අරුණි ශපීරෝ‍ වෙතින්

විද්‍යාවෙන් බියගන්වා අවිද්‍යාත්මක විසඳුම් ගෙනෙන හැටි

Posted in Uncategorized by arunishapiro on ජූලි 30, 2013

“මිනිසුන් ඔවුන්ගේ ස්වචාරයන් (idiosyncrasies) වලින් ජීවත් වී ඔවුන්ගේම රෝග වලින් මිය යති,” -වියට්නාමයේ කියමනකි.

මිනිස් ස්වභාවය සෑම මනුෂ්‍යයෙකුට ම පිහිටා තිබිය ද, ඒ ස්වභාවයෙන් ඒ ඒ ඒකීය මිනිසා කටයුතු කරනා ආකාරයන් විවිධ වෙයි. හදිසි කෝපය මිනිස් ස්වභාවයක් වුවත් එය දමනය කරගත් බොහොමයක් මිනිස්සු අප අතර සිටිති. වාසය කරන පළාත අනුව පරිසරයෙන් සිද්ධ වෙන බලපෑමත්, පළාතේ නීති රැකෙන/නොරැකෙන විදිය අනුවත්, විලාසිතා රැල්ලක් එන යන ආකාරයෙන් වගේ ම ඒකීය පුද්ගලයා තුල වූ ස්වාධීන ඕනෑ එපාකම් අනුව ද විවිධ කොන්දේසි යම් තීරණයක් ඉදිරියේ කරළියට පැමිණෙති.

කොතරම් හොඳින් අධ්‍යයනයක් හදා ගත්ත ද, ඒ අධ්‍යයනය කරන ලද පරීක්ෂකමාන්‍යයන්ට බැහැරින් එහි ප්‍රතිඵල නිතැතයෙන් ම අදාල කළ නොහැකියි. වයස, ස්ත්‍රී පුරුෂ භාවය, සමාජ ආර්ථික සහ අධ්‍යාපන මට්ටම, ජනවර්ගත්වය, දැනට පවතින සෞඛ්‍ය තත්වය යනාදියත්, අළුතින් ගෙනෙන රෙගුලාසි, සමාජ වැඩ සටහන්, ආහාර වට්ටෝරු නිර්දේශ යනාදී මෙකී නොකී සියල්ල යම් අයෙක් ගන්නා තීරණ වලට බලපාන ඒවා වෙති.

ඉතින් කිසියම් අධ්‍යයනයක් කරන්නට මිනිසා විසින් හදන ලද කොන්දේසි මෙන්ම ස්වභාවික ලෝකය ද ප්‍රවෛගික (dynamic) වූවකි. මිනිසා මෙන් ම පරිසරය ද වෙනස්කම් වලට භාජනය වෙමින් පවතින්නකි. එක කාලයක දී එකතු කරන ලද තොරතුරු තවත් කාලයක දී තව දුරටත් සත්‍යය දැයි සොයා නොබැලීම දැඩි අඩුපාඩුවකි. මෙසේ කියද්දී මිනිස් ස්වභාවය සහ ලෝක ස්වභාවය ගැන සත්‍ය යැයි ඔප්පු කරන ලද වෙනස් නොවන සිද්ධාන්ත ගැන සැක පළ කිරීම බහුතරයාගේ සාමාන්‍ය සිරිතයි. එහෙත් ඔවුන් සැක පහළ කරගත යුතු වූව නොහොත් මිනිස් ස්වභාවයේ සහ ලෝක ස්වභාවයේ නිතර පවතින විවිධ වෙනස්කම් මොනවා දැයි විමසීමට අමතක කර දැමීම ද සාමාන්‍ය සිරිතයි!!!!!!

වෛද්‍ය විද්‍යාවේ දී කාලය යනු වැදගත් භූමිකාවක් ගන්නා සංදර්භයකි. යම් ඖෂධයක්, ඌනපූරණයක් හෝ පෝෂණ ක්‍රියාවලියක් සිරුරට බලපාන ආකාරයේ කෙටි කාලීන බලපෑම් සහ දීර්ඝ කාලීන බලපෑම් අතර ඇත්තේ වැදගත් වෙනසකි.

