 1,275 අතර උසක කක්ෂයේ දුවන, එකකට කිලෝමීටර් 2,120 ක් පමණ අවකාශයක ආවරණයට හැකියාව ලැබෙන, චන්ද්‍රිකා දහස් ගණනක් මාර්ගයෙන් අතිශය වේගවත් අන්තර්ජාලයක් ලෝකයේ සියල්ලන්ටම ලබා දෙන්නට හැකියාවේ විද්‍යාත්මක හෝ තාක්ෂණික දෝෂයක් දකින අය නැහැ.

දැනටමත් ගූගල් කොම්පැණිය සහ ෆිඩෙලිටි ඉන්වෙස්ට්මන්ට්ස් (මුල්‍ය ආයතනයක්) මේ චන්ද්‍රිකා යවන වැඩේට ඩොලර් බිලියන එකක් බැගින් ආයෝජනය කරන ලද බවට ප්‍රවෘත්ති වාර්තා වලින් කියැවෙනව. වැඩේ මුළු වියදම ඩොලර් බිලියන 10 ක් බව කියැවෙද්දී දැන් ඉතින් තව 8 ක් පමණයි මස්ක්ට එකතු කරගන්නට අවශ්‍ය. මුලින්ම යවන්නට අදහස් කරන්නේ චන්ද්‍රිකා 800 ක්. ඒ මාර්ගයෙන් ඇමෙරිකාවේ අන්තර්ජාල පහසුකම් වැඩිකරන්නට. ඇමෙරිකාවේ දුර බැහැර පළාත්වල අන්තර්ජාල පහසුකම් ලංකාවේ දුර බැහැර පළාත්වල වගේමයි!!!!

සංචාරකයන්ව අරගෙන යන රොකට් හැදීමට සහ රියැදුරන් නැති වාහන නිෂ්පාදනයට උත්සාහ ගන්නේ ඉලොන් මස්ක් පමණක් නෙමෙයි වගේම එයාර්බස් සහායෙන් වන්වෙබ් නමින් වූ කොම්පැණිය සහ බොයිං සමාගමත් දැනටමත් මෙවැනි චන්ද්‍රිකා අජටාකාශයට යවන්න ඉල්ලුම්පත් දාලයි තියෙන්නෙ.

පුද්ගලික මුදල් වලින් ගන්නා අවදානම් ආයෝජන වලින් ලාබ උපයන්නට සමත් වෙන බොහෝ අවස්ථා වල දී සම්පත් නාස්තිය අවම වෙන හැටි දකින්න පුළුවන්. පාරිභෝගික කැමැත්ත ඉටුවෙන හැටි දකින්න පුළුවන්. දීර්ඝ කාලීනව ලාබ උපයන්නට සමත් වෙන්නේ ඒ දෙකම ඉටුකරන්නට සමත් වෙන ව්‍යවසායකයන්. ඒත් කාලයෙන් කාලයට අපිට දකින්න ලැබෙනව ඉතා සීඝ්‍රයෙන් මුදල් පොදි ගහන්නට සමත්වෙන ව්‍යවසායකයෙක්ව. විදේශ වාහන අතර ඇමෙරිකාවේ වැඩියෙන්ම අලෙවි කරන්නට සමත් වූ, ඒත් මේ දවස්වල සේවකයන් තිස්දාහක් ගෙදර යවපු වොක්ස්වැගන් කොම්පැණිය හොඳ උදාහරණයක්.

ටෙස්ලා මෝටර්ස් මිල දී ගත් සෝලාසිටි කියන්නේ මේ දවස්වල මුල්‍ය වංචා ගැන අධීක්ෂණයට හසු වී ඇති කොම්පැණියක්. සූර්ය ශක්තියෙන් බලය සපයමින් පරිසර ආරක්ෂාව සඳහා ෆෙඩරල් ආණ්ඩුවෙන් විශාල වශයෙන් සහනාධාර මුදල් ලබාගන්නට සමත් වූ කොම්පැණියක්. ආයේ කියන්න ඕන නෑ, බදු මුදල් ගලා එන අනෙක් සෑම උත්සාහයක් සේ ම, මෙයත් නාස්තියෙන් හා ප්‍රෝඩාවෙන් පිරිච්ච තැනක්. බදු සහන නිසා දුවපු, ඒ නිසාම වෙළඳපොල මිල ගණන් තුලින් පාරිභෝගික ඉල්ලුමක් ඇත්දැයි, නාස්තිය අවමදැයි සොයා නොබැලුණු ව්‍යවසායක උත්සාහයක්. ඩොලර් මිලියන 155 ක කොටස් අගයක් දැනටමත් මස්ක්ට අහිමි වී ඇතත්, මස්ක් සහ ඔහුගේ නෑදෑයන් ගෙනියන සෝලාසිටි කොම්පැණිය සූර්ය ශක්තිය සැපයීම සඳහා විශාල බදු සහන ලබාගන්නට සමත් වූයේ බොරු දත්ත පෙන්වමින් කියා තමයි චෝදනාව එල්ල වෙන්නේ.

එද්දලවාදය නොහොත් ආණ්ඩුවට හේත්තු වී මහජනතාවගේ බදු බර වැඩිකරන ව්‍යවසායකත්වය යනු නිදහස් වෙළඳපොල යැයි වැරදියට ලේබල් කර බැනීම නිතර දකින්නට ලැබෙන්නක්. අපි පෙනී සිටින්නේ තමන්ගේ පුද්ගලික මුදල් වලින් අවදානම් ගන්නා අය ඉන්න සැබෑ නිදහස් වෙළඳපොලට.

අපි විරුද්ධ වෙන්නේ වේගවත් අන්තර්ජාලයක් සපයන්නට අජටාකාශයට චන්ද්‍රිකා යැවීමට නොවේ. ඒ හැකියාව ලබාගත්තේ ව්‍යවසායකයා හවුල් වූ වෙනත් ව්‍යවසායකය උත්සාහයකින් මහජනතාවගේ බදු බර වැඩි වූවා නම් පමණකි. මේ දවස්වල වොක්ස්වැගන් කොම්පැණිය ඇමෙරිකාවේ ඉන්ධන විමෝචන වංචාවට හසු වූ වාහන සියල්ල ආපහු මිල දී ගන්නව. වාහන නිෂ්පාදනය තහනම් වුනේ නීති කඩකරපු බව හෙළි වූ දවස්වලම. වාහන අයිතිකරුවන්ට වාහනයේ අද වෙළඳපොල මිල පමණක් නොව පාරිභෝගික විශ්වාසය කැඩුවාටත් මුදලක් දෙනව. පුද්ගලික කොම්පැණි වලට එවැනි දඬුවම් දෙන්න හැකියාව ආණ්ඩුවකට තියෙනව. අපි ආණ්ඩුවට බලය පවරන්නේ එයට. ඒත් යම් ආණ්ඩුවක් දිගින් දිගටම වංචා ප්‍රෝඩා වලින් පිරුණු ව්‍යවසායකයන්ට සහනාධාර බෙදනවා නම් ඒ ආණ්ඩුව ගෙදර යවන එක විතරයි අපි කරන්නෙ. ඊට පස්සේ එහිම නියැළෙන්නට වෙන ආණ්ඩුවක් පත්කරගන්නව. එවැනි සහනාධාර බෙදන බලය ආණ්ඩුවෙන් ඉවත් කරන්න කියා, මහජනතාවගේ බදු වැඩිකරන බලය ආණ්ඩුවට පවරන්නට එපා යැයි කියා සිටින්නේ නැහැ.

සුපර් ෆාස්ට් ඉන්ටනෙට් ලැබෙන්නේ තමන්ගේ මුදල් වලින් අවදානම් ගන්න ව්‍යවසායකයන් වෙතින්. එවැනි අය පාරිභෝගික අපිට වැඩියෙන්ම වේගවත් අන්තර්ජාල පහසුකම් සපයන්නට එකිනෙකා හා තරඟයේ යෙදෙන විට. නැතිව කුමන ව්‍යවසායක උත්සාහයන් සඳහා කෙසේ සහනාධාර බෙදිය යුතුදැයි තමන් දන්නවා කියාගත් ආණ්ඩුවෙන් නොවේ.

