උපාධියක් ඇත්නම් රස්සාවක් නැත්නම් ඇමතිට අබ ගෙනියන්න

නිමල් සිරිපාල ද සිල්වා ඇමතිවරයා විසින් රැකියාවක් නැති උපාධිධරයෙක් සිටින නිවසකින් අබ ඇට අහුරක් ඉල්ලූ ප්‍රවෘත්තියක් කියෙව්වෙමි. ඔහු එහෙම කියා ඇත්තෙ අද ලංකාවේ උපාධි සහතික ඇති එහෙත් රස්සා නැති අය දුලබ බව පෙන්වන්නටලු.

ඒ ප්‍රවෘත්තියට හොඳටම හරියන පින්තූරය මෙයයි.

ඉතින්, තාප්පයක්/බිත්තියක් හැදුවයි කියල ඵලක් තියෙනවා ද?!!!!

අනුන්ට වඩා ඉහළ මට්ටමක ඉන්නා අයෙක් වෙතින් ඔහුට වඩා පහළින් සිටින අය පාලනය වීම යහපත් යැයි සිතන අයට ඉංග්‍රීසියෙන් elitist යැයි කියැවේ. එය ඇනුම්පදයක් මිසෙක පැසසුමක් නොවේ. ‘එලීටිස්ට්’ යන්නට හරියටම ගැලපෙන සිංහල වචනයක් මම නොදනිමි.

ගම්පෙරළිය නවකතාව ලියූ මාටින් වික්‍රමසිංහ එක පැත්තකින් උප්පත්තියෙන් ද තවත් පැත්තකින් අධ්‍යාපනයෙන් ද ඒ ඒ අය තම තමන්ට ලැබිය යුතු යැයි අපේක්ෂා කරන එලීටිස්ට් හැදියාවන් කදිමට නිරූපනය කර ඇත.

එලීටිස්ට්ලා සියල්ලන් වංශවත් අය නොවෙති. ඔවුන් සියල්ලන්ම ධනවත් අය ද නොවෙති. ඔවුන් උපාධි පිට උපාධි සහතික ලත්තවුන් ද නොවෙති. එසේම ඔවුන් සැවොම දේශපාලන බලය අල්ලා ගත්තවුන් ද නොවෙති. ඔවුන් කිසිසේත්ම ධනවාදය කුමක්දැයි දන්නා අය ද නොවෙති!!!!!!

එහෙත්, සියළුම එලීටිස්ට්ලාට අනුව සාමාන්‍ය පුද්ගලයෙකුට තමන්ට සුදුසු කුමක්දැයි තනිවම තීරණය කරත හැකියාවක් නැත.

එසේම සියළුම එලීටිස්ට්ලා විශ්වාස කරන්නේ තමන් රටට හෝ ජාතියට හෝ ක්ෂේත්‍රයට අවශ්‍ය සේවයක්, සුවිශේෂ දැනුමක්, ධනයක් සපයන අය නිසා යම්කිසි ආකාරයකින් සමාජයේ අනෙක් වැසියන්ට වඩා ඉහළ වූ සමාජ තත්වයක්, නිල තනතුරක්, ඉහළ පඩියක් තමන්ට ප්‍රදානය විය යුතු යැයි කියායි. ප්‍රශංසාව සහ ගෞරවය තමනට හිමිවිය යුතුයි කියාය.

වංශය, කුලය, ධනය, දේශපාලන බලය, උපාධිය එහෙමත් නැත්නම් රූප සෝබාව වුවත් පාදක කරගෙන ඒ නිසා අනුන්ට වඩා තමන් ඉහළ යැයි ද, ඒ නිසා අනුන්ට වඩා විශේෂ වූ යම් වරප්‍රසාද රටේ පාලකයන් මාර්ගයෙන් තමනට ලැබිය යුතු යැයි මේ එලීටිස්ට්ලා අපේක්ෂා කරති.

කිසිම විටෙක එලීටිස්ට්ලා ඔවුන්ගේ සේවය, දැනුම, කුසලතාවය හෝ රූපය නිදහස් වෙළඳපොලක දී තරඟකාරී මිලකට විකුණන්නට ඉදිරිපත් නොවෙති. ඔවුනට අනුව එය කුහක වූ ආත්මාර්ථකාමයකි!!! එලීටිස්ට්ලා අපේක්ෂා කරන්නේ ඔවුන් පමණක්ම සැබෑ පරහිතකාමී අය නිසා 😀 ඔවුන්ගේ සේවයට, දැනුමට, කුසලතාවයට හෝ රූපයට සරිලන තනතුරු හා ප්‍රතිලාභ ඔවුන්ට පිරිනමන්නට හැකි සමාජයක වැසියන් වාසනාවන්තයන් කියාය.