එහෙත් මෙහි දී තවත් බැහැර කළ නොහැකි දැඩි සේ වැදගත් වූ කාරණයක් ඇත. බෙහෙතක් තවම සොයාගෙන නැති රෝගයකින් පීඩා විඳින තම දරුවා මරණයට ළං වී ඉන්නේ නම් පමණක් බොහෝ දෙනෙකුට මෙය පහසුවෙන් වැටහුන ද, එය රටාවෙන් බැහැර සසම්භාවී වූවක් නිසා බහුතර මිනිසුන්ට පහදා ගත නොහැකි වූවකි. දීර්ඝ කාලීන ප්‍රතිඵල දැනගන්නා තෙක් හැමවිටම යම් ඖෂධයක් භාවිතා නොකර සිටීමට නොහැකියි. සායනික නැහැසුම් (clinical trials) දීර්ඝ කාලයක් පුරා පැවැත්වීමට යන වැය කොතරම් අධික වූයේ ද කියතොත් දැන් බෙහෙත් මිල වැඩියි කියනා අයට එවිට මොන අඳෝනා නැඟුවත් එය භාවිතයට නොලැබේ. මන්ද එවිට නිෂ්පාදනයක් සිද්ධ නොවෙන නිසයි.

අවදානම් යනු ජීවත්වන මිනිසා විසින් මුහුණ දිය යුත්තකි. මරණයෙන් ගැලවෙන්නට නොහැකි සේ, රෝග වලින් පීඩා විඳීමෙන් ගැලවෙන්නට නොහැකි සේ, උපන් නිසා මිනිසාට අවදානම් වලට මුහුණ දීමෙන් ගැලවී ඉන්නට ද නොහැකියි. මෙය යම් භාස්මික මට්ටමකින් දන්නා මිනිසා ඔහුව බියගන්වන වාර්තාවක් ඇහෙද්දී වැඩියෙන් ඒවාට ඇදී යාමට හුරුවක් ඇත. එසේම රටාව දකින්නටත් සසම්භාවීත්වය නොදකින්නටත් ස්වභාවයෙන් හැදී ඇති නිසා බියගන්වන වාර්තා තුල ඇති අවදානම ගැන බියවෙනවා මිසෙක ඒ ගැන විමසා බලන හැකියාවෙන් අඩු වෙයි.

මිනිසා විසින් හදන ලද රසායන යනු ආරක්ෂිත යැයි ඔප්පු කර පෙන්වන තුරු භාවිතයට නොගත යුතු දැයක් යැයි මේ බිය උපදවමින් ලියැවෙන වාර්තා කියා සිටිති. එය කියවන බහුතරයා හිතන්නේ ඕනෑම සාන්ද්‍රණතාවකින් (concentration), සෑම නිරාවරණයක දී ම (exposure), සහ වෙනත් සංයෝග සමඟින් එකතු වී පාවිච්චියට ගනිද්දී පවා පරිපූර්ණ ලෙසකින් එය ආරක්ෂිත තත්වයකින් ලැබිය යුතු බවකි.

සියළු තාක්ෂණයන් ගැන විද්‍යාත්මක වූ අවිනිශ්චිත බවක් ඉහත සඳහන් කළ හේතු නිසා පවතී. ඒ නිසාම අවදානම් ඇත. විද්‍යාව දන්නා අය වුවත් ජනතාව බියගන්වන හුරුවක ඉන්නේ නම් එවිට මේ වැදගත් විද්‍යාත්මක ලක්ෂණය අමතක කර දමති.

ඒකීය මිනිසා අවදානමක් ගන්නේ එයින් ලැබෙන මහත් ප්‍රතිඵල වැඩි බැවිනි. ප්‍රාග්ධනය නෛසර්ගිකව ලාබයක් උපදවනවා යැයි වරදවා සිතන හුරුවෙන් යුතු වූ අයට, ලාබයක් සොයන්නට ලැබෙන්නේ අවදානමක් ගන්නා අයට යැයි නොදකින අයට, මෙය තේරුම් කර දීම ඉතා අපහසු වූවකි!!! එසේ කිව්වාම සමහරු හිතන්නේ අනුන් අවදානමට තබන අය ලාබ උපයනවා කියාය!!!!