ට්‍රම්ප්ගේ දිනුම සහ හිලරිගේ පරාජය

Posted in Uncategorized by arunishapiro on නොවැම්බර් 14, 2016

ට්‍රම්ප් දිනුවේ ඇමෙරිකාවේ කළු වර්ගවාදයක් පවතින නිසා හෝ හිස්පැනික් හෝ මුස්ලිම් සංක්‍රමණික විරෝධතාවයක් ඇති නිසා යැයි තදින්ම විශ්වාස කරන සිංහලෙන් කියවන අය සිටිති. එය විශ්වාස කරමින් ඒ මතය අනිත් අයටත් බෙදන අය මගේ හිතවතුන් අතර ද සිටින බව දැක්කෙමි. ඔවුන් අතර සමහරු ඇමෙරිකාවේ මා හා නොයෙක් තැන්වලට ගිහින් කිසිම වර්ගවාදී තර්ජනයකට ගර්ජනයකට ලක්වූ අයෙක් නොදැක්ක ද, එහෙත් තවමත් රටේ වර්ගවාදයක් ඇතැයි කියාත්, හිස්පැනික් සහ මුස්ලිම් සංක්‍රමණිකයන්ට වෙනස්කම් ඇතැයි කියාත් තමන් අල්ලාගත් විශ්වාසය අනිත් අය හා බෙදාගැනීම අත්නොහරින අය.

සිරියානු සරණාගත ඉල්ලුම්පත් ගවේෂණය ත්‍රීව (කැනඩාව දැනටමත් යෙදී සිටින්න) කරන තෙක් මුස්ලිම් සරණාගතයන්ට අවසර දීම තහනම් කළ යුතු යැයි කියූ කතාව මැතිවරණ ජයෙන් පසුව ඔහුගේ වෙබ් අඩවියෙන් ඉවත් වීම ගැන විරෝධය දක්වමින් ගිය “නාකි සුදු පිරිමි” පෙළපාලියක් රටේ කිසිම තැනක දකින්නට ලැබුණේ නැත්තේ බරක් ඔබාමා ජනාධිපතිවරණයෙන් දෙවරක් ජයගනිද්දී ද, ‘නාකි සුදු පිරිමි’ පැවැත්වූ විරෝධතා පෙළපාලියක් ඇමෙරිකාවේ දකින්නට නොවූ ලෙසින්මයි.

ඇමෙරිකාවේ ඇට්ටර පරිසිද්ධි (facts) පෙන්වන්නේ ද රටවැසියන් අතර වර්ගවාදයක්/සංක්‍රමණික විරෝධයක් නැති බවයි. කළු, හිස්පැනික් හෝ මුස්ලිම් අයගේ ව්‍යාපාරික ස්ථානවලට කඩාවැදී බඩු කඩා දමන, ඔවුන්ට ගුටිබැට දෙන, හෝ ඔවුන්ගේ කඩවලින් බඩුගැනීමෙන් වැළකී ඉන්නට යැයි කියන “සුදු ජාතික කිතු බල සේනා” මෙහි නැත!!! ඒත් පරිසිද්ධි පැත්තකට දමා තම විශ්වාසයන් පමණක් සංවාදයට ගැනීම ලෝකවාසී බහුතරයකගේ කැමැත්තයි.

බ්‍රෙක්සිට් ප්ලස් ප්ලස් පෙන්වනවා යැයි උදම් ඇනුවාට ට්‍රම්ප්ට ලැබුනේ එවැනි (51.9%) චන්ද ප්‍රතිශතයක් නොවේ. ට්‍රම්ප් දිනුවේ චන්ද හැකියාව ඇති සුදු අයගේ චන්ද වලින් 1/3 ක් පමණි. 2008 දී සහ 2012 දී කළු හමැති මුස්ලිම් නමක් තිබූ ඔබාමාට දෙවරක් චන්දය දුන් චන්ද දිස්ත්‍රික්ක වලින් මිලියන ගණනින් චන්ද ට්‍රම්ප්ට ලැබී ඇත. ට්‍රම්ප්ට සහ හිලරිට චන්දය දුන්නේ 2016 චන්දදායකයන්ගෙන් 26% ක් බැගින් පමණකි. බ්‍රෙක්සිට් චන්දය ප්‍රකාශයට බ්‍රිතාන්‍ය ජනතාවෙන් 72.2% ක් එක්වූහ. වෙනදා මෙන් 2016 දී ද ඇමෙරිකන් ජනාධිපතිවරණයට සහභාගී වී ඇත්තේ චන්දදායකයන් 57.9% ක් පමණකි. 2016 ජනාධිපතිවරණයට චන්ද අයිතිය තිබූ ජනතාවෙන් 48% ක් හිලරිටත් ට්‍රම්ප්ටත් දෙන්නාටම චන්දය නොදුන්හ.

ප්‍රධාන පුවත්පත් සහ රූපවාහිනි නාලිකා පමණක් නොව ගූගල්, යූටියුබ්, සහ ෆේස්බුක් වැනි අඩවි පවා තාක්ෂණයේ සහායෙන් තොරතුරු හොයන්නට කියවන අයෙකුට පිරිනමන දැය, වාම අයිඩියලොජියකින් හසුරුවන්නට දායක වෙති.

වාම අයිඩියලොජියෙන් පිරුණු ජනතාව විසල් රජයෙන් තම කැමැත්ත සාක්ෂාත් වෙනු ඇතැයි බලාපොරොත්තු වූහ. එසේ වෙනසක් ගෙනෙනවා කියූ ඔබාමාට ලැබුණු චන්ද සංඛ්‍යාව හිලරිට නොලැබුනේ, සවල සූදානම් රැකියා ගෙනාපු, ඔබේ වෛද්‍යවරයා තියාගත හැකි යැයි කියමින් සෞඛ්‍ය පනතක් ගෙනාපු, නොබෙල් සාම තෑග්ග දිනාගෙන යුදකාමී බුෂ්ටත් වඩා දෙගුණයකින් පමණ විදේශ රටවල බෝම්බ ඇද හැලූ, මට පුතෙක් හිටියා නම් ඔහු ට්‍රෙවර් මෙන් පෙනෙනු ඇතැයි කියූ, නිදහස් මිනිසුන්ගේ ජීවිතවලට වැඩියෙන් නීති රෙගුලාසි ගෙනාවත් ආර්ථිකය දියුණු නොකළ ඔබාමාට වඩා ඇයව ජනතාවට අවිශ්වාස වූ නිසා නොවේ.

හිලරි ක්ලින්ට් පරාජය වූයේ ඇයගේ ඊමේල් පළහිලව්ව නිසා නෙමෙයි. ඇය අනාගත් බෙන්ගාසි ඛේදවාචකය නිසාත් නෙමෙයි. සිරියාවේ කළ මැදිහත්වීම් නිසා මිය ගිය සංඛ්‍යාව නිසා නෙමෙයි. සිරියානු සරණාගතයන් යුරෝපයට යද්දී මහමුහුදේ ගිලී මිය යාම හෝ එහෙන් ඇමෙරිකාවට/කැනඩාවට ගලා ඒමත් නිසා නෙමෙයි. හිලරිගේ පරාජය සිද්ධ වූයේ ඇය විදේශ ලේකම්ව සිටිය දී ඒ බලයෙන් ක්ලින්ටන් පදනමට අතිශය විශාල අරමුදලක් ලබාගැනීමට සමත්වීම නිසාත් නෙමෙයි. ඇය විසින් බිල් ක්ලින්ටන්ගේ ජවුසම් වල දී ඒවායේ අසු වූ කාන්තාවන්ට කළ බලපෑම් හා තර්ජන නිසාත් නෙමෙයි. වෝල් වීදියේ බැංකුකරුවන් හා කළ ගණුදෙනු හෙළිවීම නිසාත් නෙමෙයි.