තමන් වෙනුවෙන් තීරණ ගන්නට නොදන්නා සමස්ත පොදු ජනතාවගේ යහපත උදෙසා, ආණ්ඩුව මාර්ගයෙන් ඒ පොදු ජනතාවගෙන්ම බලහත්කාරයෙන් උදුරා ගන්නා බදු මුදලින්, මේ එලීටිස්ට්ලාට තනතුරු හා ප්‍රතිලාභ සැපයීමට අවශ්‍ය බව ඔවුන් තරයේ විශ්වාස කරති.

එලීටිස්ට්ලා නිතරම අනෙක් එලීටිස්ට්ලාට ප්‍රශංසා කිරීම ඉතා පැහැදිලිව දැකිය හැකියි.

අයෙක් කැමැත්තෙන් නියැළෙන කටයුත්තක් තහනම් කරන්නට හෝ ඊට රෙගුලාසි දමන බලහත්කාරකමේ බලය සඳහා ආණ්ඩුවේ සහාය එලීටිස්ට් නොවන්නෙක් කිසිම විටෙක ඉල්ලා සිටින්නේ නැත.

තමන්ට සුදුසු වූව මිසෙක අනුන්ට සුදුසු මොනවාදැයි කියන්න තමන් නොදන්නා බව එලීටිස්ට් නොවන්නා පිළිගනියි.

ආර්ථිකයක් සැබෑ දියුණුවක් කරා යා හැකි පරිදි සැලසුම් කරන්නට තමන් හෝ වෙන කිසිම පුද්ගලයෙක් නොදන්නා බව තරයේ පිළිගනියි.

ආර්ථිකයක සැබෑ දියුණුවක් සිද්ධ වෙන්නේ, වෙළඳපොල නොහොත් භාණ්ඩ මිල දී ගන්නා සහ නොගන්නා ක්‍රියාවේ යෙදෙන සියළු වැසියන් නිදහස් තීරණ ගනිද්දී පමණක්ම බව එලීටිස්ට් නොවන්නා වටහා ගෙන ඇත.

තමන්ගෙ දැනුම, තමන්ගේ කුසලතාවය ආණ්ඩුව මාර්ගයෙන් බලහත්කාරයෙන් අනුන්ට බෙදීම සහ එම සැලසුම්වල වැය රටවැසියන් පිට පැටවීම එලීටිස්ට් නොවන්නා නොකරයි.

එලීටිස්ට් අය වැඩි වෙද්දී ඕනෑම රටක ඔවුන් ද ඇතුළුව එහි සියළු ජනතාව බංකොළොත් වී ණයගැතියන් වන බව ඉතිහාසය නැවත නැවත ඔප්පු කර ඇත.

යම් ආණ්ඩුවක් එහි උපාධිධරයන්ට පමණක් නොව රටවැසියන් සියල්ලන්ටම රස්සා දුන්නත් එපමණින් එරටේ ආර්ථිකය දියුණු වේ යැයි සිතන අය ආර්ථිකයක් වැඩ කරන හැටි නොදන්නවුන්ය. නොමිලේ බෙදන ලද නිදහස් නොවූ අධ්‍යාපනයෙන් පෝෂණය වූවන් එවැනි මහා පරිමාණ සැලසුම් හැදූ ලෝක ආර්ථික සියල්ලක්ම බංකොළොත් වූ හැටි නොදනිති.

ඉතින් එලීටිස්ට්ලා තාප්ප ඉදිකරන්න කියති. තාප්ප කඩන්න කියති. නැවත ඉදිකරන්න යැයි කියති. මිනිසුන් දහදිය වගුරවමින් කය වෙහෙසන හැටි බලමින්, ඉහළට යන තාප්ප පෙන්වමින්, කඩා දමන තාප්ප පෙන්වමින්, ඔවුන් වෙහෙසනවා බලන්න ඔවුන්ට රැකියා ඇති හැටි බලන්න යැයි උදම් අනිති.