මිනිසා විසින් හදන ලද රසායන යනු කෘමීන් සහ වෙනත් රෝග කාරක භාවයන් විනාශ කර මරා දමන්නට හැකි ඒවාය. ඒවා එහෙම වූයේ නැත්නම් ඒවායෙන් මහජනතාවට ඵලදායක නොවේ. ඖෂධ නිසාම අවදානම් පවතින අතර ඒවායෙන් ලැබෙන අතුරු ඵලයන් ද ඇත. එහෙත් ඒවා භාවිතයට ගන්නේ ඊට වඩා අහිතකර වූ ප්‍රතිඵල වලින් ගැලවෙන්නට ය.

කෘමිනාශක යොදන්නේ වගා විනාශ වී නොයා දී සාගතයකට මුහුණ දීමෙන් ගැලවෙන්නට ය.

ලංකාවේ දොස්තරවරුන් අනවශ්‍ය බෙහෙත් නියම කරනවා සහ අනවශ්‍ය වාර්තා ඉල්ලා සිටිනවා යැයි හෙදියන් පැමිණිලි කළ නිසා දොස්තරවරුන් සැත්කම් වර්ජනයක ඉන්නා ප්‍රවෘත්තියක් කියැවීමි!!!!! ලංකාවේ දරුවන්ගේ කන් රැදාවට දෙන ඇමොක්සිසිලින් මෙන් ම වෙනත් වැඩිහිටියන්ට දෙන ඖෂධ සහ ඒවායෙහි සාන්ද්‍රණතාවන් හා ප්‍රමාණයන් කියවද්දී ලංකාවේ මිනිස්සු මෙහෙම සැර බෙහෙත් බොමින් කෘමිනාශක වලින් ලැබෙන අවදානම් ගැන කතා කරන්නේ මන්දැයි සිතුණු අවස්ථා අපමණය!!!!!!

එවැන්නක් ගැන උගත් අයකු ගෙන් ප්‍රශ්න කළ අවස්ථාවක ලැබුණු උත්තරය නම් “අපේ අයට එක පාරෙන් හොඳ වෙන්න සැර බෙහෙතක් දුන්නෙ නැත්නම් එයා වෙන දොස්තර කෙනෙක් ළඟට යනවා,” කියාය!!!!!!

ලංකාවේ පළ වූ බිය උපදවන ප්‍රවෘත්ති වාර්තාවක් ගැන විමසා බලමු:
සිරස්තලය: කෘෂි-රසායන: ලංකාවේ නිහඬ මාරයා
කර්තෘ: පාඨලී චම්පික රණවක

පළමු පින්තූරය පැල ගොයම් කුඹුරක් මැදින් රසායන ගසන ටැංකියක් සමඟ ගමන් කරන ලාංකිකයෙකි.

නොදන්නා අවිනිශ්චිත වකුගඩු රෝගයක නව වර්ගීකරණය ගැන ජනතාවට කියන රණවක මහතා එය හැදෙන්නේ කුමන හේතු නිසාදැයි සොයා ගැනීම විද්‍යාඥයන්ගේ කාර්ය භාරය බව පවසයි. ඒවා මොනවා දැයි සොයාගත්තාම ප්‍රතිපත්ති හදනා අයට සහ අදාල නිලධාරීන්ට මේ රෝගයෙන් ගැලවෙන්නට අවශ්‍ය නිශ්චිත ප්‍රතිකාර්මික ක්‍රියාවන් ගන්නට හැකි යැයි කියයි.

මෙය වගකීමෙන් කළ හැකි එකම ආකාරය මේ රෝග නිදානය ගැන වූ නොදන්නා හා අවිනිශ්චිත බව ඉවත් කිරීමෙන් බව මම ද රණවක මහතා හා එකඟයි!!!!

මේ රෝගය පවතින පළාතේ වැසියන් සෑම වසරක දී ම “සිය ගණනින් මිය යන” බව වාර්තා වී ඇතැයි ඔහු ඊ ළඟට කියයි. 10,000 කට වඩා දැඩි සේ රෝගී වූවන් ආණ්ඩුවේ ඉස්පිරිතාල වල ලියාපදිංචි යැයි ද කියයි. ලෝක සෞඛ්‍ය සංවිධානයට අනුව උතුරු මැද පළාතේ මිලියන 1.3 ක වැසියන් ගෙන් 15% ක් නොහොත් එක්ලක්ෂ අනූපන්දාහක් ජනතාව මේ රෝගයෙන් පෙළෙති. එපමණක් නොව දැන් එය උතුරු, නැගෙනහිර, වයඹ, සහ ඌව දිස්ත්‍රික්කයන් පුරා ද පැතිර යන බව කියයි.