ඔබාමාගේ වාමාංශික බොරු දැන් ඇතැයි ජනතාව තීරණය කරන ලද නිසා මේ දෙන්නාටම චන්දය දුන්නේ පාක්ෂිකයන් අතරින් ද ස්වල්පයකි. ලිබටේරියන් පක්ෂයට වාර්තාගත චන්ද ප්‍රමාණයක් ලැබුන ද, ඇමෙරිකන් චන්දදායකයන් අතර බහුතරය විසල් ආණ්ඩුව තවමත් විශ්වාස කරති.

හිලරි විශ්වාසය තියා ගත්තේ ප්‍රධාන මාධ්‍යයන්හි දැන්වීම් වලින්, හොලිවුඩ් නළුවන් සහ සුප්‍රසිද්ධ සංගීතඥයන් හා එකතු වී ජනතාව අමතන්න. රට පුරා විවෘත කළ චන්ද කාර්යාල වලින් පඩියට වැඩ කරන සේවකයන් ලවා චන්ද ඉල්ලන්න. ට්‍රම්ප් විශ්වාසය තියාගත්තේ සමාජ මාධ්‍ය අඩවි වලින් නොමිලේ (උදා. මිලියන 30 ක ට්විටර් අනුගාමිකයන් මාර්ගයෙන්) තම පණිවිඩය ජනතාවට යවන්න. කාගෙවත් තාලෙකට නටන්නේ නැතැයි සුප්‍රසිද්ධ උඬඟු ට්‍රම්ප් බ්‍රෑන්ඩ් එකෙන් චන්දය ඉල්ලන්න. මැතිවරණ සටනේ පැහැදිලි වෙනසක් ජනතාව දැක්කේ ට්‍රම්ප් වෙතින්.

මැද මැතිවරණයෙන් කොංග්‍රසයේ සෙනෙට් සහ නියෝජිත සභා රිපබ්ලිකන් පක්ෂයට ගියේ මන්දැයි විමසීම ඔබාමා නොසලකා හැරියේය. ඔහු තව වැඩියෙන් සිය අයිඩියලොජියට නැඹුරු විය. කාල සීමා 2 කින් පසු ජනතාවට පවතින ආණ්ඩුව එපා වෙන බව ඉතිහාසය කියයි. විසල් ආණ්ඩුවට තමන් පැතූ වෙනස ගෙනෙන්නට නොහැකි වීම නිසා ආණ්ඩුව වෙනස් කරගන්නට රිසි වෙති. හිලරි ඉහළ තනතුරක් දැරුවේ ඔබාමා ආණ්ඩුවේ නිසා ඇයට ඔබාමා නොකළ වෙනසක් ගැන මැතිවරණ වේදිකාවේ කතා කරන්නට නොහැකි විය. ඒ ආණ්ඩුව ගෙදර යවා මේ ආණ්ඩුව පත්කරගත්තාම රට හැදේවි යැයි සිතන ජනතාව ඉතිහාසය පුරා පෙන්වන ලද ඒ ඇට්ටර පරිසිද්ධි හිලරි නොසලකා හැරියාය.

ආධාරකරුවන් යොදවා උද්ඝෝෂණ පැවැත්වීමෙන් සියළු චන්දදායකයන් රවටන්නට නොහැකියි. අයිඩියලොජියේ නාමයෙන් බොරු කියා සියළු චන්දදායකයන් රවටන්නට නොහැකියි. පරාජයෙන් පාඩමක් ඉගෙන ගත්තා යැයි යමෙක් සිතන්නට පුළුවන. වාමාංශිකයාට එවැනි හැකියාවක් නැත!!! ඔහු වෙනසක් ගැන හැමදා කෑ ගහයි. ඒත් වෙනස කුමක්දැයි කියා නොදන්නේ ය.

ලුයිසිනා විශ්ව විද්‍යාලයේ මුස්ලිම් ශිෂ්‍යාවක්, ට්‍රම්ප් තොප්පි හැඳගත් සුදු පිරිමි දෙන්නෙක් ඇයගේ හිජාබය ගලවා පසුම්බිය සොරාගත්තා යැයි කළ සඳහන ලොව වටා ගිහින් BBC වෙතින් ද අහන්නට ලැබුණි. එහෙත් ලෆායෙට් හි පොලීසිය ඇය බොරුවක් ගෙතූ බවට කළ නිවේදනය ප්‍රධාන මාධ්‍යයෙන් ඇහුනේ නැත.

සැන්ටා මොනිකා හි සමරිසියෙකුට ට්‍රම්ප් අය තඩිබෑවා යැයි මාධ්‍යයෙන් අහන්නට ලැබී සැන්ටා මොනිකා නගර නිලධාරීන් අස්සක් මුල්ලක් පීරා එවැන්නෙක් සෙවුවාට සොයා ගන්නට ලැබී නැත.

සැන් ෆ්‍රැන්සිස්කෝ හි ලෙල දුන් නාට්සි කොඩිය දමා ඇත්තේ ට්‍රම්ප් විරෝධියෙකි, ඒ ට්‍රම්ප් නාට්සියෙක් යැයි කියන්නටලු. නැතිව කොඩිය එසවූ එයා නාට්සිවාදියෙක් කියන්නට නොවේලු!!!!

පෝට්ලන්ඩ් නගරයේ අති සාර්ථක ට්‍රම්ප් විරෝධතා රැළියේ 4 වැනි දිනයේ දී, නීත්‍යානුකූලව ළඟ තබා නොහැකි තුවක්කුවකින් මිනිසෙකුට වෙඩි තබා තුවාල කළ අයව දැන් අත් අඩංගුවට ගෙන ඇතත්, ඔවුන් කළු ද සුදු ද, ට්‍රම්ප් පාක්ෂිකයන් දැයි නැත්නම් ට්‍රම්ප් විරෝධීන්දැයි කියා මාධ්‍ය විසින් හෙළි නොකරති. “ට්‍රම්ප් විරෝධතා රැළියේ වෙඩි හුවමාරු වේ” යැයි ලොකු අකුරින් ලියැවෙන සිරස්තල හරියට ඇමෙරිකාවේ හැම තැනින්ම ද්වේශයෙන් පිරි වාර්තා ඇසෙන බව පැතිරීමේ පමණක් ලෝක මාධ්‍ය නියැළී සිටිති.

වාම අදහස් වලින් පෝෂණය වූ ජනතාව ඉල්ලන්නේ විසල් ආණ්ඩුවට කළ නොහැකි වෙනසක් විසල් ආණ්ඩුවක් තුලින් කරගන්නටයි. ඒ නිසා ට්‍රම්ප් ගෙනෙන වෙනස ද ජනතාව පතන වෙනස නොවේවි.

ඇමෙරිකාව ප්‍රජාතන්ත්‍රවාදී ජනරජයකි

Posted in Uncategorized by arunishapiro on නොවැම්බර් 10, 2016

මේ අඩවිය කියවන අය නම් දැනටමත් දන්න දෙයක් තමයි ඇමෙරිකාව බහුතරයගේ මතයට ඉඩදෙන ප්‍රජාතන්ත්‍රවාදයක් නොවන බව. රටේ ව්‍යවස්ථාවෙන් සහ අයිතීන්ගේ පනත (Bill of Rights) වලින් බහුතරයකට බලය ලැබීම පමණින් රටේ නීතිය වෙනස් කළ නොහැකි අන්දමින් හැදීමෙන් ජනතාව විසින් ජනතාව පාලනය කරන ක්‍රමය හෙවත් ප්‍රජාතන්ත්‍රවාදය එක්ක ජනරජ හෙවත් රිපබ්ලික් ක්‍රමයත් ආරක්ෂා කරගැනුණ.