ඊ ළඟට එන්නේ ආසනික් වසවිෂ ගැන වූ විස්තර හා රූප සටහන් කොටුවකි. එහි පැත්තක දත්ත වලට අනුව මේ අවිනිශ්චිත නොදන්නා රෝගයෙන් විසිදාහක් මරණ සිද්ධ වී ඇතැයි ද පනස්දාහක් ඌවේ සහ උතුරු මැද දිස්ත්‍රික්ක වල දී ඊට ගොදුරු වී සිටින බවත් කියයි. “සිය ගණනින් මිය යන” බව කිව්වා මිසෙක වසරක දී සීයේ ඒවා කීයක් ද කිව්වේ නැති නිසා විසිදාහක් මරණ කොපමණ කාලයක් තිස්සේ සිද්ධ වූවා දැයි පාඨකයාට සිතාගත නොහැකියි.

කේ. වනිගසූරිය 2012 දී ලියන ලද අන්තර්ජාලයේ ඇති විද්‍යාත්මක ලිපියක කියැවෙන්නේ මෙය පසුගිය දශකයේ හඳුනා ගත්තක් කියාය.

එසේ නම්, වසර විස්සක් තුල දී වසරකට දාහක් පමණ මිනිසුන් මේ රෝගය නිසා මිය ගිහින් ද?

රණවක මහතාට අනුව තතු විමර්ශනය කරන ලද විද්‍යාඥයන් හේතු හැටියට දක්වා ඇත්තේ මේවාය: අහිතකර වතුර සහ පසේ ෆ්ලෝරයිඩ් වැඩි තැන්පතු තිබීම; ජලාශ වතුර නයිට්‍රීකරණය සහ ඇල්ගේ පැලෑටි වර්ධනය; පර්යේෂකයන් අතර කොටසක් “ප්‍රගල්භ ලෙසින් කියා සිටියේ” (boldly claim) මේ රෝගයට හේතුව heavy metal සහ රසායනික පොහොර හා කෘමිනාශක වැඩි වශයෙන් පාවිච්චි කිරීම නිසා බව යැයි ද ඔහු ලියයි. බටහිර නොවන ඇකඩමියාවේ පිරිසක් මේ පළාතේ භාවිතා වන කෘසි රසායන වල තියෙන කැඩ්මියම් (Cd) සහ ආසනික් (As) මෙයට හේතු යැයි අඟවා (suggested) ඇතැයි ඔහු කියයි. දෙයියන්ගේ උපදෙස් අනුව හේතු සොයා ගැනීම ගැන ද සඳහන් කරන රණවක මහතා අනතුරුව කියන්නේ හම්බන්තොට වැනි පෙදෙස් වල, කෘෂි රසායන භාවිතා වූවත් මෙය කෘෂි රසායන වලින් හැදෙන්නක් නම් ඒ පෙදෙස් වල ජනතාව මේ රෝගයෙන් පෙළෙන බවක් දැක්වෙන්නේ නැත්තේ මන්දැයි විද්‍යාඥයන් වාද කරන ලද බවයි.

2012 Journal of the College of Community Physicians of Sri Lanka හි කේ. වනිගසූරියගේ ලිපියේ අනුමිතිය පෙන්වන්නේ බහුවිධ සාධක, එකක් හෝ ඊට වැඩි සංඛ්‍යාවක පරිසර සාධක සහ සමහර විට ජානුගතව පිහිටා ඇති තත්වයක් (genetic predisposition) ද රෝග නිදානයට හේතු “විය හැකි” කියාය. රණවක මහතාගේ ලිපිය මුල දී ඔහු ද දියවැඩියාව, අධ්‍යාතතිය වැනි හේතු ද නිදන්ගත වකුගඩු රෝගයට හේතු විය හැකි බව සඳහන් කර ඇත. නමුත් ඉහත විද්‍යාඥයන්ගේ හේතු දක්වන වගන්තියේ ඒවා සඳහන් නොවේ. එහි දී පාඨක අවධානය යොමු කරන්නේ රෝග නිධානයට හේතු සම්බන්ධයෙන් නොයෙක් රසායනික නම් වලට ය.

“ප්‍රගල්භ ලෙසින් කියා සිටින” පමණින් එය විද්‍යාත්මක අනුමිතියක් වේ ද? ඒ පර්යේෂකයන් කවුරුන් ද? ඔවුන් විද්‍යාත්මක සත්‍යයක් ඉදිරිපත් කර ඇත්නම් ඇයි ඒ ගැන පියවරක් රජයට වහාම ගන්නට නොහැකි?!!!!

“ප්‍රගල්භ ලෙසින් කියා සිටින” දේවල් විද්‍යාත්මක සත්‍යයක් යැයි ඔප්පු කළ හැකිනම් එක්කෝ කෘෂි රසායන නිවැරදිව භාවිතා කරන හැටි කියා නොදුන් අය වරදකරුවන් ය. නැත්නම් නිවැරදිව භාවිතා කළ නමුත් අනිසි සංයෝග වලින් දැඩි හානි පමුණුවන කෘෂි රසායන රටට විකුණා ඇත්නම් ඒ විදෙස් රසායන කොම්පැණි වලින් ජීවිත අහිමි වූවන්ගේ පවුල් වලට ඩොලර් වලින් විශාල වන්දි මුදල් ලබාගත හැකියාව ඇත. එසේම ඒවා සොයා නොබලා රට ඇතුලට ගන්නට අවසර දුන් අයට දැඩි දඬුවම් දිය යුතුයි!!!

ලෝක සෞඛ්‍ය සංවිධානයට රෝග නිධානය (etiology) කුමක් දැයි කියන්නට නොහැකි වූ බව රණවක මහතා පවසයි.

එහෙත් ඒ සඳහනට යටින් ඇත්තේ මේ කාටූනයයි: එකක් කියා වෙනකක් පෙන්වා බිය උපදවන අපූරුව!!!
agri chemical cartoon

කැබිනට් උප කමිටු, පාර්ලිමේන්තු විශේෂ කමිටු සහ විද්‍යාත්මක කමිටු පත් කරන ලද ද, ඒවායෙන් නිර්දේශයන් ඉදිරිපත් කරන ලද ද, ලෝක සෞඛ්‍ය සංවිධානයේ නිගමනය සහ දත්ත සහ තවත් පුරෝගාමී විද්‍යාඥයන් 43 දෙනෙකුගේ අධ්‍යයනයන් සියල්ලම ලංකාවේ දේශපාලනයේ බලගතු පිරිසක් විසින් පරිසිද්ධි දියාරු කරන උත්සාහයක් ඇතැයි හේ අනතුරුව කියා සිටියි. මෙය පුවත්පතේ නැවත වරක් රතු අකුරින් ද සඳහන් වේ.

ලංකාවේ අහිංසක වැසියන් දාහකට බැගින් වසරක් වසරක් පාසා මරණය කැඳවන්නක් ගැන පරිසිද්ධි දියාරු කරන්නට සමත් ලංකා දේශපාලනයේ බලගතු පිරිස කවුරුන් දැයි අපිත් දැනගන්නට කැමැත්තෙමු!!!!!!! සමහර විට සියල්ලට සවන් දෙන ඔබාමා නම් දැනටමත් දන්නවා ඇති!!!! 😀

ඊ ළඟට එන්නේ WHO සංවිධානයේ Dr. F. R. Mehta විසින් විශේෂ විද්‍යාඥ සැසිවාරයක දී WHO අධ්‍යයනයේ රෝග නිධානය කුමක් දැයි කියන්නට නොහැකි වූ සොයා ගැනීම් පැහැදිලි කරන ලද හැටියි. මේ නිදන්ගත වකුගඩු රෝගයට හේතුව මිනිසා විසින් හදන ලද රසායාන වැඩියෙන් භාවිතයයි. හේතුව පැහැදිලිවම එය නම්, එහෙනම් එය WHO සංවිධානයේ වාර්තාවේ ලියන්නට බැරි වූ හේතුව අර ලංකා දේශපාලනයේ බලගතු පිරිස ද?!!! එහෙම නම් ඇයි කාටූනයේ ඒ අය නැත්තේ?!!!!