එහෙම කළේ, බහුතරයකට වැඩි බලයකින් සුලුතරයේ කැමැත්ත යටපත් කිරීමට ඉඩ නොදෙන්නයි. මුල් ඇමෙරිකාවේ ප්‍රාන්ත අතර පැවතුනේ හරියට රටවල් කිහිපයක් අතර දකින්නට හැකිතරම් වූ වෙනස්කම්. කෘෂිකර්මය දකුණු ප්‍රාන්තවල වැඩියෙන් ද, කර්මාන්ත උතුරු ප්‍රාන්තවල වැඩියෙන් ද තිබුණ. දකුණේ වහල් ක්‍රමය පැවතෙද්දී උතුරු ප්‍රාන්ත එයින් අයින් වී හිටිය. රටේ මැද්දේ අලුතින් හැදිච්ච ප්‍රාන්ත බලා ගිය පුරෝගාමීන් අත්වින්ඳේ එතෙක් ස්ථාපිත ප්‍රාන්තවල වැසියන් මුහුණ නොපෑ ගැටළු වලට. ස්පාඤ්ඤ සහ මෙක්සිකන් අධිරාජ්‍යයන් වලින් එල්ල වූ තර්ජන වලට හසූ වූයේ ෆ්ලොරීඩා සිට ටෙක්සාස් දක්වා විසූ ජනතාව.

ඇමෙරිකාව නමින් රට බිහිවෙන්නත් කළින් පංදිචි වී සිටි පෙදෙස්වල පාරවල්, පාලම්, පාසැල් යනාදිය ගොඩනැඟී තියෙද්දී, ඒ අයට නියැළෙන්නට හැකි ආදායම් මාර්ග තිබිය දී, ඒ අය අතරින් සමහර පුරවැසියන් නොදන්නා නොහඳුනන ප්‍රදේශයන්ට ඇදී ගියේ ස්වකීය වෙහෙසෙන් පවතින තත්වයට වඩා වෙනස් හොඳ තත්වයක් ගැන ඇහෙද්දී. දැනට ඇති තත්වයට වඩා ඒ වැඩියෙන් හොඳ තත්වය ලබාගැනීමේ පරමාර්ථයෙන්. කළින් ස්ථාපිත වූ ප්‍රාන්ත බලයෙන්, ධනයෙන් හා ජනගහණයෙන් වැඩි වෙද්දී අලුතින් බිහිවූ ප්‍රාන්ත බලයෙන්, ධනයෙන් හා ජනගහණයෙන් අඩු වූවා.

ජනාධිපතිවරයෙක් තෝරාගැනෙද්දී නිව් යෝර්ක් ප්‍රාන්තයේ හෝ ටෙක්සාස් ප්‍රාන්තයේ බහුතරයේ කැමැත්ත රටේ හැමෝගෙම කැමැත්ත බවට පත්නොවෙන ක්‍රමය තමයි ඉලෙක්ටෝරල් කොලෙජ් ක්‍රමය. මෙහි දී ‘කොලෙජ්’ යන්නෙහි අර්ථය ඉගෙන ගන්නා තැනක් යැයි කියැවෙන ‘විද්‍යාලය’ නෙමෙයි. කල්ලියක්, සංවිධානයක්, පිරිසක්, නැත්නම් එකමුතුවක් කියන්නටයි යොදා ගැනෙන්නෙ. ඒ නිසා මෙය හඳුන්වන්නට සුදුසුම වචනය ‘මැතිවරණ සාමූහිකත්වයේ ක්‍රමය‘ යැයි කියන්න පුළුවන්. රටේ වැසියන් සියළුම දෙනා අතර ජනප්‍රියත්වයෙන් වැඩිම වූ ජනාධිපතිවරයාව සංස්කත වශයෙන් එකමුතු කරන්නට හැකියාව පාදාගන්නටයි මේ ක්‍රමය හැදෙන්නේ.

ඇමෙරිකන් ජනාධිපතිවරණයක අපේක්ෂකයන් තම උප ජනාධිපතිවරයා තමන්ගේ ප්‍රාන්තයෙන් නොව වෙන ප්‍රාන්තයකින් තෝරාගන්නේ මේ ක්‍රමය නිසා. දකුණේ වැසියන්ට ඇත්තේ උතුරේ අයගේ සිතැඟියාවන් නොවේ. රට මැද්දේ අය දෙපැත්තේ අය හා එකඟ නොවෙන අවස්ථා ඕන තරම්.

උතුර, දකුණ හෝ රට මැද්ද, නැගෙනහිර හෝ බටහිර කියා රටේ එක පැත්තක් පමණක් ගත්තොත්, මැතිවරණ සාමූහිකත්වයේ ක්‍රමයෙන් දිනන්නට අවශ්‍ය චන්ද 270 ලබාගන්නට කිසිම කලාපයකට බැහැ. ඉතින් මේ මැතිවරණ සාමූහිකත්වයේ ක්‍රමය නිසා ජයග්‍රාහී ජනාධිපතිවරයා තේරීමට මුළු රටම නියෝජනය වන ආකාරයට ජනප්‍රසාදය එකමුතු කිරීමක් සිද්ධ වෙනව. 1888 දී පවා ඇමෙරිකන් වැසියන් අත්දැකි අන්දමට, රටේ සමස්ත වැඩි චන්ද සංඛ්‍යාව ලබාගන්නට සමත් වූ පමණින් අපේක්ෂකයෙක් ජනාධිපතිවරණයේ ජයග්‍රාහකයා වෙන්නේ නැහැ.

සුලුතරයට වෙනස් ලෙසකින් සැලකීම අවම කරගත හැකි එකම ක්‍රමය සියල්ලන්ටම පොදු නීති පැනවීම. ඇමෙරිකන් ව්‍යවස්ථාව සහ අයිතීන්ගේ පනත දක්වන්නේ සියළු රටවැසියන් සඳහා වූ පොදු නීති. ඕනෑම සුලුතරයක් ආරක්ෂා කරන නීති. බහුතර බලයකින් පත්වෙන රජයකට පවා මැදිහත් වෙන්න ඉඩ නොලැබෙන නීති.

සුලුතරය ආරක්ෂා කෙරෙන පොදු නීතිය ගැන අවබෝධය අද ලොව බොහෝ පුරවැසියන්ට නැහැ. සුදු කළු, ස්ත්‍රී පුරුෂ යනාදී ලක්ෂණ අනුව වෙනස් නීති හැදීමට පටන් ගැනීම යනු ‘මිනිසා’ අමතක කිරීමයි. ඒත් මිනිස් බව අමතක නොකළ යුතුයි කියා වැඩියෙන්ම කෑ ගහන අය තමයි වර්තමානයේ පොදු නීති වලට කැමති නැත්තේ. ඒ අය මිනිසුන් සඳහා වෙනස් නීති හදන්නට තමන් දන්නවා කියගත් අය. හමේ පාට, ලිංගික භේදය එහෙමත් නැත්නම් තමන් අදහන ආගම වගේම පිටස්තරයෙකුට පැහැදිලිව දැකිය හැකි වූවක් තමයි අයෙක් ආදායම් උපයන්නට තවකෙකුට වඩා වැඩියෙන් සමත්වීම. හමේ පාට කළු නිසා බස් රථයක මුල් කොටසේ ඇති ආසනවල වාඩි වීම වැරදි නම්, ගැහැණියක් නිසා චන්දය ප්‍රකාශයට අයිතියක් නැතැයි කීම වැරදි නම්, යුදෙව් හෝ මුස්ලිම් ආගමිකයෙක් වූ නිසා ඝාතනය කිරීම වැරදි නම්, එහෙනම් වැඩියෙන් ආදායම් උපයන්නට හැකියාව ඇති පමණින් වැඩියෙන් බදු ගෙවන්නට සිද්ධ වීම ද වැරදි බව මේ අයට වටහාගත හැකියාව නැහැ.

මැතිවරණ සාමූහිකත්වයේ ක්‍රමය සාධනය කරන්නේ රටේ අඩුවෙන් නියෝජනය වෙන කණ්ඩායම්වල කැමැත්ත. රටේ ජනවාර්ගික සුලුතරය එනම් කළු සහ හිස්පැනික් යනාදී වශයෙන් සැලකෙන කණ්ඩායම් වැඩියෙන් පදිංචි වෙලා ඉන්නේ වැඩියෙන්ම මැතිවරණ සාමූහිකත්වයෙන් යුතු ප්‍රාන්ත වලයි. ඒ නිසා, ඔවුන්ට පුළුවන් ජනාධිපතිවරණයක දී ඔවුන්ගේ ජන සංඛ්‍යාවට වඩා ඉතා මහත් වූ චන්ද සංඛ්‍යාවකින් තමන්ගේ අපේක්ෂකයාව දිනවන්න. රටේ සමස්ත වැඩි චන්ද සංඛ්‍යා දිනුම නොලැබ එහෙත් මැතිවරණ සාමූහිකත්වයේ ක්‍රමයෙන් පැහැදිලි වශයෙන් වැඩි දිනුම ලැබූ ට්‍රම්ප් නිසා අද ඒ ක්‍රමය ගැන නෝක්කඩු කියන අය වැඩිවුවත්, ක්‍රමය කුමක්දැයි දන්නවා නම් එය ආරක්ෂා කරගත යුත්තක් බවත් දන්නව.

මැතිවරණ සාමූහිකත්වයේ ක්‍රමය රටක ප්‍රධාන පක්ෂ දෙකක් පවත්වාගෙන යන්නත් උපකාර වෙනව. මැතිවරණ සාමූහිකත්වයේ ක්‍රමය තුලින් ප්‍රධාන පක්ෂයෙන් ඉදිරිපත් නොවෙන අපේක්ෂකයෙකුට රටේ වැඩි ජනප්‍රිය චන්ද සංඛ්‍යාවක් දිනාගන්නට ඉතාමත් අසීරුයි. තෙවැනි පක්ෂ හිතවාදියෙක් හැටියට මේක අපිට දැඩි අභියෝගයක්. ඒත් එහෙමයි කියල ක්‍රමය නුසුදුසුයි කියන්නේ නැහැ!!!!

වසර 200 ක් පුරා, 50 කට වැඩි ජනාධිපතිවරණ තුලින් දකින්නට ලැබෙන්නේ මේ මැතිවරණ සාමූහිකත්වයේ ක්‍රමය නිසා රටේ ජනාධිපතිවරයාට ජනප්‍රිය චන්ද ප්‍රමාණවත් තරමකට ලැබී ඇති බව. ඒ වගේම ඒ ජනප්‍රියත්වය රට පුරා ප්‍රමාණවත් අන්දමින් පැතිර ඇති බව. එයින් කාර්යක්ෂමකව රට ආණ්ඩුකරන්න අවස්ථාව ජයග්‍රාහික ජනාධිපතිවරයාට පාදා දෙනව.

හොඳ සහ නරක ඇමෙරිකන් ජනාධිපතිවරු

Posted in Uncategorized by arunishapiro on නොවැම්බර් 7, 2016

මැතිවරණ පොරොන්දු කඩ නොකරන්නට සමත් වූ ඇමෙරිකන් ජනාධිපතිවරයා කවුදැයි කෙනෙක් ඇහැව්වොත් දිය යුතු හොඳම පිළිතුර තමයි විලියම් හෙන්රි හැරිසන්. නම වැනි ජනාධිපති හැටියට තනතුර බාරගෙන නිලයේ සිටි 32 වැනි දිනයේ දී ඔහු මිය යන ලදි.

ඇමෙරිකන් ඉතිහාසයේ හොඳ ජනාධිපතිවරයෙක් හැටියට මාටින් වැන් බියුරන් දක්වන්න පුළුවන්. ආණ්ඩුවේ වැය සහ බදු යන දෙකම ඉතා පහළ මට්ටමින් තියාගන්නට සමත් වූ ජනාධිපතිවරයෙක් තමයි ඔහු. ඒ වගේම බැංකු සහ රජය අතර ගණුදෙනු වෙන් කර තබන්නටත් සමත් වූවෙක්.

ඇමෙරිකන් ඉතිහාසය පිරිලා තියෙන්නේ රට සහ ජනතාව යුද්ධයට ඇදගෙන යන්න සමත් වූ ජනාධිපතිවරු වෙතින් වෙද්දී, බියුරන්ගේ විදේශ ප්‍රතිපත්ති වලින් යුද්ධ දෙකක් වළක්වාගන්නට හැකියාව ලැබුණ. එකක්, ටෙක්සාස් ප්‍රාන්තය ඈඳා ගන්නා මෙහෙයුම නවත්වා දැමීමෙන් මෙක්සිකෝව හා යුද වැදීම වැළැක්වීම. අනෙක, බ්‍රිතාන්‍ය කැනඩාවෙන් ස්වාධීන වෙන්නට උවමනා වූ වැසියන් සමඟ මේන් ප්‍රාන්තයේ සහ නිව් යෝර්ක් ප්‍රාන්තයේ හටගත් ආරවුල් දෙකක දී බ්‍රිතාන්‍ය හා යුද වැදීම වැළැක්වීම.

තවත් හොඳ ජනාධිපතිවරයෙක් තමයි ග්‍රෝවර් ක්ලීව්ලන්ඩ්. අඩු බදු, නිදහස් වෙළඳාම වගේම එයාට කළින් හිටපු ජනාධිපතිවරුන් 21 දෙනාටම වඩා වැඩියෙන් කොංග්‍රසය එවන පනත් අහෝසි කරලා දැම්ම අයෙක්. ඒ කියන්නේ ජන ජීවිතයට නීති ගෙනැවිත් මැදිහත්වෙන්න අකමැති වූ ජනාධිපතිවරයෙක්.

ක්ලීව්ලන්ඩ්ට කළින් හිටපු බෙන්ජමින් හැරිසන් ජනාධිපතිවරයා 1890 දී ශර්මන් රිදී මිල දී ගැනීමේ පනත ගෙනැවිත් තිබුණේ. මේ පනතෙන් රට අලුතෙන් අච්චු ගැසූ මුදල් නෝට්ටු වලින් ඇමෙරිකන් භාණ්ඩාගාරය රටේ රිදී පතල් වල සම්පූර්ණ නිපැයුම මිල දී ගන්නට සූදානමින් හිටියෙ. මාසයකට රිදී අවුන්ස මිලියන 4.5 ක් බැගින්. රිදී වල වෙළඳපොල වටිනාකමට වඩා දෙගුණයක් වැඩියෙන් ගෙවලා භාණ්ඩාගාරය ඒවා රිදී ඩොලර් වලට හරවලා, ඒවා දීලා එවක වෙළඳපොල රත්තරන් අගයෙන් බාගයක් මිල දී ගන්නයි පනත හැදිලා තිබුණේ. පනත ඒ කාලේ හිටපු රිදී ආයෝජකයන්ගේ වාසියට ගෙනාපු පනතක්. ඒකෙන් ඇමෙරිකාවේ මුදල් සහ ආර්ථිකයට ඍජු මැදිහත්වීමක් සිද්ධ වුණා. 1893 ආර්ථික භීතිය සහ ඊට පසුව ආපු ආර්ථික අවපාතය මේ පනතේ ප්‍රතිඵලයක්. කොංග්‍රසය ඒ පනත ගෙනෙද්දී රටේ බහුතරයගේ ප්‍රසාදය ඊට හිමිවෙලා තිබුණේ. ඒත් ක්ලීව්ලන්ඩ් ජනාධිපති වුණාට පස්සේ ඔහු මුඛ පිළිකා රෝගයෙන් පෙළෙමින් සිටියත් රටේ මුදල් අගය අවුල් කරන්න ඉඩ දීම දේශප්‍රේමිත්වය නෙමෙයි කියල ඔහු තම කොංග්‍රසය ලවා පනත අවලංගු කරවන්නට සමත් වෙනව.

පළමු ලෝක යුද්ධය නිසා වැඩි වූ ජාතික ණය සහ එකතැන ලැග සිටි ආර්ථිකයක් දායාද වෙන්නේ වොරන් ජී. හාඩින් ජනාධිපතිවරයාට. හාඩින් සිය නිල කාලයේ දී බදු අඩුකරන්න සමත් වූවෙක්. ඒ වගේම ෆෙඩරල් ආණ්ඩුවේ වැය බාගයකින් අඩු කරනවා පමණක් නෙමෙයි විරැකියාව 11.7 න් 2.4 දක්වා පහතට ගෙනියන්න ඔහු සමත්වෙනව.