මේ රෝගය ගැන වූ නොදන්නා හා අවිනිශ්චිත බව ඒ විශේෂ විද්‍යාඥ සැසිවාරයේ දී ඉවත් වී ඇත්නම් මීට වඩා ඒ ගැන විස්තර පාඨකයාට නොදෙන්නේ මන්ද?!!!!!! ඒ ගැන විද්‍යාත්මක ලිපියක් විද්‍යාත්මක සඟරාවක පළ නොකරන්නේ ඇයි?!!!!

සමහර විද්‍යාත්මක යැයි කියා ගන්නා අධ්‍යයන වල දත්ත බෙහොමයක් පෙන්වා දත්ත සොයාගත් හැටි ගැන සහ අනුමිතිය කුමක් දැයි වාක්‍යයක් තුල සැඟවේ. මෙහි දී අනුමිතිය පමණකි. දත්ත සියල්ල නොමැත.

අවසානයේ දී, හරි නිගමනයක් නොමැතිව ඉදිරිපත් කෙරුණු WHO වාර්තාව ගැන වාද කිරීම අවශ්‍ය නැතැයි රණවක මහතා කියයි. අවශ්‍ය පියවර ගන්නට විධිමත් ලෙසින් හදාගත් දත්ත (methodically adopted data) සෑහේ යැයි ඔහු කියයි. එම විධිමත් ලෙසින් හදාගත් දත්ත කෙසේ හදාගත්තා දැයි හෝ ඒ හදාගත් දත්ත මොනවා දැයි දන්නේ කවුරුන් ද? ඇමතිවරයා ද? අර ලංකා දේශපාලනයේ බලගතු පිරිස ද? විදේශීය රසායනික ආයතන ද? රටේ වෛද්‍යවරුන් ද? රටේ ජනතාව ද?

මෙතෙක් වාද කරන ලද විද්‍යාඥයන් දැන් එකඟ ද?!!!!!

රණවක මහතාගේ ලිපිය විද්‍යාත්මක සඟරාවකට ලියන ලද විද්‍යාත්මක ලිපියක් නොව සාමාන්‍ය මහජනතාවට කියවන්න ලියපු ලිපියකි!!!!! ඒ නිසා ඒ පැහැදිලි කිරීම් අවශ්‍ය නැත!!!!!

ඉතින් කෘෂි රසායන වැඩියෙන් භාවිතය නිසා රෝගය හැදේ යන නිගමනය කරා පැමිණිය ද, විධිමත් ලෙසින් හදාගත් දත්ත නොපෙන්වා, ඊ ළඟ පියවර ලෙස කර්තෘ යෝජනා කරන්නේ කෘෂිකර්ම අමාත්‍යාංශය මඟින්, වගාබෝග සඳහා යොදන මිනිසා විසින් හදන ලද රසායන භාවිතයේ රෙගුලාසි දැඩි කළ යුතුයි කියාය. මිනිසා විසින් හදන ලද රසායන ආනයන සහ රසායන දැමූ ආහාර ආනයන කරන විට ද රෙගුලාසි දැඩි කළ යුතුයි. පවතින රෙගුලාසි වල ඇති අඩුපාඩු මොනවා දැයි දන්නේ කවුද?!!!!!

අහා … අලස ජනතාවක් නැති කරන්නට සැලසුමක් හැදූ ප්‍රතිසංස්කරණවාදී මිකායෙල් ගොරබචොව් මතක් වුනා!!!!

රණවක මහතා අර නවසීලන්තයෙන් ආනයන කර ලංකාවේ විකුණන කිරිපිටි වල Dicyandiamide තිබුණ කිව්වම (කොච්චරක් තිබුණ දැයි කිව්ව ද?!!) සෞඛ්‍ය අමාත්‍යාංශය එහි DCD නැහැයි කියනවා.

පර්යේෂණ හා තාක්ෂණ අමාත්‍යාංශයේ ඉන්නේ විද්‍යාව දන්නා අය ද?!!!!!

අර මිනිස්සු මරන්න ලෑස්ති ලංකා දේශපාලනයේ බලගතු පිරිස ඉන්නේ සෞඛ්‍ය අමාත්‍යාංශයේ ද?!!!!!

කළු කණ්ණාඩි සහ ටයිකෝට් දාගත්තු තරබාරු විදේශිකයාගේ කාටූනය කවදා හෝ වෙනස් වේවි ද?!!!!! 😀

පරිසරයට හානි නොවීම සඳහා අරමුණු කරගත්, මිනිසාටත් හානියක් නොවන DCD නැති කිරිපිටි ගැන රණවක මහතා වැඩියෙන් සතුටු විය යුතුයි නේද?!!!!!!!

ජානු මොඩිෆයි කරපු ඒවා කන ඇමෙරිකන් අපිට .. බීජයේ ජානු වල දී කෘමිරසායන හැකියාවන් ඇතිව වෙනස් කරලා තියෙද්දී පැල වලට වැඩිපුර රසායන ගහන්න අවශ්‍ය නෑනේ .. ඉතින්, ෆ්‍රැන්ක්ස්ටයින් ආහාර ලංකාවට නුදුරු අනාගතයේ දී ආනයන කරනවාට රණවක මහතාගේ අනුමැතිය ලැබේවි ද?!!!!!

Advertisements

4 Responses

Subscribe to comments with RSS.

  1. Alchemiya said, on ජූලි 30, 2013 at 9:41 ප.ව.

    බොහොම අගේ ඇති ලිපියක්, පොඩි නිවැරදි කිරීමක් කරන්න අවශ්‍යයි.
    වකුගඩු රෝගය දැන් දැන් අනෙක් පලාත්වලටත් පැතිරෙනවා. නමුත් මේ ගැන නිසි “විද්‍යාත්මක පර්යේෂණයක්” සිදු වෙන්නෙ නැහැ. සිදු වෙන්නේ තමන්ගේ බඩ වඩා ගන්නා අන්දමේ පර්යේෂණ පමණයි.
    නිවැරදි කිරීම අවසන්
    මම මේ ගැන මහාචාර්ය දසරථ ගුණවර්ධන සමඟ දීර්ඝව සාකච්ඡා කළා. ලෝක බැංකු වාර්තාව සකසලා තියෙන්නේ විශ්ලේෂක රසායන විද්‍යාව (Analytical Chemistry) ප්‍රාමාණික දැනුමක් ඇති උගතුන් නොවෙයි. මේ නිසාම බොහෝ වැදගත් කරුණු මඟහැරී තිබෙනවා. නලින් සිල්වා වාර්තාවේත් බොහෝ අඩුපාඩුකම් තියෙනවා.
    අරුණි අක්කා කියූ අධික මාත්‍රාවකින් බෙහෙත් දෙන කතාව සම්පූර්ණ ඇත්ත. ළදරුවන්ට දෙන්න තියෙන එකම බෙහෙත ළමා පැනඩෝල් පමණයි. අනෙක් සියල්ල වැඩිහිටි බෙහෙත්, ඒවා දෙන්නෙත් වැඩිහිටියන්ට දෙන ප්‍රමාණය මයි. අප යමක් කමක් දන්න නිසා සමහර බෙහෙත් දීමෙන් වැලකී සිටියා.
    ඒ වගේම ආහාර – ජලය ආදියෙත් ලොකු පිරිසිදු කමක් නැති වුනත් මිනිස්සු ජීවත් වෙනවා. මිනිස්සුන්ට ඒ ගැන හිතනවට වඩා වෙනත් ප්‍රශ්න තියෙන නිසා ඒ ගැන කතා වෙන්නෙ නැහැ…
    ඕකයි ලංකාවෙ තත්ත්‍වය…
    දැන් දැන් Organic Food ප්‍රචලිත වේගෙන ආවත්, ඒවා 100% ක් Organic ද යන්න ලොකු ප්‍රශ්නයක්. හොඳම දේ තමන් වගා කරගෙන කෑම පමණයි…
    මේ ගැන තවත් ලියන්න ගියොත් ප්‍රතිචාරය ලිපියක් වෙනවා…

    • arunishapiro said, on ජූලි 31, 2013 at 6:43 පෙ.ව.

      Alchemiya,

      නිවැරදි කිරීමට බෙහෙවින් ස්තූතියි ඇල්කෙමියා මල්ලි.