“ආණ්ඩුවට වැඩියෙන් බිස්නස් ලබාගන්න නම් බිස්නස් ඇතුලේ ආණ්ඩුව ඉන්න ඕන අඩුවෙන්” කියල කිව්වේ හාඩින්. සියළු ව්‍යාපාරයන්ට බදු අඩු කිරීම නිසා ඒ කාලයේ තමයි සීතකරණ, හඬ කැවූ චිත්‍රපටි, වායුසමීකරණ, දුරකතන වගේම ගුවන් ගමන් ව්‍යාපාරයන් ඇතිවෙන්නේ. 1920 ගණන් තමයි සෑම වාර්ෂික අයවැයක දී ම අතිරික්ත දකින්නට හැකියාව ලැබෙන ඇමෙරිකන් ඉතිහාසයේ අන්තිම දශකය. හාඩින් සහ කූලිජ් ජනාධිපතිවරයන් යටතේ ෆෙඩරල් ආණ්ඩුවේ ණය තුනෙන් එකක් අඩු වෙනව.

කැල්වින් කූලිජ් ඇමෙරිකන් ඉතිහාසයේ නිහඬම ජනාධිපතිවරයා හැටියට හැඳින්වෙන්නෙ. ඒත්, ඔහුට පෙර වූ ජනාධිපතිවරුන් සියල්ලන්ටම වැඩියෙන් කතා පවත්වන ලද්දා ඔහුයි. ඒ පැවැත්වූ කතා සියල්ලම ඔහු සියතින් ලියා ගන්නා ලද ඒවායි. ජනාධිපති නිවස හෙවත් වයිට් හවුස් හි සිට ඔහු ජනමාධ්‍ය හමුවන් මාසයකට 8 ක් බැගින් පවත්වන ලද්දෙක්. ඒත් ඔහුට ‘නිහඬ කැල්’ කියල නමක් වැටෙන්නේ උත්සව සාද වල දී වැඩිය කතාබහ නොකරන නිසා.

එක රාත්‍රී භෝජන සංග්‍රහයක දී ඩොරොති පාකර් කියන පුවත්පත් කලාවේදිනිය ඔහුට ළං වෙලා කිව්වලු, ‘මම යාළුවෙක් එක්ක ඔට්ටුවක් ඇල්ලුවා මිස්ටර් ප්‍රසිඩන්ට්, ඔබ ලවා අඩුම ගානේ වචන තුනක්වත් පිටකරගන්නා බවට.” ඔහු පිළිතුරු දී ඇත්තේ “ඔබ පරාදයි!” කියායි.

ඔහුට කළින් ඇමෙරිකාවේ පිහිටුවා ගත් මහ බැංකුවේ මුල්‍ය ප්‍රතිපත්ති මැදිහත්වීම් නොවෙන්නට, ජනාධිපති හර්බට් හූවර් සහ ටෙඩී රූසවෙල්ට් ගෙනෙන ලද වැරදි ප්‍රතිපත්ති නොවෙන්නට, කූලිජ් ජනාධිපතිවරයා අදායම් බදු අඩුකරමින් ගෙනෙන ලද සශ්‍රීකත්වය තුලින් 1930 මහා අවපාතය වළක්වාගන්නට හැකිවෙනව.

ඉතා හොඳ චරිතයකින් යුතු වූ කූලිජ් රටේ ව්‍යවස්ථාව ආරක්ෂා කරන ලද සහ ජනතාවගේ නිදහස පාවා නොදුන් ඉතාමත් හොඳ ජනාධිපතිවරයෙකි.

ඇමෙරිකාවේ නරකම ජනාධිපතිවරයා තමයි වුඩ්රෝ විල්සන්. ප්‍රින්ස්ටන් විශ්ව විද්‍යාලයේ සභාපති හැටියට සේවය කළ කාලයේ දී ඔහු කළු හමැති අයව කැම්පස් එකෙන් අයින් කරලා තියන්න කටයුතු කරන ලද්දෙක්. රටේ ජනාධිපති වුණාම ඔහු රජයේ විධායක අංශයේ සියළුම දෙපාර්තමේන්තු වලින් කළු අයව අයින් කරලා තියන්න නියම කළ අයෙක්. රජයේ ඉහළ නිල තනතුරු කිසිවකට කළු අයෙකුව පත් නොකරන ලද්දෙක්.

යුරෝපයේ ඇවිලෙන යුද්ද වලට මැදිහත්වෙන්න ගිහින් වැඩේ වැරදුනාට පස්සේ එයා මැතිවරණයට යන්නේ ඇමෙරිකාව යුද්ධයෙන් ඉවත් කරලා තියාගත්ත පුද්ගලයා තමන් යැයි කියා ගනිමින්! ඒත් මැතිවරණය දිනලා යළි ජනාධිපති වෙච්ච ගමන් විල්සන්ට උවමනා වෙන්නේ ආපහු යුද්ධයට යන්න. ජර්මනියේ වැසියන් හාමතේ තියල ඔවුන්ව නම්වාගන්නට අවශ්‍ය වූ බ්‍රිතාන්‍යයට සහාය දෙමින්, අවිගත් බ්‍රිතාන්‍ය වෙළඳ නැව් වලට ඇමෙරිකන් වරායන් විවෘත කරමින්, ඇමෙරිකන් ජීවිත හෝ දේපල වලට හානියක් වූවා නම් ඒවා සඳහා ජර්මනියෙන් වන්දි ලබාගන්නට අවශ්‍ය යැයි ප්‍රතිපත්ති හදන්න සහාය දෙන්නේ ඔහු. ඒ උවමනා කරල තිබ්බ විදියටම විල්සන් ඇමෙරිකාව පළමු ලෝක යුද්ධයට ගෙනියනව.

යුද්ධයේ නාමයෙන් විල්සන් ආණ්ඩුක්‍රම ව්‍යවස්ථාවේ තියන නිදහස් ප්‍රකාශ අයිතිය අවලංගු කරනව. දේශපාලනිකව එරෙහි වෙන අයව සිරගත කරනව. යුද්ධයේ නාමයෙන් විල්සන් බොහෝ පුද්ගලික කර්මාන්ත ජනසතු කරනව. ටෙලිග්‍රාෆ් සේවය, දුරකතන සේවය සහ දුම්රිය මාර්ග කර්මාන්තය වගේම ගල් අඟුරු බෙදාහැරීම ද රජයට යටතට පවරා ගන්නව.

1913 වසරේ දී ඔහු ජනාධිපති හැටියට ආදායම් බදු පටන් ගැනීමත් සහ මහ බැංකු ක්‍රමය පටන් ගැනීමත් නිසා රට අභාග්‍යයට යන පාරේ ගමන ඇරඹෙනව. ඒවායෙන් රටේ දේශපාලනඥයන්ගෙ හිතවතුන්ට වාසි ගෙනෙන්ටත්, හතුරන්ට දඬුවම් කරන්නටත්, ධනය නැවත බෙදාහරින්නටත් බලය ලබාගන්නව. රටේ බඩු මිල ගණන් වේගයෙන් ඉහළ ගිහින් වසර තුනක් පුරා ආර්ථික අවපාතයක් පැතිරී ගියා. වසර දෙකක කාලයක දී පමණක් විවිධ නගරවල පැවති කැරලි කෝලාහල නිසා මිනිස් ජීවිත 150 ක් අහිමිය ද සිද්ධ වූවා. දේශපාලනික උසිගැන්විලි තුලින් සමාජයක කලකෝලාහල ඇතිකරන්නේ කවුරැන් කෙසේදැයි කියා සමහර අයට පෙනෙන්නේ නැහැ.

පසුව එන ඇමෙරිකන් ජනාධිපතිවරුන්ට රට සහ ජනතාව යුද්ධයන්ට ඇදගෙන යන ඇමෙරිකන් හැදියාවට පහසු මාර්ගය කැපුනේ වුඩ්රෝ විල්සන් විසින් ගෙනා රටේ මුදල් අගයට මැදිහත් වන මහ බැංකු ක්‍රමය සහ ආදායම් බදු ක්‍රමයයි.

සංක්‍රමණිකයන්ට අකමැති ට්‍රම්ප් පාක්ෂිකයන් පමණ ද?

Posted in Uncategorized by arunishapiro on නොවැම්බර් 6, 2016

screen-shot-2016-11-06-at-10-26-05-am

කොලොම්බියාවෙන් නීත්‍යානුකූලව පැමිණ පුරවැසියෙක් වී සිටින අපේ පළාතේ රාජ්‍ය සේවයේ යෙදන වෛද්‍ය උපාධියක් ඇති යෙහෙළිය, තමා ට්‍රම්ප්ට චන්දය නොදෙන්නේ ඔහු සංක්‍රමණිකයන්ට අකමැති නිසා යැයි මා හා කියා සිටියාය. සංක්‍රමණිකයන් බොහොමයක් රිපබ්ලිකන් පක්ෂයෙන් ප්‍රාන්ත ආණ්ඩුකාර වැනි ඉහළ මහජන තනතුරු පවා දරන්නට සමත් වුවත්, පක්ෂය ලේබල් වී ඇත්තේ සංක්‍රමණික විරෝධී හැටියටයි. වෙනත් දේවල් ගැන කතාබහෙන් අප දෙදෙනා අතර කාලය ගෙවී යද්දී ඇය හිටිහැටියේ වෙනිසියුලාවෙන් දහස් ගණනක ජනතාවක් බඩු මිල දී ගන්නට කොලොම්බියාවට ඇදෙන නිසා දැන් කොලොම්බියාවේ බඩු මිල ඉහළ ගිහින් යැයි නෝක්කඩු කියන්නට පටන් ගත්තාය!!!

තමන් උපන් රටවල් හැර දා ආවේ මන්දැයි බොහෝ සංක්‍රමණිකයන් හා සරණාගතයන් විමර්ශනය නොකරති. අහිතකර ඵලවිපාක පමණක් දකින ඔවුන් ඒවා හටගත්තේ කෙසේදැයි කියා සොයා නොබලති. හිතට හුරු ආකල්ප සත්‍ය ලෙසින් පිළිගෙන සිටීම ඔවුනට ප්‍රමාණවත්.

කොලොම්බියාවේ ජනාධිපති, 2016 නොබෙල් සාම තෑග්ග හිමි වූ හුවාන් මැනුවෙල් සාන්ටොස්, අයවැය බදු ප්‍රතිසංස්කරණ ඉදිරිපත් කර ඇත. දුප්පතුන්ට බෙදන සමාජ සුබ සාධනය නොනවත්වා කරගෙන යන්නට නම් ඉහළ බදු අවශ්‍ය යැයි හේ කියා සිටියි. මුදල් ඇමති මොරිසියෝ කාඩෙනාස් කියන්නේ, “පාසැල්, ඉස්පිරිතාල, යටිතල පහසුකම් වලට ආයෝජනය නොකර ඉන්න බැහැ. බදු ඉහළ යෑම කටුකයි. ඒත් ඒවා අනිවාර්යෙන්ම කළ යුත්තක්,” බවයි.

ඒත් සත්‍යයෙන් සිද්ධ වෙන්නේ කුමක්ද? මේ සහනාධාර හෝ ආයෝජන යොදා ගැනෙන්නේ දුප්පතුන්ගේ තත්වය යහපත් කරන්නට නොව රාජ්‍ය ආයතන වල පඩි ගෙවන්නට, විශ්‍රාම වැටුප් යනාදියටයි. සමස්ත විශ්‍රාම වැටුප් අරමුදලෙන් දුප්පත්ම කොලොම්බියන් 20% ට ලැබෙන්නේ 0.3% ක් පමණකි. කොලොම්බියාවේ ධනවත්ම 20% යනු සහනාධාර වලින් 63% ක්ම ලබන්නෝ වෙති. බදු මිල ඉහළ යන්නේ ජාතික අයවැයේ කොටස් සඳහා මුල්‍ය සපයන්නටයි. VAT වැඩි කරමින් සහ ආදායම් බදු ගෙවිය යුතු ආදායම් මට්ටම් පහළට දමමින් රාජ්‍ය වැය දුප්පත් ජනතාව පිට පටවන්නට මේ අයවැය යෝජනා සකස් වී ඇත.

නොමිලේ යමක් දිය හැකියාව ඇත්තේ රජයට යැයි සිතන පුරවැසියන් ලොව සෑම රටකම පාහේ වැඩියෙන් සිටිති. චන්දයෙන් ඔවුන් වැඩි වැඩියෙන් දේවල් නොමිලේ සපයන්නට පොරොන්දු දෙන චන්ද අපේක්ෂකයන් තෝරා පත් කරගනිති. ඉන්පසු බදු වැඩිවෙනවා දැක හූල්ලමින් මේ රජය පළවා හැර වෙන රජයක් අවශ්‍ය යැයි ඉල්ලති.

දුප්පතුන්ට සුබසාධනය සලසනවාට විරුද්ධවීම නොව මේ කියන්නේ, ඕනෑම රජයක් තමන්ට කළ නොහැකි කර්තව්‍යයන්ට මැදිහත්වීමෙන් ආර්ථිකය බංකොළොත් කිරීම සහ සාමය බිඳ දැමීම ගැනයි. මේ කියන්නේ, දුප්පතුන්ට සුබසාධනය සලසනවා යැයි කියමින් දුප්පතුන්වම තවත් පීඩිත කිරීම ගැනයි.

ඇමෙරිකාව සංක්‍රමණිකයන් වෙතින් හැදිච්ච ඔවුන්ගේ ඒකීය පුද්ගල වූ වෑයම් නිසාම සශ්‍රීක වූ රටකි. අධ්‍යාපනය, සෞඛ්‍ය, නිවාස, සහ සුබසාධන දීමනා නොමිලේ බෙදන, සැමදා දියුණුවෙමින් පවතින රටවලින් එන අය බොහොමයක් තම රටේ නොමැති වූ අවස්ථා මෙහි තවමත් ඉතිරි වී ඇත්තේ මන්දැයි විමර්ශනයට උත්සාහයක් නොගනිති. අර ආණ්ඩුව පෙරළා මේ ආණ්ඩුව පත්කරගත්තාම ඔක්කොම හරි යැයි සිතන මෙවැනි අය, තම රටේ බැරි වුනාට ඇමෙරිකාවේ දී, යුරෝපයේ දී, කැනඩාවේ හෝ ඔස්ට්‍රේලියාවේ ආණ්ඩුවකට බාර දුන්නොත් හරියට බෙදන්න ඔවුන් දන්නවා යැයි සිතති.

ගැරී ජොන්සන් ජනාධිපති අපේක්ෂකයා ලෙසින් ඉදිරිපත්වන ලිබටේරියන් පක්ෂය වර්තමාන ඇමෙරිකාවේ සීමිත ආණ්ඩුවක් වෙනුවෙන් පෙනී සිටින එකම පක්ෂයයි. සීමිත ආණ්ඩුවක් යනු යම් පිරිසකගෙන් අරගෙන තවත් පිරිසකට බෙදන්නට දන්නවා කියාගත් ආණ්ඩුවක් නොවේ. තමන්ට තමන් ඉපදුන ගම රට හැරදා, තමන්ගේ හැකියාවන් කුසලතාවයන් අනුව වත්කමක් උපයාගන්නට වෙනත් රටක් බලා එන්නට සිද්ධ වූයේ එම නොමිලේ බෙදන ප්‍රතිපත්ති වලට සැමදා චන්දය දුන් නිසාම යැයි නොදන්නා සංක්‍රමණිකයන් බහුතරය සීමිත ආණ්ඩුවක අගය නොදනිති.

සීමිත ආණ්ඩුවක් යම් පිරිසකට විශේෂ වූ නීති පනවන්නේ නැත. ඉහළ ආදායම් උපයන අයට බදු, රටේ සමහර පිරිසකට පමණක් වාහන බලපත්‍ර, සමහර අයට පමණක් විශේෂ විවාහ නීති යනාදිය සැමටම පොදු නීති නොවෙති. එවැනි නීති වලින් මේ කොටස තාර්කිකයි, සමාජයට වැඩදායකයි සහ මේ කොටස එසේ නොවේ යැයි පෙන්වා දෙන්නේ අනුන්ට හොඳ මොනවාදැයි කියන්නට තමන් දන්නවා කියාගත් අය පමණකි.

එවැනි නීති හැදීමට පටන් ගත්විට, කාලයක් යද්දී නීතියේ අරමුණ කුමක්දැයි මිනිසුන්ට පහදා ගන්නට නොහැකි වේ. මුස්ලිම් සංක්‍රමණික පිරිමින් ජර්මන් කාන්තාවන්ට ආන්ඩතේට්ටම් කළ අවස්ථාවේ දී, ඊට ලක්නොවන්නට නම් ජර්මන් කාන්තාවන් ද සිරුර වසාගෙන පාරට බැසිය යුතු යැයි කියනවා අහන්නට ලැබුණේ මේ නිසයි!!

කැනඩාවට හොරෙන් පනින සංක්‍රමණිකයන් නැති තරම්. එහි වියපත් ජනතාව වෙනුවෙන් ආදායම් උපයන්නට (ඔස්ට්‍රේලියාවේ මෙන්ම) රටට අවශ්‍ය කුසලතා ඇති අය ගෙන්වා ගන්නා නීත්‍යානුකූල සංක්‍රමණික ක්‍රමයක් පවතී. සරණාගතයන්ට ඉඩ ලබාදෙන කැනඩාවේ ක්‍රමය ඔවුන් රටට ඇතුලත් වන්නට පෙර දැඩි විමර්ශනයට හසු කරන්නකි. එනම්, යුරෝපයට මෙන්, ඇමෙරිකාවට මෙන් බුරුතු පිටින් හොරෙන් ඇතුල්වන්නට හැකියාව කැනඩාවේ ඉතා අඩුයි.

මගේ කොලොම්බියන් යෙහෙළිය මෙන් කැනඩාවේ අයත් තායිවාන් හා හොංකොං වැසියන් බුරුතු පිටින් වැන්කුවර් නගරයට පැමිණීම නිසා බ්‍රිටිශ් කොලොම්බියා ප්‍රාන්තයේ නිවාස මිල ගණන් ඉහළ ගිය හැටි ගැන නෝක්කාඩු කියූහ. රැකියා පුරප්පාඩු පියවීම සඳහා ශ්‍රමිකයන් අවශ්‍යයයි. ඒත් ඒ ශ්‍රමිකයන් නිසා නිවාස මිල ඉහළ යනවාට අකමැතියි. තමන්ට ශ්‍රමිකයෙක් හැටියට වෙන රටකට යෑමට අවසර ලැබිය යුතු යැයි සිතුවාට තමන්ගේ රටට පිටරටෙන් ශ්‍රමිකයන් එනවාට අකැමතියි.

සිරියන් සරණාගතයන් දැඩි විමර්ශනයට ලක් කළ යුතු යැයි ඩොනල්ඩ් ට්‍රම්ප් මැතිවරණ වේදිකාවේ කියද්දී ඇමෙරිකන් වැසියන් බොහොමයක් ඊට සතුටු වූහ. කැනඩාවේ වැනි විමර්ශනයක් සිද්ධ වේ නම් ට්‍රම්ප් ද සතුටු වනු ඇතැයි ‘ද ඉකොනොමිස්ට්’ සඟරාව පවා කියා සිටියි. නොබෝදා ඔස්ට්‍රේලියාවේ අගමැති මැල්කම් ටර්න්බුල් ද හොරෙන් ඇතුල්වන්නට හදන අය වෙනුවෙන් නව පනතක් ගෙන එන්නට යෝජනා කළේය.

දේශපාලන සරණාගතයන් හැටියට නොව රැකියා පිණිස නීත්‍යානුකූලව ඇතුල්වීමට හැකි පහසු ක්‍රම සෑම රටකම ක්‍රියාත්මක වෙන්නේ නම් වියපත් වැසියන් බහුල රටවල් වලට සහ විශේෂඥ දැනුම අඩු රටවලට එයින් දැඩි වාසි ලැබේ. එහෙත් රටට ගෙන්වා ගන්නේ කවුදැයි කොපමණ සංඛ්‍යාවලින්දැයි තීරණය කරන රජය එතැනින් නොනැවතී සියල්ලන්ටම අධ්‍යාපනය, සෞඛ්‍ය, නිවාස සහ සුබසාධන බෙදීමට ද මැදිහත්වීම නිසා සංක්‍රමණිකයන්ගේ වටිනාකම දකින්නට නොහැකි වී රටේ පුරවැසියන් අතර භින්න භේද පැතිරෙයි. සිරියන් සරණාගතයන්ට දොර විවෘත කරද්දී ඔමාබා රජය සිරියන් ක්‍රිස්තියානුවන්ට අඩුවෙන් අවසර දෙන ලදි.

පසුගිය වසරේ මුල් කාලයේ දී අන්ගලා මෙයර්කල් ජර්මනියට එන්න යැයි සිරියන් සරණාගතයන්ට ආරාධනා කළාය. සරණාගතයන් නිසා තමන්ගේ පංගුව අඩුවේවි යැයි සිතන ජර්මන් වැසියන් පහුගිය මැතිවරණ වල දී ඇයගේ පක්ෂයට ලැබුණු චන්ද සංඛ්‍යාව අඩු කරන්නට සමත් වූහ. යුරෝපීය රටවල් බොහොමයක ජාතිකත්වයෙන් ඔකඳ වූ ද, සංක්‍රමණික විරෝධී වූ, දේශපාලන අදහස් වලට යළි පිබිදීමක් ලැබෙන්නේ ඒවායේ බහුතර පුරවැසියන් තම පංගුව සැබැවින්ම වැඩිවෙන්නේ කුමන ආකාරයෙන්දැයි නොදන්නා නිසයි.

සමාජීය හෝ ආර්ථික අර්බූද ඇතිකරන හතුරා සංක්‍රමණිකයන් හෝ සරණාගතයන් නොවෙති. කරන්නට නොදත් කටයුතු වලට බලය පවරමින් තමන්ම විසල් කරගන්නා ආණ්ඩුව හතුරා යැයි දැකීම කොතරම් පහසු ද, ඒත් ඊට අපි කොතරම් අකමැති ද? සංක්‍රමණික සහ සරණාගත විරෝධය ජනතාව තුල වපුරවන්නේ ජාතික හැඟීම් උද්දාම කර බෙදන බලය තම අතට ගන්නට වෙහෙසෙන දේශපාලනඥයන් බව අපට වැටහෙන්නේ නැතිවාම නොවේ. රටේ ආර්ථිකය අඩපණ වූවාට ඒ දේශපාලනඥයන්ට නම් කම් නැති බවත් අපි නොදන්නවාම නොවේ.

තමන් හැර දා ආ රටේ අහිතකර වූ ප්‍රතිපත්ති වෙනුවෙන් තමන් පැමිණ සිටින රටේ දී ද චන්දය ප්‍රකාශ කරන්නේ නම් ඇතිවන ප්‍රතිඵලය කුමක්වේදැයි නිකමට සිතා බලන්න. ඕනෑම රටක ආර්ථිකයක් දියුණු වෙන්නේ ද, සංක්‍රමණික සහ සරණාගත හෝ සුළු ජාතික විරෝධයක් ජනතාවක් තුල නැති වී යන්නේ ද, රජයට බලය පවරා නොමිලේ බෙදිය හැකි දේවල් නැතැයි අවබෝධයෙන් බව අපි අවබෝධ කරගන්නා දිනයේ දී ය. එවිට සැබෑ සශ්‍රීකත්වයක් සහ සැබෑ සාමයක් ලෝකය පුරා පැතිරේවි.