      කේ. වනිගසූරිය දක්වන අධ්‍යයනය අනුව රෝගයට ප්‍රධාන ලෙසින් ගොදුරු වී ඇත්තේ දුප්පත් සමාජ-ආර්ථික පසුබිම් වලින් එන කුඹුරු වගාවේ යෙදෙන පිරිමි. ඒක අනෙක් පලාත් වලිනුත් දකින්න ලැබෙනවා දැයි සෙවීම වැදගත්. මේ අයගේ වයස් මට්ටම් ගැන දැනගන්නට නැහැ; ඒ නිසා සාමාන්‍යයෙන් නිදන්ගත වකුගඩු රෝගයට ප්‍රධාන හේතුවක් වන දියවැඩියාව ඊට කොතරම් දුරකට බලපා ඇතැයි ද දැනගන්නට ද නැහැ. ආහාර වගා කරගෙන කෑවත් මතට තිත තියා වෙල පැත්තෙ පෙරාගන්න මොනවා බීලා නිදාගන්නවා ද දන්නෙත් නෑනේ.

      ඒ කියන්නෙ, නිවැරදි හේතුව හොයා ගන්න නම් අධ්‍යයනය පුළුල් කළ යුතුයි. හැබැයි එතකොට තවත් ඇටසැකිලි මතුවෙන්නත් පුළුවන්.

  2. මිගාර said, on අගෝස්තු 1, 2013 at 7:29 පෙ.ව.

    // නිසා සාමාන්‍යයෙන් නිදන්ගත වකුගඩු රෝගයට ප්‍රධාන හේතුවක් වන දියවැඩියාව ඊට කොතරම් දුරකට බලපා ඇතැයි ද දැනගන්නට ද නැහැ

    දියවැඩියාව නිසා CKD-u ඇති නොවේ. එය සුපැහැදිලි කරුණකි. දියවැඩියාව සහ CKD-u හි pathogenesisරෝගය ඇතිවීමේ පිළිවෙල ) සහමුලින්ම වෙනස්ය. අවශ්‍ය නම් වෙන්කර ගන්නා අන්දම විස්තරාත්මකව දක්වත හැකිය.

    //නමුත් ඉහත විද්‍යාඥයන්ගේ හේතු දක්වන වගන්තියේ ඒවා සඳහන් නොවේ. එහි දී පාඨක අවධානය යොමු කරන්නේ රෝග නිධානයට හේතු සම්බන්ධයෙන් නොයෙක් රසායනික නම් වලට ය.

    දියවැඩියාව සහ අධි රුධිර පීඩණය නිසා ඇති වන වකුගඩු රෝගය හොඳින් විස්තර වූ එකක් නිසා ඒ ගැන තවදුරටත් කථා කිරීම රෝගී සත්කාර පැත්තෙන් වැදගත් නැත. නමුත් හැම දෙනාම අමතක කරන කරුණ නම් CKD-u සහ ආසනික් වාද විවාද හමුවේ වකුගඩු රෝග වලට ප්‍රධානතම හේතුව වන දියවැඩියාව ගැන කතා කිරීම සැඟවී යාමයි. වකුගඩු අක්‍රිය වීමෙන් 50%කටම වග කියන්නේ දියවැඩියාවයි! කෙනෙක්ට CKD-u සඳා කළ හැකි ලොකුම දෙය නම් දියවැඩියාව ඇති වීම අඩු කිරීමයි. එවිට ඉතිරි වන මුදල් CKD-u සඳහා වූ පර්යේෂණ වලට පහසුවෙන්ම යෙදිය හැකි වනු ඇත.

    • arunishapiro said, on අගෝස්තු 1, 2013 at 9:33 පෙ.ව.

      මිගාර,

      දියවැඩියාව සහ අධික රැධිර පීඩනය යන දෙක නිදන්ගත වකුගඩු රෝගයට වැඩියෙන් ම ප්‍රධාන වන හේතු ලෙසින් පෙන්වා දෙන්නේ මම නෙමෙයි. බටහිර වෛද්‍ය විද්‍යාවයි.

      නිදන්ගත වකුගඩු රෝගය යනු Chronic Kidney Disease වෙද්දී CDKu යනු අවිනිශ්චිත නොදන්නා unknown යන්නට u එකතු කර ලංකාවේ පවතින තත්වය ගැන කියන්නට හදා ගන්නා ලද්දයි.


ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න / වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න / වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න / වෙනස් කරන්න )

Google+ photo

ඔබ අදහස් දක්වන්නේ ඔබේ Google+ ගිණුම හරහා ය. පිට වන්න / වෙනස් කරන්න )

%d bloggers like this: